Read Yimchungru Naga Yuzüng 17 Bible Online

Yuzüng 17 - Yimchungru Naga bible

Yuzüng 17

¹“Nünü ATUNGPUH nü Thrünpuh ki lapha kihkhi moshipung yungsho namfimihnununü dükingaün, tümüde ju ATUNGPUH nü Thrünpuh kilim athraneanbe lah.

²“ATUNGPUH nü Thrünpuhnü ajihkhi chipimurungbo khüp athrürü yungsho aliberü khürünü api ki tangzüngkhi thsümünimde ATUNGPUH Thrünpuh miki amütsü rhimokhi ngüsho,

³shepünü tsode yünü püpürü thrünpuhbo tankihde inü thiyukhüm müjihkhi ani, khinu yungsho thüning kheak lakhi khürü kingaünbanü;

⁴tüsho ju nü ki thabahle nünü sosho, nünü ju atsüngalim thsüde yima kheahang. Tüsho ju thiyuro thsüa lasho tüsho hadürü athraneanbe Israel ching dükde yihbeaka lasho,

⁵nünü amütsü rhimorü athrürü yungsho aliberü ju nüsa chipimurungbo ki bede akhiukang, tüsho lungnü rusahang.

⁶Shepü ashepü thülünlanü mahne yungsho mahsamnü thiyumütsan jihkhi hode asheshihbah tüshe thiyumütsan khülang hodünü a api müsheshih.

⁷Api sheshihpü thsungkheaknü thiyumütsan jihrünü akhuh khah chungbah, tüsho jushu mihtsürübonü khah chungbah. Junangde nüsanü amütsü mihtsürü nüsa lungnü yihkhita bahbeah.

⁸“Nüsa thsungkheaknü mahkhappü chakde dünjisho, lakhitkukruk alim dünkheak yungsho thiyih bukkhi tüsho mihtsürü laksahkhi, küyimki hadürü dünjibanü ATUNGPUH nüsa Thrünpuhnü amokhitkhi kingaünpung ching yüang,

⁹tüsho nüsanü ju Levirü amükeamrü tüsho ju kim ching rhimoyam ching lakhi mahkhaprü ki keokhiang, tüsho arünü ju dünkheak mahkhapshang.

¹⁰ATUNGPUHNÜ amokhitkhi dangpung ching arünü nü ki mütsande athakhi yande nünü kümkangde rhimoang.

¹¹Arünü yakzan yu mütsande nüsa ki thsangyukhi tüsho mahkhapkhi yande nüsanü rhimoang; nüsanü tsülim yungsho huzulim anguhde nüsa ki thakhi kheaknü dütso.

¹²Khürünü mahkhaprü yungsho ATUNGPUH nüsa Thrünpuh tankihrü amükeamrü ki mihyumanide azhihsho api asheshihbah; hanangde nüsanü amütsürü Israel chingnü yihkhita bahang.

¹³Judüki mihtsürü athrünkhinü ju sobahle atrebah tüsho shenü she arhimolopü mümürang.

¹⁴“Küyimki nüsanü ATUNGPUH nüsa Thrünpuhnü ajihkhi lo ching arübah müküh-a labanü, tüsho isa mühirü trükshihbo nangde isa kurungkheak kiulongthsürü zobah de athabanü;

¹⁵nüsanü tsükjide ATUNGPUH nüsa Thrünpuhnü amokhitkhi kiulongthsürü nüsa kurungkheak mokhitbah; nüsa keoniorü bolungnü khülang nüsa kurungkheak nüsanü kiulongthsürü mokhitbah; nüsanü keoniorü yungde khiungkerü khülang nüsa kurungkheak kiulongthsürü dümokhit;

¹⁶tüshe kiulongthsüpuhnü anihbuh bonungrü thsungkheak khora hihde mubushihbeah, tüsho apinü mihtsürübo khora thulopü Ijip ching müyüshihbeah, tümütüsho api mihtsürü küyimkishe ju ching alode müyüshihpü ATUNGPUHNÜ thado.

¹⁷Apinü niuberü ahihdo muzobeah, jude yungsho api mulong ATUNGPUH kheaknü chamkhide atsobah; yungsho apinü shotoyinchi le suna hihde muzobeah.

¹⁸Küyimki api kiulongthsürü binkiu kheak binbanü Levirü amükeamrübonü azokhi Thrünpuh yakzan tüsho thsangyukhi hüm chingnü anihbuh thsungkheak shihküp kheak thrütkih-a zobeah.

¹⁹Tüsho ju api ki labah tüsho apinü ju api rhangdung amuyung khebah, junangde apinü ATUNGPUH api Thrünpuh wüntrepü mükheahbah; tüsho kümkangde ha yakzan tüsho thiyuzüngbo yande arhimobah.

²⁰Junangde apinü nihbuh keoniorü kheaknü api atsübe ah de mülüm, tüsho thiyukhüm chingnü tsülim yungsho huzulim manguh tüsho Israelrü bolung api kiulongthsü ching api tüsho tsühsoniusobonü lün ahihdo yakzan shuhbah.