Read Yimchungru Naga Yuzüng 25 Bible Online

Yuzüng 25 - Yimchungru Naga bible

Yuzüng 25

¹“Mihtsürü mahne dükeak neamneamde mahkhappung ching arüsho mahkhaprünü ane dükeak mahkhapjihpü kuklah, tüsho arünü khülang alim tüsho püpü ju amülim jihbah,

²amülim mihtsürü ju alakpü thülünsho, mahkhapbuhnü api mühüplimnü ayapshihbah tüsho api kheak amülim jihkhi ayannü khede api mikinü arhapbah.

³Nünü api yirü ki rhappü kuklah, tüsho ju kheak muho, jude yungsho khürünü ju kheak hode rhapsho, nü keoniorü ju nü miki abobe kuhi ching labah.

⁴“Nünü moshipung hi nitchoki amün dürümjih.

⁵“Keoniorü mahne rukhüh labah tsührü mülade khülang ju shesho, ashebuh niubenü ju yamkhün hobah jaksorü ki mürhang; anihbe yamkhünbuh keoniorünü api lubah, tüsho ayamkhünbuh keoniorünü alibe ki rhimobebo rhimobah.

⁶Tüsho anihbenü azübekhi athrürünü akeonio ashebuh mung jimulobah, junangde api mung Israel chingnü nankhita mübah.

⁷Tüshe apinü akeonio niube ju mulunesho, anihbe chipimurung ching azothsürübo ki wutubahle thashang, ‘I niubuh keoniorünü akeonio mung Israel ching zolopü reanglochoh; apinü I niubuhnü arhimobebo I ki mürhimo.’

⁸Judüki kiuto azothsürübonü api jibahle athabah; tüsho inü anihbe mulune de düngyingde thasho,

⁹akeonio niubenü azothsürü mikinü api ki arübah ajing chingnü api jingkhümpü yihkhitbah, amiro kheak mukhiukkihbah, tüsho athabah, ‘Shepünü nihbuh keoniorü yamkhün mushuhkihbanü ju mihtsürü kheak hade arhimobah.’

¹⁰Tüsho yamkhün ju Israel ching jingkhümpü yihkhitrü de ajibah.

¹¹“Mihtsürü mahne shochihde alachoki, khülang buh yamkhünbenü aniubuh khümkhitpü thsüde api lakbuh yo kheak tholosho,

¹²nünü anihbe khah lipshakjang; nünü dümuzho.

¹³“Nünü nü qiuqiu ching adünarabe ato tüsho anini düyuk.

¹⁴Nünü nü yam ching adünarabe ato tüsho anini düzo.

¹⁵Nünü khiukdahde tüsho thiyuronü adünaraang, junangde ATUNGPUH nü Thrünpuhnü ajihkhi lo ching nü kutsüpde alabah.

¹⁶Tümüde sherünü hadürü rhimochonü, tüsho sherünü thiyuro lungki mülanü, ATUNGPUH nü Thrünpuh kilim athraneanbe lah.

¹⁷“Nüsa Ijip chingnü akhiukchoki limro ching Amalekrünü tümü nüsa kheak rhimokheanü lümkhitang,

¹⁸nüsa limro ching keaka lunga yapchoki arünü künangde nüsa dunglim larü laksahkhea; tüsho arünü Thrünpuh mütre.

¹⁹Apinü nüsa kilim yamrüplurüp jihkhi lo ching küyimki ATUNGPUH nüsa Thrünpuhnü mühirü thiriri kheaknü sühakhimshihbanü, nüsanü Amalekrü lümkhitpü thüning bukkhüp chingnü nankhita bahang; nüsanü dümih.