Read Yimchungru Naga Luk 7 Bible Online

Luk 7 - Yimchungru Naga bible

Luk 7

¹Mihtsürü alalanü sode api yu thakhamshu, apinü Kapernaum ching yüzah.

²Kheakü Roman torü yamlarü khülang, apinü muzhode alakhi ashepü thsüde tukthsüde alakheah.

³Küyimki apinü Jisu dünkheak sokheanü, arübah api yamlarü thsüngushihpü api ki keopü Jihudarü azothsürübo yüshih.

⁴Tüsho küyimki arübo Jisu ki arükhea, arünü api ki mushude tha, “Apinü nü mihkhah lupü lümlah, api thsungkheak rhimojang,

⁵tümüde apinü isa trükshih muzholah, tüsho isa sinagog thsüjihdo.”

⁶Jisunü arü lung yü. Küyimki api ju thüyam kinü limshude mülakhea, atorü junü api kilim müyamrübo yüshihde tha, “Atungpuh, nü küpkhuk dulu, tümüde nü I yam me khüp azahpü I müthülün;

⁷yungsho I nü ki arüpü müthülün. Thiyu lang thaang, tüsho I yamlarü thsüngubah.

⁸Tümütüsho I she I bukkhüp bonungrü zobah, thiyukhüm-sühmüh khüp lakhi mihtsürü khülang ah: inü khülang ki yüang de thasho apinü yüchoh; tüsho püpürü ki arang de thasho apinü arüchoh; tüsho I yamlarü ki ju rhimoang de thasho apinü rhimochoh.”

⁹Küyimki Jisunü ha sokheanü apinü anihbuh ki müyinsah, tüsho rholobah api dunglim yankhi boto ki tha, “Inü nüsa ki thachoh, Israel ching she akin ha ruk inü müngü.”

¹⁰Tüsho küyimki yunithsürübo thüyam lim alode ayükheanü, arünü yamlarü ju ngua ngü.

¹¹Ju dunglim nahde apinü Nain de ajikhi kiuto ching yüzah, tüsho api jingyanrübo le boto ato api dunglim yü.

¹²Api ju kiuto chipiripit thüninde alachoki, kheahang, khimoberü lapkhiung tsührü shea shuhkhita lakheah; tüsho kiuto chingnü boto ato alibe lung lakheah.

¹³Tüsho küyimki Atungpuhnü alibe ngükhea, apinü anihbe muzhode lüm tüsho alibe ki tha, “Dütrip.”

¹⁴Apinü arübah kung ju qiu tüsho ashuhrübonü zhikde zhip. Tüsho apinü tha, “Athrününgtsüng, inü nü ki thachoh, asürang.”

¹⁵Ashebuh junü asürü bin, tüsho thiyu thapü tankih. Tüsho Jisunü api ju abe kilim jih.

¹⁶Arü alala trede kam; tüsho arünü Thrünpuh müretahde tha, “Isa bolung wukihrü ato khülang asürüdo!” tüsho “Thrünpuhnü api mihtsürü rhua kheahdo!”

¹⁷Tüsho api dünkheak ha yusheak Judea tüsho mühi lomi alala ching soride yü.

¹⁸Johan jingyanrübonü harü alala api ki thaa huh.

¹⁹Tüsho Johannü ajingyanrü bolungnü mahne api kilim jibah Atungpuh kilim yüshihde tha, “Shepü arüpü lanü ju nü a shi, dashi isanü püpürü aleangba?”

²⁰Küyimki mihtsürübo api kilim arükheanü, arünü tha, “Johan Baptijihbuhnü isa nü kilim thiyia arüshihkheah, ‘Shepü arüpü lanü ju nü a shi, dashi isanü püpürü aleangba?’ ”

²¹Ju kim ching apinü tukthsürübo ahihdo, arümbo, amünean mebo thsüngu, tüsho müktukrü ahihdo ngüde kamshih.

²²Tüsho apinü arü ki tha, “Yüang tüsho nüsanü tümü ngüde tüsho sodünü Johan ki thaang: müktukrünü ngüchoh, jingkikrünü tsahchoh, aphamrü müsüh-a lah, nükhünpeangrünü sochoh, asherü arhang kamlodo, zhochihrü ki thiyusheak atsü thsangyudo.

²³Shepü I dünkheaknü adukiuhlokhi mülanü asühpü.”

²⁴Küyimki Johan yunithsürübo tsoabahkhea, apinü Johan dünkheak boto ki thapü tankih: “Nüsa sunglo ching tümü kheahpü yükhea? apungnü dangchi yüna niungniungshihkhi kheahpü a shi?

²⁵Judü yungsho, nüsa tümü kheahpü yükhea? Khimmih athünak yihkhi mihtsürü a shi? Kheahang, shoto khimmih yihrü tüsho müthangmüsün ching larü kiulongthsürü-yambo ching lah.

