Read Yimchungru Naga Yuzüng 18 Bible Online

Yuzüng 18 - Yimchungru Naga bible

Yuzüng 18

¹“Levirü amükeamrübo, tüsho Levi trük alala Israel lung yamrüplurüp müla; arünü ATUNGPUH kilim monü taka kingaünkhi tüsho api shihcham tsühbah.

²Jumonü keoniorü lung arü yamrüplurüp müla; apinü arü ki thakhi nangde ATUNGPUH ju arü yamrüplurüp thsübah.

³“Tüsho mihtsürübonü moshipung yungsho namfimihnu kingaünchoki amükeamrü kilim ha jihbeah: arünü amükeambuh kilim adubuh, shihnupung tüsho bukning jihbah.

⁴Nüsanü hi akhuh asokhi yukhu aso, oliv müdangke tüsho namfimihnu nam akhuh rukkhi api kilim jihang.

⁵Tümüde ATUNGPUH nüsa Thrünpuhnü api le atsührübo ATUNGPUH mung ching lünnü atankihshihpü nüsa trük alala bolungnü mokhitdo.

⁶“Tüsho Levirü khülangnü Israel ching nüsa kiuto khürü ching api lapung chingnü arüsho, apinü amulongkhi kim ching ATUNGPUHNÜ amokhitkhi dangpung ching arüpü kuklah,

⁷tüsho apinü amüyamrü Levirünü ATUNGPUH miki tankihkhi nangde api Thrünpuh ATUNGPUH mung ching tankihpü kuklah.

⁸Arübo shihcham rukhühnü atsühbah, tüshe anihbuh betsührünü yamrüplurüp yinbah amühahkhi apinü azobah.

⁹“Küyimki nüsa ATUNGPUH nüsa Thrünpuhnü ajihkhi lo ching arübanü, harü trükshihnü athraneanbe rhimokhibo kheahkhipü dümükheah.

¹⁰Nüsa bolung ching shenü she nihbuh tsührü athrürü yungsho aliberü mo ching mütakbeah, yungsho rük-thümü, müchitrü, khinzungrü, akeangrük huhrü,

¹¹rükyu tharü, mesherü, me asukachihrü yungsho asherü jirü mülabeah.

¹²Tümüde sherünü harü alala rhimochonü ATUNGPUH kilim athraneanbe lah, tümütüsho harü athraneanbe dünkheaknü ATUNGPUH Thrünpuhnü arübo nüsa müngühnü yankhita bahchoh.

¹³Nüsanü A TUN GPU H nüsa Thrünpuh miki thiyuro laang.”

¹⁴Tüsho Mosanü tha, “Nüsanü amükühpü lakhi ching larübonü müchitrü tüsho rük-thümürü ki anichoh; tüshe nüsa kilim a ATUNGPUH nüsa Thrünpuhnü hadürü rhimopü mümülü.

¹⁵ATUNGPUH nüsa Thrünpuhnü nüsa thsungkheak wukihrü I nangde nüsa tüsho keoniorü bolungnü akhiukshihbah. Nüsanü api ki anibah.

¹⁶“Nüsa Horeb ching mukhung nimung nüsanü hade tha, ‘Inü ATUNGPUH I Thrünpuh düsheak musolonü yungsho ha mo ato müngülonü, jude yungsho I ashebah.’

¹⁷Tüsho ATUNGPUHNÜ I ki tha, ‘ Arübonü tümü thadünü dükdü ah,

¹⁸Inü arü keoniorü bolungnü nü nangde wukihrü khülang akhiukshihbah tüsho api mün ching I yu yukjihbah, tüsho inü api ki thiyukhüm jihkhi alala arü ki thabah.

¹⁹Tüsho I mung ching apinü athakhi I yubo sherünü manibanü inü jurü thsümüchibah.

²⁰Tüshe wukihrü shenü mükheahlah de lümbah I mung chingnü inü thiyukhüm müjihkhi yungsho püpürü thrünpuhbo mung ching thabanü ju wukihrü ashebah.’

²¹“Tüsho nüsanü athabah, ‘ATUNGPUHNÜ müthakhi yu isanü küde thsah mükheahpü?’

²²Küyimki wukihrü khülangnü ATUNGPUH mung ching thabah ju müdünjibanü ju ATUNGPUHNÜ müthakhi ah; wukihbuhnü ju lümkangyu thado; nüsanü api dütre.