Read Yimchungru Naga Luk 9 Bible Online

Luk 9 - Yimchungru Naga bible

Luk 9

¹Judüki apinü jingyanrü thürükheak mahne rukhüh jimukhung tüsho arü kilim amünean mebo alala kurungkheak tüsho tukthsürübo thsüngupü wu tüsho thiyukhümsühmüh jih.

²Apinü arübo Thrünpuh kiulongthsü thsangyuthsangrapü tüsho tukthsü thsüngupü yüshih.

³Tüsho apinü arü ki tha, “Hantsah thsungkheak tsobo yungsho qiuqiu yungsho yikhap yungsho sho tümü dühan; pangkhümpü she alü dühan.

⁴Nüsa thüyam kürü ching yüzahbanü ju ching binang tüsho ju chingnü chamachihang.

⁵Tüsho sherünü nüsa müleangkhibanü, ju kiuto chingnü nüsa wukhiukchoki arü azhihkhi amütsan nüsa jing kheak yo asungthulung adankhia bahang.”

⁶Jumonü arünü chamachih tüsho kiutobo hode thiyusheak-atsü thsangyuthsangrade tüsho alala ching thsüngude yü.

⁷Kheakü Galilee yakzanshuhbuh Herodnü apinü arhimokhi alala so; api yingyingde alakheah, tümütüsho Johan ashekhi chingnü arhang kamloa lah de khürünü tha,

⁸khürünü Elija akhiuka lah de tha, tüsho püpürünü adüso wukihrü bolung khülang arhang kamloa lah de tha.

⁹Tüsho Herodnü tha, “Inü Johan ku lipshakdo, tüshe inü harü sobuh ha she a?” Tüsho apinü anihbuh shorupü mürang.

¹⁰Küyimki amüsüh-thsangyurübonü alode arükheanü arünü arhimokhi alala api ki thaa huh. Tüsho apinü arü bea lubah Bethsaida kiuto yo azhik dangpung ching mükhingde yü.

¹¹Tüshe küyimki botonü ju mükheahkhea, arünü api dunglim yan; apinü arü leangkhi tüsho Thrünpuh kiulongthsü dünkheak thade athsüngupü yihnüpü larü thsüngujih.

¹²Küyimki arelim kamkhea, jingyanrü thürükheak mahne arübah api ki tha, “Arübo mühi kiutobo tüsho lomi ching yübah binkheamde tsühyungbe ngüshihpü thsüde boto thiyia tsoshang; tümüde isa ha azhik dangpung ching lah.”

¹³Tüshe apinü arü ki tha, “Nüsanü arü kilim atsühpü tümükhüh jihang.” Tüsho arünü tha, “Isanü yübah harü mihtsürü alala thsungkheak tsühyungbe muthulosho, yikhap 5 tüsho thüngüh 2 kheak hode müla.”

¹⁴Tümüde ju ching athrürü 5000 bande alakheah. Tüsho apinü ajingyanrübo ki tha, “Khunung thünim thünimnü thsübah arü binshang.”

¹⁵Arünü junangde thsü, tüsho arü alala binshih.

¹⁶Judüki apinü yikhap 5 tüsho thüngüh 2 ju lubah thüning lim abinkih-a kheahde makshe jih tüsho yihnakbah boto ahiuhshihpü jingyanrübo kilim jih.

¹⁷Junangde arü alala tsühbah bukthsü, tüsho arünü adütre aningkhi muluk 12 hanmukhung.

¹⁸Api alangzü tamkhüntamnüde alachoki, ajingyanrübonü api lung arü, tüsho apinü arü ki keokhide tha, “I she ah de botobonü thacho?”

¹⁹Jumonü arünü api ki alojihde tha, “Johan Baptijihbuh, tüshe khürünü Elija de thachoh; tüsho püpürünü adüso wukihrü bolung khülang arhang kamloa lah de thachoh.”

²⁰Apinü arü ki tha, “Tüshe I she ah de nüsanü thacho?” Peternü alode tha, “Thrünpuh yo Khrista ah.”

²¹Tüsho apinü ha she ki müthapü müküpde tha.

²²Tüsho apinü tha, “Mihtsürü Tsührü khide thsünübah, tüsho azothsürübo le amükeam putungrübo tüsho yakzan thsangyurübonü bahyukde alaksahbah tüsho nimung mahsam nipü arhang kamlobah.”

²³Judüki apinü arü alala ki tha, “Khürünü I dunglim arünesho api küdah thsüde danyukbah nimung aban nihbuh sangkim shuh-a hanang, tüsho I dunglim yanang.

²⁴Tümütüsho shepünü nihbuh rhangdung khümkhitbanü ju adükheakbah, tüshe shepünü I dünkheaknü nihbuh rhangdung dükheakchonü ju akhümkhitbah.

²⁵Tümütüsho mihtsürü khülangnü alomiküp athrünkhi alü thsüa lubah nihbuh thsümünima yungsho dükheaka lasho api tümü alü la?

²⁶Tümüde shepünü I dünkheak achihchonü, Abuh, amüsüh yunirübo tüsho api müretahkhi ching arüchoki Mihtsürü Tsührünü api dünkheak achihbah.

²⁷Tüshe inü nüsa ki atsütsünü thaanü, ha ching zhipde alarü khürü a arünü Thrünpuh kiulongthsü müngüyi khiungde müshede alabah.”

²⁸Tüsho harü thabah nimung tizheah dunglim, apinü Peter, Johan, tüsho Jakob bea lubah tamkhüntamnüpü awung lim yü.

²⁹Tüsho api tamkhüntamnüde alachoki, miro müthriabah, tüsho api khimmihbo müyedo tüsho zhingzhing kam.

