Read Yimchungru Naga Yuzüng 29 Bible Online

Yuzüng 29 - Yimchungru Naga bible

Yuzüng 29

¹Harübo ha apinü arü kheak Horeb ching tangzüngkhi lung ajakde Israel mihtsürübo ki Moab ching thiyukhüm jihshihpü ATUNGPUHNÜ Mosa ki tangzüngkhi jihkhibo ah.

²Kheakü Mosanü Israelrü alala jibahle arü ki tha: “ATUNGPUHNÜ nüsa mük kinü Ijip lomi ching, Pharao tüsho ayamlarü le api lo alala ching rhimokhi nüsanü ngüdo.

³Atrebe arümbo, amüyinsahbebo tüsho khinthiyinbe atobo nüsa müknü ngüdo.

⁴Tütüshe ha nimung khiungde, ATUNGPUHNÜ nüsa ki anikhitpü lüm, angüpü mük tüsho asopü nükhün müjih.

⁵Tüsho inü nüsa sunglo ching kam yirü bedo. Nüsa khimmihbo tüsho nüsa jingkhümpübo mümürhüt;

⁶nüsanü yikhap mütsüh, yungsho yukhu le püpü ayungbe muyung; tüshe nüsanü api ju ATUNGPUH nüsa Thrünpuh ah de amükheahpü thsüde ATUNGPUHNÜ nüsa tsühyungpü jih.

⁷Tüsho küyimki nüsa ha dangpung ching arükhea, Heshbon kiulongthsüpuh Sihon tüsho Bashan kiulongthsüpuh Og anenü isa bede keochihpü akhiuk, tüsho isanü arü kuk.

⁸Isanü arü lo ludo tüsho yamrüplurüp thsüde Reubenrü, Gadrü tüsho Manase trük chamkhüh kilim jih,

⁹jumonü ha tangzüngkhi yubo zoang tüsho rhimoang, junangde nüsanü arhimokhi alala ching alü thsübah.

¹⁰“Khihni nüsa alalanü A TUN GPU H nüsa Thrünpuh miki zhipang: nüsa limberübo, nüsa azothsürübo, nüsa torübo tüsho Israel mihtsürü alala,

¹¹nüsa tsührü aninibo tüsho nüsa niuberübo — kheaküshe nüsa khimyam ching lakhi khiungkerübo, nüsa sangyihrü chingnü kekhiprü khiungde —

¹²junangde nüsanü ATUNGPUH nüsa Thrünpuh tangzüngkhi ching tüsho ATUNGPUH nüsa Thrünpuhnü khihni nüsa ki thiyuchihchimkhi ching yüzahbah,

¹³junangde apinü khihni nüsabo api mihtsürü kamshihbah, tüsho apinü nüsa le nüsa jipürü Abraham, Isak tüsho Jakob ki thiyuchihchimkhi nangde api nüsa Thrünpuh thsübah.

¹⁴Inü ha tangzüng tüsho thiyuchihchim nüsa ki lang müthsü,

¹⁵tüshe ATUNGPUH isa Thrünpuh miki isa lung zhiprü, tüsho khihni isa lung mülarü ki she thsüchoh.

¹⁶“Tümüde isa Ijip lo ching lakhi tüsho nüsanü hode arükhi, künangde trükshihbo lung isa hode arükheanü nüsanü mükheahlah,

¹⁷tüsho arü bolung lakhi athraneanbe tüsho sang le lung tüsho shotoyinchi le sunanü athsükhi sangthsü nüsanü ngüdo;

¹⁸khükia nüsa bolung athrürü yungsho aliberü yamkhün yungsho trük, ATUNGPUH isa Thrünpuh kheaknü mulong rholobah harü trükshih thrünpuhbo tankihbah, tüsho nüsa bolung aying akhüh tüsho ari zahkhi sang nangde alabah;

¹⁹tüsho küyimki hadürü mihtsürünü ha muthrumüneankhi sobanü, apinü nihbuh mulong ching müngühmühide athabah, ‘Inü I mulongnü alümkhi ching tsah-a lalashe I mungtsü labah.’ Hanü nüsa atsü tüsho amütsü chido thsümünimbah.

²⁰ATUNGPUHNÜ api neak mübahjih; tümüde ATUNGPUH bukakhiukkhi tüsho api mükthsükhi ju mihtsürü kheak alü trubah, tüsho ha hüm ching thrüta lakhi muthrumünean alala api kheak akihbah, tüsho ATUNGPUHNÜ api mung thüning khüpnü nankhita bahjihbah.

²¹Tüsho ha yakzan hüm ching thrüta lakhi muthrumünean tangzüngkhi nangde ATUNGPUHNÜ api thsümüchipü thsungkheaknü api Israel trükbo alala chingnü bemuwuhbah.

²²“Junangde nüsa dunglim asürükhi tsührübo lün, tüsho limshu lomi chingnü arükhi khiungkerübonü ATUNGPUHNÜ ju lo ching arüm tüsho tukthsü zojihkhi ngübahle athabah:

²³‘ Alo athrünkhi kelülü lung, thimi tüsho atak ah; ha ching mümükhean, yungsho maso tüsho rim tümü she mumukhuh, ha ATUNGPUHNÜ abukakhiukchoki thsümünimkhi Sodom tüsho Gomorra, Adma, tüsho Zeboiim nangde alabah.’

²⁴Trük alalanü athabah, ‘ Tümüde ATUNGPUHNÜ ha lo ching hade arhimokhea? Tode abukakhiukkhi ha tümü amütsan?’

²⁵Judüki mihtsürübonü athabah: ‘ Tümütüsho apinü arü Ijip lo chingnü bede akhiukchoki ATUNGPUH arü jipürü Thrünpuhnü tangzüngkhi arünü bahyukdo;

²⁶tümüde arünü yübah arü ki mümülükhi tüsho arünü mümükheahkhi püpürü thrünpuhbo tankih tüsho kingaün.

²⁷Tüsho ha hüm ching thrüta lakhi muthrumüneanbo handarüpü thsüde ATUNGPUHNÜ ha lo azhihde abukakhiuk.

²⁸Tüsho ATUNGPUHNÜ abukakhiukde arü rukkhita arü lomi chingnü püpürü lomi ching yüshih, tüsho khihni khiungde lah.’

²⁹“Aramkhi kukruk ju ATUNGPUH isa Thrünpuh yo ah, tüshe akhiukahuhkhibo lünnü isa tüsho isa tsührübo yo ah, junangde isanü ha yakzan anibah.