Read Yimchungru Naga Yuzüng 31 Bible Online

Yuzüng 31 - Yimchungru Naga bible

Yuzüng 31

¹Judüki Mosanü yübah harü yubo Israelrü alala ki tha.

²Tüsho apinü arü ki tha: “Khihni I kam 120 azorü ah. Kheakü inü wukhiukla azahla de müthsükhuk, kheaküshe ATUNGPUHNÜ I ki tha, ‘Nü ha Jordan hode müyü.’

³ATUNGPUH nü Thrünpuh nüsa müngüh yübah; apinü harü trükshihbo dükheakshihbah tüsho nüsanü arübo yankhita bahbah; tüsho ATUNGPUHNÜ athakhi nangde, Jihusua nüsa müngüh yübah.

⁴Tüsho ATUNGPUHNÜ Amorrü kiulongthsürübo Sihon tüsho Og, tüsho arü lomi thsümünimjihkhi nangde apinü arü kheak rhimobah.

⁵Tüsho ATUNGPUHNÜ arübo nüsa kilim jihbah, tüsho inü nüsa ki thiyukhüm jihkhi nangde nüsanü arü kheak rhimobah.

⁶Düküngang tüsho mulong ato thsang, dütre yungsho arü ki trede düla: tümüde ATUNGPUH nü Thrünpuh nüsa lung yüchoh; apinü nüsa müdükhe yungsho mübahyuk.”

⁷Judüki Mosanü Israelrü alala mikinü Jihusua jibahle tha, “Reangzahang tüsho mulong toang, tümüde ATUNGPUHNÜ harü jihshihpü arü jipürü ki thiyuchihchimkhi lo ching ha mihtsürübo lung nü ayübeah, tüsho nü hode ju arünü yamrüplurüp lubah.

⁸ATUNGPUHNÜ nü bebah tüsho nü lung labah. Apinü nü müdükhe yungsho mübahyuk; dütre yungsho mulong dünini.”

⁹Jumonü Mosanü ha yakzan thrütbahle Levi tsührü amükeamrü, ATUNGPUH tangzüng sangdan shuhrü tüsho Israelrü azothsürübo kilim jih.

¹⁰Tüsho Mosanü arü ki thiyukhüm jihde tha, “Kam thünepü akheam aban ching akhukhi adükhepü kim, arüngkhimyam thünio ching,

¹¹küyimki apinü amokhitkhi dangpung ching ATUNGPUH nüsa Thrünpuh miki Israelrü alala arübanü, ha yakzan nünü Israelrü alalanü sode kheang.

¹²Mihtsürübo bemukhungang, athrürü tüsho aliberü, azürü anini tüsho nüsa chipimurung khüp lakhi khiungkerü, junangde arünü sobahle ATUNGPUH nüsa Thrünpuh wüntrepü mükheahbah tüsho ha yakzan kümkangde anibah,

¹³junangde nüsa Jordan hode yübah müküh-a lupü lakhi lo ching nüsa rhangdung lachoki amuyung ha mümükheahrü arü tsührübonü asobah tüsho ATUNGPUH nüsa Thrünpuh wüntrepü mükheahbah.”

¹⁴ATUNGPUHNÜ Mosa ki tha, “Kheahang, nü ashepü nimung khiungchoh; Jihusua jiang tüsho ashorupung khimyam ching bebah arang, junangde inü api kheak rhimo nimkihanü.” Jumonü Mosa le Jihusua anenü ashorupung khimyam ching yü.

¹⁵Judüki arüngkhimyam ching ATUNGPUHNÜ amo dungto ching akhiuka huh, tüsho amo dungto ju arüngkhimyam ripit kumung zhip.

¹⁶Tüsho ATUNGPUHNÜ Mosa ki tha, “Kheahang, nü nü buh pürü lung sühakhimbah; tüsho ha mihtsürübonü asürübah tüsho khiungkerü lo thrünpuhbo kheak müzammüram ahoribah, küching arü yübanü jurü bolung labah, tüsho arünü I bahyukbah tüsho inü arü kheak tangzüngkhi thsümünimbah.

¹⁷Ju nimung ching arü azhihde I bukakhiukbah, inü arü bahyukbah tüsho I miro arü kinü arambah tüsho arübo dükheakbah. Tüsho amütsübo tüsho thsümütsü ahihdo arü kheak yükihbah, junangde arünü ju nimung thabah, ‘Isa Thrünpuh isa lung mülakhi hode harü amütsübo isa kheak arüchoh yung de?’

¹⁸Tüsho arünü harü amütsübo rhimode püpürü thrünpuhbo kilim rholokhi dünkheaknü ju nimung ching inü tsükjide I jak rambah.

¹⁹“Jumonü kheakü, nünü ha khün thrütang, tüsho Israel tsührübo ki thsangyuang; ha arü mün ching yukjang, junangde I thsungkheaknü Israelrü tsührü azhihde hanü thiyumütsan thsübah.

²⁰Küyimki arübo inü arü jipürü kheak thiyuchihchimkhi, niuhke tüsho mukhuke bukkhi lo ching bede ayübanü, tüsho arünü bukthsüde tsühbah shih kihbanü; judüki arünü püpürü thrünpuhbo kilim anguhde yübah atankihbah; tüsho arünü I bahyukbah tüsho tangzüngkhi thsümünimbah.

²¹Tüsho küyimki amütsübo tüsho thsümütsübo arü kheak arübanü, ha khünnü arü azhihde thiyumütsan thsübah; tümütüsho arü tsühsoniusobonü mümihabah, tümüde inü arü kilim jihpü thiyuchihchimkhi lo lim bede müyüyide arü lümkhi inü mükheahlah.”

²²Jumonü ju nimungnü Mosanü ha khün thrüt, tüsho Israel tsührü ki thsangyu.

²³Judüki ATUNGPUHNÜ Nun tsührü Jihusua ki rhimo jihde tha, “Reangzahang tüsho mulong toang; tümüde nünü Israel tsührübo inü arü ki thiyuchihchimkhi lo ching bede ayübah, tüsho I nü lung labah.”

²⁴Jumonü küyimki Mosanü ha yakzan hüm ching thrütkhamkhea,

²⁵Mosanü ATUNGPUH tangzüng sangdan hanrü Levirü ki thiyukhüm jihde tha:

²⁶“Ha yakzan hüm luang tüsho ATUNGPUH nüsa Thrünpuh tangzüng sangdan rheang ching yukang, junangde api mihtsürü azhihde thiyumütsan labah;

²⁷tümüde nüsanü azhihkhi tüsho yihkhrokhi inü mükheahlah. Khihni I nüsa lung lachokiyamnü nüsanü ATUNGPUH azhihde lado, dale I sheshu a küdükhüh laba?

²⁸Nüsa trükbo alala tüsho atorübo I ki mukhungang, junangde inü harü yubo arünü sode thaanü tüsho arü azhihkhi thiyumütsan thsüde thüning tüsho alo jianü.

²⁹Tümüde I sheabahshu nüsa shahde athsümünimbah de inü mükheahlah, tüsho inü nüsa ki thiyukhüm jihkhi limro chingnü rholode atsobah; tüsho ju dunglim nimungbo ching amütsübo nüsa kheak akihbah, tümütüsho nüsanü ATUNGPUH mük kinü amütsü rhimode, nüsa khahnü arhimokhi hode api bahyukde abukakhiukshihbah.”

³⁰Judüki Mosanü ha khün akheam khiungde Israel boto ki sode khea huh: