Read Yimchungru Naga Yuzüng 30 Bible Online

Yuzüng 30 - Yimchungru Naga bible

Yuzüng 30

¹“Kheakü, küyimki inü nüsa miki zojihkhi müngühmühi tüsho muthrumünean nüsa kheak arübanü, tüsho ATUNGPUH nüsa Thrünpuhnü nüsa hiumüzütshihpung trükshih alala bolungnü nüsa mulong ching lümkhitshihbanü,

²tüsho inü khihni nüsa ki thiyukhüm jihkhi nangde nü tüsho nü tsührübo, nü mulong tüsho nü me athrünkhi ATUNGPUH nü Thrünpuh ki rholode api ki mihyuanisho,

³ATUNGPUH nüsa Thrünpuhnü nüsa aramkhi chingnü belode arübah, tüsho nüsa kheak muzhode, ATUNGPUH nüsa Thrünpuhnü trük alala ching müzütshihkhi chingnü bemukhungbah.

⁴Khürükhüh thüning bukkhüp ching khide limshu ching yüshih-a lasho, ATUNGPUH nüsa Thrünpuhnü ju chingnü nüsa bemukhunga bebah arübah.

⁵Judüki ATUNGPUH nüsa Thrünpuhnü nüsa jipürü lapung lo ching bede arübah, tüsho nüsa ju ching labah. Apinü nüsa jipürü kheaknü alü nüsa lalim atsü tüsho hihde akamshihbah.

⁶Tüsho nü mulong athrünkhinü tüsho nü me athrünkhinü api muzhopü thsüde ATUNGPUH nü Thrünpuhnü nü mulong tüsho nü tsühsoniuso mulong tsütabahjihbah, junangde nüsa rhangdung labah.

⁷Kheaküshe ATUNGPUH nü Thrünpuhnü harü muthrumünean alala nü riri tüsho nü thraneande athsümüchirü kheak yihkihjihbah.

⁸Tüsho nünü ATUNGPUH ki mihyuanilobah tüsho inü khihni nü ki thiyukhüm jihkhi ha arhimobah.

⁹Nü khahnü arhimokhi, nü pang chingnü tsührü, akamshiwüh bupü, tüsho nü lo chingnü atsü akhiukshihde ATUNGPUH nü Thrünpuhnü lalim tsüde akamshihbah. Tümüde ATUNGPUHNÜ nüsa jipürü kheak asühkhi nangde kheaküshe nü kheak atsü thsungkheaknü asühbah,

¹⁰tüshe nünü ha yakzan hüm ching thrüta lakhi api yukhüm tüsho yakzanbo yanpü ATUNGPUH nü Thrünpuh ki mihyuanibeah, tüsho nünü nü mulong athrünkhinü tüsho nü me athrünkhinü ATUNGPUH nü Thrünpuh kilim rholobeah.

¹¹“Tümüde khihni inü nüsa kilim thiyukhüm jihkhi ha, nüsa thsungkheaknü aramyu, yungsho mameakkhiungbe yung.

¹²Ha nüsanü hade athapü thsüde thüning ching yung, ‘Isanü sobah ju rhimopü thsüde shepünü isa thsungkheaknü thüning ching yükihbah isa kilim hande arüba?’

¹³Yungsho nüsanü hade athapü thsüde keto hobah yung, ‘Isanü sobah ju rhimopü thsüde, shepünü isa thsungkheaknü keto hode yübah isa kilim hande arüba?’

¹⁴Tüshe thiyu ju nü ki khide thüninde, nü mün ching tüsho nü mulong ching lah, junangde nünü ju rhimobah.

¹⁵“Kheahang, inü khihni nüsa müngüh rhangdung tüsho atsü, ashekhi tüsho amütsü zojihlah,

¹⁶khihni nüsa ki thiyukhüm jihkhi ching nünü ATUNGPUH nü Thrünpuh muzhosho, api limro ching tsahde api yukhümbo, yakzanbo, api yuzüngbo anisho, junangde nü rhangdung labah tüsho wüh bubah; tüsho ATUNGPUH nü Thrünpuhnü nünü müküh-a lupü lakhi lo ching nü müngühjihbah.

¹⁷Tüshe nü mulong rholode tsobah nünü musode tsoabahsho, tüsho püpürü thrünpuhbo kingaünde tüsho tankihsho,

¹⁸nüsa tsükjide adükheakbah de inü khihni nüsa ki zhiyukchoh; nüsanü Jordan hode yübah müküh-a lupü lakhi lo ching nü jingtsüpkutsüp müla.

¹⁹Inü khihni nüsa azhihde thiyumütsan thsüde thüning tüsho alo jichoh, junangde inü nüsa müngüh rhangdung tüsho ashekhi, müngühmühi tüsho muthrumünean zojihchoh; jumonü rhangdung mokhitang, junangde nü tüsho nü tsühsoniuso chido rhangdung labah;

²⁰junangde nünü ATUNGPUH nü Thrünpuh muzhode api yu anibah, tüsho nünü api kheak müripbah, tümüde api ju nü rhangdung tüsho nü kutsüp; tüsho ATUNGPUHNÜ nüsa jipürü, Abraham, Isak tüsho Jakob arü kilim jihpü thiyuchihchimkhi lo ching nü labah.”