Read Yimchungru Naga Yuzüng 19 Bible Online

Yuzüng 19 - Yimchungru Naga bible

Yuzüng 19

¹“ATUNGPUH nüsa Thrünpuhnü küyimki nüsa kilim jihkhi lo ching larü dükheakshihbanü tüsho nüsanü arü yankhita bahbah arü kiuto tüsho thüyambo ching labanü,

²küpü ATUNGPUH nüsa Thrünpuhnü nüsa lashihpü jihchonü nüsa lo phulung ching kiuto mahsam nüsa thsungkheaknü akhua zoang.

³Nüsanü limrobo thsakhamang, tüsho ATUNGPUH nüsa Thrünpuhnü nüsa kilim yamrüplurüp jihkhi lo ju kiuto bede shihcham mahsam thsüde chamang, junangde mihtsürü laksahrü ju ching tsoyukbah.

⁴Tüsho ha mihtsürü laksahrü thsungkheaknü shepü ju ching tsoyukbanü api rhangdung labah: Shepünü nihbuh yamhingrü püpüki mükheahnede mülade müranglimnü alaksahbanü —

⁵thiyuthiyu, küyimki mihtsürü khülang ayamhingbuh lung sang rhippü murung ching yübanü, tüsho sang kiushakpü akhah ching shuhkhi awü ju ajua akhiukbah yamhingbuh kheak kingbah api ashebanü — apinü ha kiuto bolung khülang ching tsoyukbah tüsho rhangdung labah;

⁶jude yungsho ashebuh buhtsührünü api bukakhiukkhi hode mihtsürü laksahbuh ju müshamde yübah atholobah, tümütüsho limro shulah, tüsho apinü püpüki mükheahnede mülale ashepü müthülüna lalashe api alaksahbah.

⁷Jumonü nüsanü nüsa thsungkheak kiuto mahsam akhua zoang de inü thiyukhüm jihchoh.

⁸“Kheakü nüsa jipürü ki thiyuchihchimkhi nangde ATUNGPUH nüsa Thrünpuhnü nüsa lomi tode kamshihsho tüsho apinü nüsa jipürü kilim jihpü alokhikhi lo nüsa kilim jihsho,

⁹tüsho inü khihni nüsa kilim jihkhi yukhümbo anide ATUNGPUH nüsa Thrünpuh muzhosho tüsho kamruhroro api limro ching tsahsho, nüsa thsungkheaknü kheaküshe harü kiuto mahsam lung kiuto mahsam yukajakbah,

¹⁰junangde ATUNGPUH nüsa Thrünpuhnü nüsa kilim yamrüplurüp jihkhi lo ching amülim mükihrü thiyih mubuk, hanangde thiyih bukkhi neak nüsa kheak müla.

¹¹“Tüshe khürünü yamhingrü mükheahnede api jimde zhipbah kinga dükhekhi hode api shesho, tüsho api harü kiuto khülang ching tsoyuksho,

¹²api kiuto azothsürübo thiyia yüshihbah ju chingnü api bede arübahle royimrü ashebuh buhtsührü khah ching yukjihbah, junangde api ashebah.

¹³Nünü dümuzho, tüshe nünü amülim mükihrü thiyih bukkhi neak Israel chingnü yihkhita bahang, junangde nüsa kheak tsüde alabah.

¹⁴“ATUNGPUH nü Thrünpuhnü nü kilim yamrüplurüp jihkhi lo ching adüso ashinbuhrübonü akhimkhi nü yamhingrü aredung dülukakhin.

¹⁵“Mihtsürü khülangnü amülim rhimokhi yungsho neak yihbeakkhi dünkheak thiyumütsan khülangnü a api azhihde muwusu; thiyumütsan mahne yungsho mahsam hodü lang judürü dünkheak khikzhak thsübah.

¹⁶Mihtsürü khülangnü akeangmah chingnü khürü kheak amülim jihde wususho,

¹⁷rukachihne chido ATUNGPUH miki, amükeambuh tüsho judüki rhimoyam ching mahkhaprü miki zhipbah.

¹⁸Tüsho mahkhaprübonü düshihde keoa kheahbah, tüsho nihbuh keoniorü azhihde thiyumütsan jihkhi ju amülim thsüa lasho,

¹⁹apinü akeoniorü kheak rhimopü lümkhi ju nüsanü api kheak rhimoang; junangde nüsanü amütsü mihtsürü nüsa bolungnü yihkhita bahang.

²⁰Tüsho aninga larübonü sobah atrebah, tüsho ha dunglim arünü hadürü amütsü rhimo nüsa bolung mürhimolo.

²¹Nünü dümuzho; tüshe rhangdung müthri rhangdung, mük müthri mük, hü müthri hü, khah müthri khah, jing müthri jing labah.