²⁶Tüshe nüsa tümü kheahpü yükhea? Wukihrü khülang a shi? Am, inü nüsa ki thaanü, wukihrü kheaknü alübe ah.

²⁷Api dünkheak ha thrüta lah: ‘Kheahang, inü I yunithsürü nü limro thsakhampü nü müngüh yüshihchoh.’

²⁸Inü nüsa ki thachoh, aliberübonü azübekhi bolung Johan kheaknü atobe she müla; tütüshe shepü Thrünpuh kiulongthsü ching aninibeanü api kheaknü atobe ah.”

²⁹Küyimki arünü ha sokhea, mihtsürü alala tüsho ruk-threrübonü Thrünpuh alim mütsana lu, tümütüsho arübo ju Johannü baptijihkheah;

³⁰Tüshe Pharisirü tüsho yakzan thsangyurübonü arü thsungkheak Thrünpuh lümkhi bahyuk, tümütüsho arübo a Johannü mübapti.

³¹Jisunü mutuklode tha, “Ha lün mihtsürü inü tümü kheak akeba, tüsho arü tümü kiphahla?

³²Arü ju yinzüyindopung ching binkhi tüsho khülangnü khülang ki jiachihkhi azürübo nangde lah, ‘Isanü nüsa ki khungpi khungdo, tüshe nüsanü mütsün; isanü tüzhodo, tüshe nüsanü mütrip.’

³³Tümüde Johan Baptijihbuhnü yikhap mütsühde tüsho yukhu muyungde arü, tüsho nüsanü thachoh, ‘Api amünean me lah.’

³⁴Mihtsürü Tsührü yimtsühde tüsho yungde arü; tüsho nüsanü thachoh, ‘Kheahang, bukchihrü tüsho amüshangrü, ruk-threrü tüsho aneakrübo müyamrü!’

³⁵Tüshe lümlung ju anihbe tsührübo hode alim mütsanchoh.”

³⁶Pharisirü khülangnü anihbuh lung yimtsühpü api ki keo, tüsho apinü Pharisibuh yam ching ju yüzahbah dükhüm ki bin.

³⁷Tüsho kheahang, kiuto liberü aneakrü khülangnü küyimki api Pharisibuh yam ching dükhüm ki binlah de asokheanü rhümthüneabe, lunglangpung khülang lubah arü,

³⁸tüsho alibenü api dunglim ajing ki tripde zhipbah achikenü ajing pangjihpü tankih. Jushu alibenü akuyünü nanjihbah ajing kheak müthsüp tüsho rhümthüneabe bukkihjih.

³⁹Küyimki api jiyukbuh Pharisirünü ju ngükhea, apinü aküdah thsüde tha, “Ha mihtsürü wukihrü thsüla lasho, api qiude alakhi aliberü ju küdürüanü apinü mükheah-a labeah, tümüde alibe ju aneakrü ah.”

⁴⁰Tüsho Jisunü api ki alojihde tha, “Simon, inü nü ki tümüanü athapü lah.” Apinü alo, “Ju tümü a, Thsangyurü?”

⁴¹Shonip-jihrü khürü shozüngrü mahne lakheah; khülangnü api ki shotoyinchi 500, tüsho püpürünü 50 züng.

⁴²“Küyimki anenü müshakkhukkhea, apinü ane chido ki bahjih. Kheakü ane shepünü api ki alü muzhoba?”

⁴³Simonnü alo, “Inü alümkhia, apinü ahihbe bahjihbuh labah.” Tüsho apinü anihbuh ki tha, “Nü dükdü ah.”

⁴⁴Jushu alibe kilim anguhde apinü Simon ki tha, “Nünü ha liberü ngücho shi? I nü yam ching azahdo, nünü I jing müsühpü ke müjih, tüshe alibenü achikenü I jing pangbah akuyünü nanjih.

⁴⁵Nünü I mümüthsüp, tüshe I azahkhi kimnü ründe alibenü I jing müthsüppü mutuklo.

⁴⁶Nünü I ku kheak müdangke mümujujih, tüshe alibenü rhümthüneabenü I jing mujujih.

⁴⁷Jumonü inü nü ki thachoh, anihbe neak hihde alakhi bahjihdo, tümüde alibenü khide muzhodo; tüshe shepü anikhüh neak bahjihkheanü anikhüh muzhochoh.”

⁴⁸Tüsho apinü alibe ki tha, “Nü neakbo bahjihdo.”

⁴⁹Judüki api lung dükhüm ki binrünü arü bolung thaachih, “Neakbo yamnü bahcho ha she a?”

⁵⁰Tüsho apinü alibe ki tha, “Nü yo akinnü nü khümkhitdo; mungtsü chingnü tsoang.”