Read Yimchungru Naga Luk 5 Bible Online

Luk 5 - Yimchungru Naga bible

Luk 5

¹Küyimki mihtsürübonü Thrünpuh yu anipü api kheak nimkihkheanü, api Gennesaret kechih ki zhipde alakheah.

²Tüsho sangkung mahne kechih ki lade apinü ngü; tüshe thüngüh-ramrübo jurü chingnü wukhiukbah arü keangbo müsühde alakheah.

³Simon sangkung ching yüzahbah apinü anihbuh ki kemungyean kheaknü anükhüh nimde ayüpü tha. Tüsho apinü sangkung ching binbah mihtsürübo ki thsangyu.

⁴Tüsho küyimki api yu thakhamkhea, apinü Simon ki tha, “Sangkung ju ke asük lim nimde yüang, tüsho nü yo keangbo thüngüh rampü jipyukang.”

⁵Tüsho Simonnü alo, “Atungpuh, isanü tsüngreroro rhimobah tümü müram, tüshe nü yu hode inü keangbo jipyukbah.”

⁶Tüsho küyimki arünü ha rhimokhea, arünü thüngüh hihdakde phuh; tüsho arü keangbo athsümünimpü thsüde alakheah.

⁷Jumonü arünü arübah arungshihpü sangkung püpü ching arü rungachihrü kilim arü khah ayit. Arübo arü tüsho sangkung ane chido mikhiukde akamkhinü keamyukde ayüzahpü tankih.

⁸Tüshe küyimki Simon Peternü ju ngükhea, apinü Jisu mukhukbo ki khukningde tha, “I kinü chamachihang, tümüde I a aneakrü mihtsürü ah, O Atungpuh.”

⁹Tümütüsho api le anihbuh lung larü alalanü arünü aramkhi thüngüh kheahbah müyinsah;

¹⁰tüsho Simon lung rungachihrü Zebedee tsührübo Jakob le Johan büne she alakheah. Tüsho Jisunü Simon ki tha, “Dütre; kheakünü ründe nünü mihtsürü rambah.”

¹¹Tüsho küyimki arü sangkungbo alo ching bede arükhea, arünü lüpdükhi bahbah api dunglim yan.

¹²Küyimki api kiuto khülang ching lakhea, aphamnü mide alakhi mihtsürü khülang arü; tüsho küyimki apinü Jisu ngükhea, apinü ami mükhümbah mushude tha, “Atungpuh, nünü mulongsho, I müsühkhitjang.”

¹³Tüsho apinü akhah chungkhitbah api qiude tha, “Inü mulonglah; müsühde kamang.” Tüsho zukleangnü api kheaknü apham dükheakabah.

¹⁴“Tüsho she ki she müthapü apinü arü ki tha; tüshe Mosanü thiyukhüm jihkhi nangde mihtsürübo ki thiyumütsan thsüpü amükeamrübo ki yübah huhang tüsho nü müsühkhitpü kingaün khülang jihang” de tha.

¹⁵Tüshe api dünkheaknü thiyusheak alü thsüde khiungke lim yü; tüsho yimto ato ju anipü tüsho arü tukthsü thsüngupü mukhungde arü.

¹⁶Tüshe apinü azhikpung ching yü tüsho tamkhüntamnü.

¹⁷Nimung khülang, api thsangyude alachoki, Galilee le Judea kiulongbo tüsho Jirusalem chingnü arükhi Pharisirü le yakzan thsangyurübo binde alakheah; tüsho athsüngupü Atungpuh wu api kheak lakheah.

¹⁸Tüsho kheahang, mihtsürübonü thripshe mihtsürü khülang yappung kheaknü hande arü, tüsho arünü api ju bede yüzahbah Jisu miki yapshihpü mürang;

¹⁹tüshe boto lakhinü bede ayüzahpü limro müngümonü arünü thüyam kheak yükih tüsho ayidükhik chakashungbah mihtsürü bolung Jisu miki yüzahshih.

²⁰Tüsho apinü arü akin ngübah tha, “Mihtsürü, nü neakbo bahjihdo.”

²¹Tüsho yakzan thsangyurübo le Pharisirübonü keokhide athapü tankih, “Mükhemükimbo thakhi ha shepü a? Thrünpuh kheak hode shenü neak bahjihpü kukla?”

²²Küyimki arünü akeokhikhi Jisunü anikhitkheanü apinü arü ki tha, “Tümüde nüsanü nüsa mulong ching keokhicho?

²³‘Nü neakbo bahjihdo,’ yungsho, ‘Asürang tüsho tsahang,’ de athakhi küpü amülübe laba?

²⁴Junangde alomi ching neak bahjihpü Mihtsürü Tsührü thiyukhüm-sühmüh lah de nüsanü amükheahbah.” Apinü thripshe thsübuh ki tha, “Inü nü ki thachoh, asürang tüsho nü yappung shuh-a lubah thüyam lim yüang.”

²⁵Zukleangnü apinü arü mikinü asürü, tüsho api yappung shuh-a lubah Thrünpuh shijihde thüyam lim yü.

²⁶Arü alala müyinsahde Thrünpuh shijih tüsho atrekhinü mide tha, “Isanü khihni mihmüyinsahbe ngüdo.”

²⁷Ju dunglim apinü wukhiuk, tüsho ruk-threrü, amung Levi de ajikhi ruk-threyam ching binde ngü; tüsho apinü anihbuh ki tha, “I dunglim yanang.”

²⁸Apinü lüpdükhi bahbah tsahmusu, tüsho api dunglim yan.

²⁹Tüsho Levinü api yam ching thünio ato thsü; tüsho ju ching ruk-threrü boto ato tüsho arü lung püpürü dükhüm ki binde alakheah.

³⁰Pharisirü le yakzan thsangyurübonü api jingyanrü atsangde tha, “Tümü thsükhi nüsanü ruk-threrü le aneakrü bolung tsühyungcho?”

³¹Jisunü arü ki alo, “Tsüde alarü thsungkheak thümürü yihnüpü müla, tüshe tukthsürü thsungkheak ah;

³²amüsührübo yung, tüshe mulong müthrishihpü aneakrübo jipü I arükheah.”

³³Arünü api ki tha, “Johan jingyanrübo le Pharisirü jingyanrübonü alochode khümkeak thsüchoh tüsho tamkhüntamnüchoh, tüshe nü jingyanrübonü a tsühyungchoh.”

³⁴Jisunü arü ki tha, “Yamkhünkamrü arü lung lachoki nüsanü arhangrü thünio hanrübo khümkeak thsüshihpü kukla de?

³⁵Arü kinü yamkhün-kamrü bede atsopü kim arübah; judüki arünü khümkeak thsübah.”

³⁶Apinü arü ki shihdanglimyu khülang tha: “Shenü she khim aso rukkhibah adüzü kheak mükhüpkihchoh; apinü jude thsüsho aso ju arukkhibah, tüsho aso khüpkihkhinü adüzü kheak mayede alabah.

³⁷Tüsho shenü she shihküpkeluh awün ching yukhu amühdo muyukchoh; apinü jude thsüsho amühdo yukhunü shihküpkeluh lahrüpbah ju amüyeanbah, tüsho shihküp-keluh thsümünimbah.

³⁸Tüshe yukhu amühdo ju shihküpkeluh aso ching yukbeah.

³⁹Tüsho shenü she yukhu awün yungbah dunglim aso mükünchoh; tümüde apinü thachoh, ‘Awün atsübe ah.’ ”