Read Yimchungru Naga Yuzüng 32 Bible Online

Yuzüng 32 - Yimchungru Naga bible

Yuzüng 32

¹O thüningbo, aniang, tüsho inü athabah; tüsho alominü I mün chingnü athakhi aniang.

²Inü thsangyukhi tsüng nangde atsamkhishang, inü athakhi ayinke nangde keamshang, sangdung nunu kheak tsüng arünnü akeamkhi nangde, tüsho rimkiu kheak tsüng shimshimde akeamkhi nangde.

³Tümüde inü ATUNGPUH mung zhiyukjihbah. Isa Thrünpuh tokhi thaang! @SP ACE =

⁴Api ju lung, api rhimo khiukdahlah; tümüde api limro alala alungki. Athülünkhi Thrünpuh tüsho amülim mülakhi, api alungki tüsho dükde lah.

⁵Arünü api ki thsümünimde rhimodo, arü kheak lapha kihkhinü arübo kheaküa api tsührü yung; arübo bephülapkhi tüsho akhürang lün.

⁶Nüsanü ATUNGPUH kheak hade rhimocho de, nüsa abünrü tüsho azhazha mihtsürü? Api ju nü thrünrü nü buh yung de, shepünü nü thrün tüsho trük kamshih?

⁷Awün nimungbo lümkhitang, lün ashang hokhibo lümkhitang; nü buh ki keokhiang, tüsho apinü nü ki huhbah; azothsürübo ki keokhiang, tüsho arünü nü ki thabah.

⁸Küyimki khide Achangbuhnü trükbo kilim yamrüplurüp jihkhea, küyimki apinü mihtsürübo chammüzütkhea, apinü mihtsürü aredungbo ju Israel mihtsürü wühkhe yande khim.

⁹Tümüde ATUNGPUH lupü shihcham ju api mihtsürübo, Jakob ju apinü achamkhitkhi yamrüplurüp. @SP ACE =

¹⁰Apinü api sunglo ching tüsho tümü mülakhi sunglo ching ngü; apinü anihbuh mükamdode, api küm, apinü anihbuh api mükji mukhiuk nangde neakde la.

¹¹Müleangtopünü asap chuphüneande, ajipjip kumung phürüpkhi nangde, aghi chutreakbah arü kaplode aghidükeang kheaknü ashuhkhi nangde,

¹²ATUNGPUH zangrünü api be tüsho api lung khiungkerü thrünpuh mülakheah.

¹³Apinü api alomi achang kheak binshih, tüsho apinü thulu chingnü akhiukkhi tsüh; tüsho apinü api mukhuke lung chingnü ngüshih, tüsho lungtraktrak chingnü müdangke akhiukshih.

¹⁴Moshi chingnü niuhke kingkungkhi tüsho mihnu chingnü niuhke, namfimihnunu tüsho namfimihnupung müdang bede, Bashan namfimihnupung amokhitkhi, atsüdak wheat hi tüsho amokhitkhi yukhu nünü yung. @SP ACE =

¹⁵Tüshe Jeshurun shihkihde zokhit, tüsho azhihde kam; bukthsüde tsühbah api mülangrüpdo tüsho lütlütde kam. Apinü api thrünrü Thrünpuh bahyuk, tüsho api khümkhitpü lung bahyuk.

¹⁶Arünü api keomukhuh-a khiungkerü thrünpuhbo kheak abukakhiukshih; arünü athraneanbe rhimode api bukakhiukshih.

¹⁷Arünü Thrünpuh tsütsü yungde arimri mebo, arünü küyimkishe mümükheahkhi, khihnishido arükhi thrünpuhbo aso, nüsa jipürünü mütrekhi kilim laksah-a kingaün.

¹⁸Nüsanü nüsa mütrübuh lung bahyuk; nüsanü nüsa zübebuh Thrünpuh mihabah.

¹⁹ATUNGPUHNÜ ju ngübahle arü bahyuk, tümüde atsührü tüsho tsührübebonü abukakhiukshih.

²⁰Tüsho apinü tha, Inü I miro arü kheaknü ramabahbah, arü kheak tümü dünjibanü inü akheahbah, tümüde arübo yihkhro tüsho müthülünkhi tsührübo lün lah.

