Read Yimchungru Naga Yuzüng 13 Bible Online

Yuzüng 13 - Yimchungru Naga bible

Yuzüng 13

¹“Nüsa bolung chingnü wukihrü khülang yungsho milim müchitrü akhiukbahle apinü nüsa ki amütsan yungsho khinthiyinbe jihsho,

²tüsho apinü nüsa ki amütsan yungsho khinthiyinbe thakhi dünjisho tüsho isanü püpürü thrünpuhbo nüsanü mümükheahkhi dunglim yananü, tüsho arübo tankihanü de thasho,

³nüsanü wukihrü yungsho milim müchitrü ki dani, tümüde atsütsü nüsanü ATUNGPUH nüsa Thrünpuh mulong alalanü tüsho me alalanü muzhola shi yungnü ju mükheahpü ATUNGPUH nüsa Thrünpuhnü nüsa rükakichoh.

⁴Nüsanü ATUNGPUH nüsa Thrünpuh dunglim tsahang tüsho api wüntreang, tüsho api yukhüm yande api düsheak aniang, tüsho nüsanü api tankihde api kheak düngdüng ramrihang.

⁵Tüshe wukihrü yungsho milim müchitrü ju asheshihbah, tümütüsho apinü ATUNGPUH nüsa Thrünpuh shepünü nüsa Ijip chingnü bekhit tüsho azhorü yamkhün chingnü rhokhitkhea, apinü thiyukhüm jihkhi limro chingnü tüsho api kheaknü chamkhide atsoshihpü nüsa ki thado. Junangde nüsanü amütsü rhimo nüsa bolungnü yihkhita bahang.

⁶“Nü khiung, nü be tsührü, nü tsührü yungsho tsührübe, nünü amuzhokhi yamkhünberü yungsho nü ki mulong khülang thsükhi müyamrünü nü bephülappü thsüde hade thasho, Isanü yübah püpürü thrünpuhbo tankihanü, shepü nü tüsho nüsa jipürünü mümükheah,

⁷nüsa phünide yungsho limshude alarü alomi akheam thripkhühnü khülim khiungkhi mihtsürü thrünpuhbo lanü,

⁸nünü api jude düthsüshih, yungsho api ki dani, yungsho api kheak muzhode dükheah, yungsho api daningshih yungsho api dütsungdo;

⁹tüshe nünü dükde api laksahbah; api sheshihpü api azhihde akhuhde nü khah chungbah, tüsho jushu mihtsürü alala khah jipkihbah.

¹⁰Tüsho nüsanü api lungnü arusahbah, tümütüsho apinü ATUNGPUH nü Thrünpuh shepü hode Ijip lo tüsho azhorü yamkhün chingnü abekhitkheanü, api kheaknü bephülapde atsopü rük yim.

¹¹Jumonü Israelrü alalanü asobah tüsho wüntrebah, tüsho hadürü amütsü rhimo küyimkishe mürhimolo.

¹²“ATUNGPUH nüsa Thrünpuhnü nüsa lashihpü jihkhi lo ching kiuto khürü ching nüsanü sosho,

¹³junangde isanü yüanü tüsho nüsanü mümükheahkhi püpürü thrünpuhbo tankihanü de thade athsümünim mihtsürü khürü nüsa bolungnü yübah kiutobo ching larü mihtsürübo bephülapa lasho,

¹⁴nünü tsüde phüzüphüdode yimkhitang, tüsho düshihde keokhiang. Tüsho atsütsünü nüsa bolung khürünü hadürü athraneanbe yihbeaka lasho,

¹⁵tsükjide nüsanü kiutobo ching larü nuknü alaksahbah — ju ching lakhi alala tüsho akam-shiwühbo alala nuknü alaksahkhambah.

¹⁶Tüsho nüsanü ayankhikhi kukrukbo limro phulung shuhmukhunga zoang, tüsho kiuto le ayankhikhi kukrukbo ATUNGPUH nüsa Thrünpuh thsungkheak monü takang; ju lünnü mujunga labah tüsho küyimkishe müthsülo.

¹⁷Jumonü nüsa shepünü she muthrumüneankhi kukruk nüsa khah ching aninga düzo, junangde ATUNGPUHNÜ api bukakhiukkhi chingnü atuklobah tüsho nüsa ki mihmüthsüm huhbah, nüsa kheak muzhobah tüsho apinü nüsa jipürü ki thiyuchihchimkhi nangde nüsa wüh bubah,

¹⁸tümütüsho inü khihni nüsa ki api yukhüm jihkhi ATUNGPUH miki alungki rhimopü ATUNGPUH nüsa Thrünpuh düsheak nüsanü anido.