Read Yimchungru Naga Yuzüng 10 Bible Online

Yuzüng 10 - Yimchungru Naga bible

Yuzüng 10

¹“Judüki ATUNGPUHNÜ I ki tha, Akhuhlim nangde nünü lungbeak mahne phukang, tüsho I kilim müzüng ching atuang. Kheaküshe nünü sangdan khülang thsüang.

²Tüsho nünü adannakkhi lungbeakbo kheak kihkhi yu inü lungbeakbo kheak thrütkihbah; tüsho nünü ju ne sangdan ching yukbah.

³“Jumonü inü akasia sangnü sangdan thsü tüsho akhuhlim nangde lungbeak mahne phuka lu tüsho ju ne I khah ching shuhbah müzüng ching wutu.

⁴Tüsho müzüng ching mukhung nimung ATUNGPUHNÜ mo chingnü nüsa ki thakhi thiyuzüng thürü akhuhlim thrütkhi nangde apinü lungbeakbo kheak thrütkih; tüsho ATUNGPUHNÜ ju I kilim jih.

⁵Jushu inü rholobahle müzüng chingnü aki, tüsho lungbeakbo ju inü athsükhi sangdan ching yuk; tüsho ATUNGPUHNÜ I ki thiyukhüm jihkhi nangde jurübo ju ching lah.”

⁶(Kheakü Israelrübo Bene Jaakan kekhipbo chingnü tsahmusubah Mosera ching yü. Ju ching Aron shekheah tüsho kiuyukabah; tüsho atsührü Eleazarnü api müthri amükeamrü thsüde tankih.

⁷Ju chingnü arü Gudgoda ching yü tüsho ju chingnü ayung lakhi lo Jobatha ching yü.

⁸Judüki ATUNGPUH tangzüng sangdan shuhbahle api miki zhipde atankihpü tüsho api mungshide khihni ha nangde alashihpü ATUNGPUHNÜ Levirü trük büthsüde mokhit.

⁹Jumonü Levirü trük a keoniorü bolung shihcham yungsho yamrüplurüp müla; A TUN GPU H nüsa Thrünpuhnü arü ki alokhikhi nangde ATUNGPUH ju lang arü yamrüplurüp thsübah.)

¹⁰“Akhuhlim rhimokhi nangde, inü müzüng ching nimung yirü tüsho tsüngre yirü mung; ju kim ching she ATUNGPUHNÜ I ki anijihdo, tüsho apinü nüsa dükheakshihpü mumulongde kam.

¹¹Tüsho ATUNGPUHNÜ I ki tha, Asürang, mihtsürübo müngüh hantsahmusuang, junangde arü kilim jihpü inü nüsa jipürü ki thiyuchihchimkhi lo ching arünü yübah alubah.

¹²“Tüsho kheakü, O Israel, ATUNGPUH nü Thrünpuhnü nü kheaknü tümü kheangcho, tüshe ATUNGPUH nü Thrünpuh wüntreang, api limrobo ching tsahpü tüsho api muzhopü ATUNGPUH nü Thrünpuh nü mulong tüsho nü me athrünkhinü atankihpü,

¹³tüsho nü tsüpü thsungkheak khihni inü nü jihkhi ATUNGPUH yukhümbo tüsho api yakzanbo anide arhimopü?

¹⁴Kheahang, thüning tüsho yinmi bolung yinmi, alomi tüsho ju ching lakhi athrünkhi ATUNGPUH nü Thrünpuh yo ah.

¹⁵Tüshe khihni lakhi nangde ATUNGPUHNÜ nüsa jipürü kheak mulong keamde muzho tüsho apinü arü tsührü-tsührübo, nüsabo trükshih alala kurungkheak mokhit.

¹⁶Jumonü nüsa mulong tsütabahang, tüsho kheaküa nihnihde düla.

¹⁷Tümüde ATUNGPUH nü Thrünpuh ju thrünpuhbo kurungkheak Thrünpuh tüsho atungrübo kurungkheak ATUNGPUH , ato Thrünpuh wu ato tüsho atrebe, shepünü jak mükheah tüsho buknim müleangkhicho,

¹⁸apinü mürerü tüsho khimoberü thsungkheak thiyuro rhimochoh, tüsho tsotsahrü muzhode, arü kilim tsühyungpü tüsho khimmih jihchoh.

¹⁹Tüsho nüsanü tsotsahrü ki muzhoang, tümütüsho nüsabo khülang ki Ijip ching tsotsahrü lakheah.

²⁰Nünü ATUNGPUH nü Thrünpuh wüntreang tüsho api tankihang. Api kheak düngdüngde ramrihang tüsho api mung chingnü thiyuchihchimang.

²¹Api ju nünü mungshi jihpü lah, tüsho api ju harü ato tüsho atrebe rhimobo nü müknü ngüde arhimokhi nü Thrünpuh ah.

²²Nüsa jipürü mihtsürü 70 Ijip lim yüki, tüsho kheakü ATUNGPUH nüsa Thrünpuhnü nüsa thüning ching chiningbo nangde hihde kamshih.