³⁰Judüki mihtsürü mahne Mosa tüsho Elija nangde api ki asukachih,

³¹api müretahkhi ching akhiuk tüsho Jirusalem ching dünjipü api chamachihpü dünkheak asuk.

³²Tüshe Peter tüsho api lung berübo yapshea lakheah; tüsho küyimki arü tsüde müsükhea, arünü api müretahkhi tüsho api lung zhipkhi mihtsürü mahne ngü.

³³Tüsho arübo api kinü chamachihchoki, Peternü Jisu ki tha, “Atungpuh, isa ha ching lapü tsülah; tüsho isanü nü le Mosa tüsho Elija thsungkheak abande khimyam mahsam thsanü” — apinü tümü thachonü mümükheahde alakheah.

³⁴Apinü ha thade alachoki, amo arübah arü liudo; tüsho arü amo ching yüzahchoki trede alakheah.

³⁵Judüki amo chingnü düsheak akhiukde tha, “Ha inü mokhitkhi I tsührü ah. Api ki aniang!”

³⁶Tüsho küyimki düsheak arün thsükheanü Jisu zangrü ngü. Tüshe arünü zhikde la, tüsho ju khip arünü angükhi she ki mütha.

³⁷Ashidopü küyimki arü awung chingnü akikhea, yimto atonü api shoru.

³⁸Zukleangnü boto chingnü mihtsürü khülangnü zhide tha, “Thsangyurü, inü nü ki mushuchoh, I tsührü kheak kheahang, tümüde api I tsührü lapkhiung ah.

³⁹Tüsho kheahang, amünean menü api rama lah, tüsho zukleangnü arungchoh; junü api zünga adanchoh, junangde amün ching mükeke rhukrhukchoh. Hanü api arothsünnü bahkhichoh.

⁴⁰Jumonü inü nü jingyanrübo ki ju yankhitpü mushu, tüshe arünü mukuk.”

⁴¹Judüki Jisunü alojihde tha, “O akin mülakhi tüsho lakshilim asahkhi lün, külokhüh I nüsa lung laba tüsho nüsa lung arümkheamba? Nü tsührü ju ha kheak bede arang.”

⁴²Api arüde alachoki amünean menü api züngde shuh-a adan, judüki Jisunü amünean me thürühbah azübuh ju thsüngu, tüsho abuh kilim jihlo.

⁴³Tüsho Thrünpuh wüntremüretah dünkheaknü arü alalanü müyinsah. Tüshe Jisunü arhimokhi alala kheak mihbüm abannü müyinsahchoki, apinü ajingyanrübo ki tha,

⁴⁴“Harü yubo nüsa nükhünbo ching yüzahshang, tümüde Mihtsürü Tsührü ju mihtsürübo khah ching yukjihpü thsüchoh.”

⁴⁵Tüshe ha thakhi arünü manikhit, tüsho ha arü kheaknü rama lakheah, junangde arünü müramkhit; tüsho ha dünkheak api ki keopü arünü trede alakheah.

⁴⁶Judüki arü bolung shepü atobe a de atsangachih akhiuk.

⁴⁷Tüsho Jisunü arü mulong ching lümkhi mükheahbah azürü nunu bea lubah api ki zhipshih,

⁴⁸tüsho arü ki tha, “Shepünü I mung chingnü ha azürü nunu leangkhichonü I leangkhichoh; tüsho shepünü I leangkhichonü I arüshihbuh leangkhichoh. Tümüde nüsa bolung shepü aninibeanü atobe ah.”

⁴⁹Judüki Johannü alode tha, “Atungpuh, isanü khürü nü mung chingnü amünean mebo yankhitde ngü, tüsho isanü api yanlodo tümütüsho apinü isa lung yande marü.”

⁵⁰Tüshe Jisunü api ki tha, “Api düyanlo, tümüde shepünü nüsa mazhihnü nüsa kilim lah.”

⁵¹Küyimki api yinmi lim bede yükihpü kim khiungkhea, apinü mulong pungkhibah Jirusalem lim yü,

⁵²tüsho api müngüh yunithsürübo yüshih. Arü yüde alachoki, arünü api thsungkheak thsakhampü Samaria kiulong ching yüzah.

⁵³Tüshe arünü api mübeyuk, tümütüsho api ju Jirusalem lim yüde alakheah.

⁵⁴Küyimki api jingyanrübo Jakob tüsho Johannü ha ngükhea, anenü tha, “Atungpuh, Elijanü arhimokhi nangde isanü yinmi chingnü mo jikhibah arübo takabahshihpü mulongla shi?”

⁵⁵Tüshe Jisunü rholobah arü thürüh.

⁵⁶Tüsho arünü kiulong püpü ching yü.

⁵⁷Arünü limro ching hantsahde alachoki, khürünü api ki tha, “Atungpuh, nü kürü ching yübanü inü nü yanbah.”

⁵⁸Tüsho Jisunü api ki tha, “Rimrebo arü khünbo lah tüsho thüning wuhnubo arü sapbo lah, tüshe Mihtsürü Tsührü a küching she kurampung müla.”

⁵⁹Judüki apinü püpürü ki tha, “I dunglim yanang.” Tüshe apinü tha, “Atungpuh, akhuhde inü yübah I buh kiuyuka bahanü.”

⁶⁰Jisunü api ki tha, “Asherünü asherü kiuyuka bahshang, tüshe nünü yübah Thrünpuh kiulongthsü thsangyuthsangraang.”

⁶¹Tüsho püpürünü tha, “Atungpuh, inü nü yanbah, tüshe akhuhde yübah I yam ching larü ki chode thaanü.”

⁶²Tüshe Jisunü api ki tha, “Shepünü khin ching wochakde zhipbah dunglim rholoa kheahchonü Thrünpuh kiulongthsü tankihpü müthülün.”