Read Yimchungru Naga Yuzüng 24 Bible Online

Yuzüng 24 - Yimchungru Naga bible

Yuzüng 24

¹“Küyimki athrürü khülangnü niuberü lubah apinü anihbe kheak tümükhüh mümüsühde ngübah alüm müshede akambanü; tüsho apinü abahkhi mülükhi hüm thrüta akhah ching yukjihbah api yam chingnü atsoshihbanü,

²küyimki anihbe api yam chingnü chamde tsobah püpürü niuberü kambanü;

³ayamkhünbuh ashubuhnü anihbe thraneande abahkhi mülü-hüm thrüta akhah ching yukjihbah api yam chingnü tsoshihsho, yungsho ayamkhünbuh ashubuh sheabahsho,

⁴anihbe müneanabahshu a akhuh yamkhünbuh anihbe bahbuhnü aniube thsüpü mululo; tümüde ju ATUNGPUH miki athraneanbe lah, tüsho adüso nü Thrünpuhnü yamrüplurüp jihkhi lo ching nünü neak hande darü.

⁵“Küyimki mihtsürü khülang yamkhün aso thsübanü, api keochih ching müyü yungsho rhimo tümü müzhim; api kam khülang thüyam ching zuzu labah, tüsho apinü alukhi aniube asühshihbah.

⁶“Mihtsürü shenü she thiyuchihchimkhi ching thsamnü düzüng, tümüde apinü yamkhün rhangdung lapü lujihchoh.

⁷“Mihtsürü khülang akeoniorü Israelrü tsührü rama lubah atsokhi ngükhitsho, tüsho azhorü nangde api thsümüchisho yungsho yinsho, mihrambuh ju asheshihbah; tüsho nüsanü amütsü mihtsürü nüsa bolungnü yihkhita bahang.

⁸“Apham akhiukchoki kümkangang, junangde düshihde kheahyukang tüsho amükeamrü Levirünü nüsa ki thsangyukhi yande rhimoang; inü arübo kilim thiyukhüm jihkhi nangde, nüsanü kümkangde rhimoang.

⁹Nüsa Ijip chingnü akhiukchoki ATUNGPUH nüsa Thrünpuhnü limro ching Miriam ki tümü rhimokheanü ju lümkhitang.

¹⁰“Küyimki nünü yamhingrü ki tümükhüh nipjihbanü apinü thiyuchihchimkhi lupü api yam ching düyüzah.

¹¹Nü wungdo zhipbah, tüsho nünü anip-jihbuh mihtsürünü thiyuchihchimkhi nü kilim hande akhiukbah.

¹²Tüsho mihtsürü ju zhochihrü a sho, thiyuchihchimde nü ki jihkhi khimmih ching nünü düyap.

¹³Dükde ani yüzahshu api kilim thiyuchihchimkhi jihloang, junangde apinü nihbuh khimmih ching yapbah tüsho nü müngühjihbah; tüsho ATUNGPUH nü Thrünpuh miki nü thiyuro labah.

¹⁴“Nünü zhochihrü tüsho küpkhukde mulomüthsürü, nü keoniorü yungsho nüsa kiuto khürü ching lakhi khiungkerü thsüthsü, nünü arü mihkhah dün shukhishura düthsü.

¹⁵Nimung aban ani müyüzahyide nünü api mihkhah mo jihang tümüde api zhochihrü ah tüsho ju kheak api mulong dükinkihlah; jude yungsho apinü ATUNGPUH ki nü azhihde azhibah, tüsho ju nü kheak neak labah.

¹⁶“Tsührübo dünkheak buhrübo müsheshih, yungsho buhrübo dünkheak tsührübo müsheshih; nihbuh neak dünkheak mihtsürü khülang ju asheshihbah.

¹⁷“Nünü khiungkerü yungsho mürerü dünkheaknü alim düthsümünim, yungsho thiyuchihchimkhi ching khimoberü khimmih dulu.

¹⁸Tüshe nü khülang ki Ijip ching azhorü lakheah tüsho ATUNGPUH nü Thrünpuhnü nüsa ju chingnü rhokhitdo de lümkhitang; jumonü inü ha rhimopü nüsa ki thiyukhüm jih.

¹⁹“Küyimki nünü thulu ching hi yimlubanü tüsho thulu ching hi phung mihbanü, nünü ju lupü rholode düyü; ju khiungkerü, mürerü, khimoberü thsungkheak labah, junangde ATUNGPUH nü Thrünpuhnü nünü arhimokhi alala ching müngühjihbah.

²⁰Küyimki nünü oliv rhobanü, akhahbo ching dükheahlo; ju khiungkerü, mürerü tüsho khimoberü thsungkheak labah.

²¹Küyimki nünü kurungasolu chingnü kurungaso hanmukhungbanü, jushu a nünü ju lim düyülo; ju khiungkerü, mürerü tüsho khimoberü thsungkheak labah.

²²Tüsho khülang ki nü Ijip lomi ching azhorü lakheah de lümkhitang; jumonü ha rhimopü inü nüsa ki thiyukhüm jihchoh.