Read Yimchungru Naga Yuzüng 27 Bible Online

Yuzüng 27 - Yimchungru Naga bible

Yuzüng 27

¹Judüki Mosa tüsho Israel azothsürübonü mihtsürübo ki thiyukhüm jihde tha, “Khihni inü nüsa kilim thiyukhüm jihkhibo ha alala mihyuaniang.

²Tüsho küyimki nüsa Jordan hode ATUNGPUH nüsa Thrünpuhnü ajihkhi lo ching yübanü, nüsanü lung atotobo khimang tüsho müye-sungsungnü mujuang.

³Küyimki nüsa hode yübah ATUNGPUH nüsa Thrünpuhnü ajihkhi niuhke tüsho mukhuke bukkhi lomi ching nüsa jipürü Thrünpuhnü nüsa kheak thiyuchihchimkhi nangde yüzahbanü nüsanü ha yakzan jurübo kheak thrütang.

⁴Jumonü küyimki nüsa Jordan hode ayübanü khihni inü nüsa ki thiyukhüm jihkhi ha Ebal wung ching lungbo khimang, tüsho müye-sungsungnü mujuang.

⁵Tüsho ju ching nüsanü ATUNGPUH nüsa Thrünpuh ki lungnü kingaün sadam thsüang; nüsanü yinchibo tümü she düyuk.

⁶Nüsanü mükingarihkhi lungnü ATUNGPUH nüsa Thrünpuh kingaün sadam thsüang, tüsho ju kheak ATUNGPUH nüsa Thrünpuh kilim taka kingaünang.

⁷Nüsanü mungtsü kingaün jihang tüsho ju chingnü tsühang, tüsho ATUNGPUH nüsa Thrünpuh miki asühachihang.

⁸Tüsho nüsanü lungbo kheak ha yakzan khide mungode thrütkihang.”

⁹Judüki Mosa le amükeamrübo tüsho Levirübonü Israelrü alala ki tha, “O Israel, jikshe müthsüde I ki aniang: Ha nimung nüsa A TUN GPU H Thrünpuh mihtsürü kamdo.

¹⁰Jumonü nüsanü ATUNGPUH nüsa Thrünpuh düsheak aniang, tüsho inü nüsa ki khihni thiyukhüm jihkhi api yukhümbo tüsho api yakzanbo rhimoang.”

¹¹Tüsho ju nimung Mosanü mihtsürübo ki thiyukhüm jihde tha,

¹²“Küyimki nüsa Jordan hobanü mihtsürübo müngühmühi jihde Gerizim wung kheak harü zhipbah: Simeon, Levi, Juda, Issakar, Josep, tüsho Benjamin;

¹³tüsho harübo Ebal wung kheak zhipbahle muthrumüneanbah: Reuben, Gad, Asher, Zebulun, Dan, tüsho Naphtali.

¹⁴Tüsho Levirübonü düsheak achangnü Israel mihtsürü alala ki thabah:

¹⁵“‘Shepünü lung, sang tüsho yinchinü thsüa ramde kingaünchonü api muthrumünean thsang; ATUNGPUHNÜ sangthsü kingaünkhi thraneanchoh.’ Tüsho mihtsürü alalanü athabah, “Amen!”

¹⁶“‘Shepünü abuh yungsho abe ki mihyumaninü api muthrumünean thsang.’ Tüsho mihtsürü alalanü athabah, “Amen!”

¹⁷“‘Shepünü nihbuh yamhingrü arelung shuhakhinbanü api muthrumünean thsang.’ Tüsho mihtsürü alalanü athabah, “Amen!”

¹⁸“‘Shepünü müktukrü limro lakshilim bechonü api muthrumünean thsang.’ Tüsho mihtsürü alalanü athabah, “Amen!”

¹⁹“‘Shepünü khiungkerü, mürerü, tüsho khimoberü thiyuro thsungphülapbanü api muthrumünean thsang.’ Tüsho mihtsürü alalanü athabah, “Amen!”

²⁰“‘Shepünü nihbuh abuh niuberü kheak müzammürambanü api muthrumünean thsang.’ Tüsho mihtsürü alalanü athabah, “Amen!”

²¹“‘Shepünü shiwüh mungji kheak müzammürambanü api muthrumünean thsang.’ Tüsho mihtsürü alalanü athabah, “Amen!”

²²“‘Shepünü nihbuh chiniurü, abuh tsührü yungsho abe tsührü kheak müzammürambanü api muthrumünean thsang.’ Tüsho mihtsürü alalanü athabah, “Amen!”

²³“Shepünü nihbuh niube abe kheak müzammürambanü api muthrumünean thsang.” Tüsho mihtsürü alalanü athabah, “Amen!”

²⁴“‘Shepünü nihbuh yamhingrü ramde alaksahbanü api muthrumünean thsang.’ Tüsho mihtsürü alalanü athabah, “Amen!”

²⁵“‘Shepünü amülim-mülarü laksahpü buknim lubanü api muthrumünean thsang.’ Tüsho mihtsürü alalanü athabah, “Amen!”

²⁶“‘Shepünü ha yakzan tüsho thsangyukhibo manibanü muthrumünean thsang.’ Tüsho mihtsürü alalanü athabah, “Amen!”