²¹Arünü arü thrünpuh kheak I bukakhiukshih, tüsho arü sangthsü kheak I bukakhiukshih. Jumonü inü arü mihtsürü yungde püpü kheak bukakhiukshihbah; inü arü abünrü trük kheak mükthsüshihbah.

²²Tümüde I bukakhiukkhinü mo takkihdo, tüsho ju Ashe-lomi khiungde takchoh, alomi tüsho lüpdükhi aniuabahchoh, tüsho müzüngbo jing kheak mo thsahkihchoh. @SP ACE =

²³Tüsho inü arü kheak thsümütsübo keamkihshihbah; inü arü kheak hühzobo keamshihbah;

²⁴arübo akhümnü ashebah tüsho takde alamlamkhinü tüsho atrebe tukthsünü ashebah; tüsho inü arü azhihde mütüm shiwüh yüshihbah, tüsho müzüm-phuruto anguhpü yüshihbah.

²⁵Wungdo phulung ching nukshangnü alaksahbah, tüsho thüyam khiungshakbo ching atrebe labah, athrününgtsüng tüsho anünürü chido, niuhdukrü khungarü, kubuyukkhi mihtsürübo dükheakshihbah.

²⁶Inü hade thakhülaa, Inü arü ashang ching hiumüzütshihbah, inü arü mihtsürü bolungnü alümkhitpü arün thsüshihbah,

²⁷tüshe inü arü riri mükükheangshihkhukde bahdo, jude thsükhülaa arü riribonü aniphülapbah athabah, “Isa khahnü kukdo; ATUNGPUHNÜ harü alala mürhimo.” @SP ACE =

²⁸Tümüde arü sulüm mülakhi trük ah, arü kheak anikhitkhi müla.

²⁹Arü lümlung lakhülaa, arünü ha anikhitbah, arünü adünjipü lakhi mükheahbah!

³⁰ATUNGPUH arü Thrünpuhnü arü yinkhi yungsho, tüsho ATUNGPUHNÜ arü jihabahkhi yungsho, küde thsah khülangnü chithürü yande müshampü, tüsho mahnenü chithürü thürü alihde atsoshihpü?

³¹Tümüde arü thrünpuh ju isa Thrünpuh ruk yung, isa riribonü she arü küdah thsüde mütsanlah.

³²Tümüde arü kurungaso ju Sodom kurungaso kheaknü, tüsho Gomorra lubo chingnü arülah; arü kurungasobo ju müzümbo ah, adüchibo ju khühlah;

³³arü yukhubo ju phuruto müzüm tüsho ashebe phuruto müzüm lah. @SP ACE =

³⁴Arü riribonü arhimokhi ATUNGPUHNÜ lümkhitlah, apinü arü kam dükdü ching thsümüchipü aleanglah.

³⁵Royimpü tüsho ashaklopü I yo, akhukhi kim ching arü jing lihbah; tümüde arü thsümüchipü nimung thüninde lah, tüsho arü kiuyuk aphüni lah.

³⁶Küyimki apinü arü wu tsodo tüsho rhüka larü yungsho zuzu larü maning de mükheahbanü, atsütsü ATUNGPUHNÜ api mihtsürü bekhitbah, tüsho api yamlarübo kheak müthsümbah.

³⁷Tüsho ATUNGPUHNÜ athabah, Arü thrünpuhbo küching la, lung küpü ching arü tsoyukcho,

³⁸sherübonü arü kingaünkhi müdang tsühkhea, tüsho arü ayungbe kingaün chingnü yukhu yungkhea? Arübo asürübah nüsa rungshang, arünü nüsa tsungdoshang! @SP ACE =

³⁹Kheakü kheahang I, I lang, Thrünpuh ah, tüsho I hobah tümü thrünpuh müla; inü laksahchoh tüsho inü rhangdung lashihchoh; inü yurijihchoh tüsho inü ngushihchoh; tüsho I khah chingnü abekhitkhukpü thsüde sheshe müla.

⁴⁰Tümüde inü I khah thüning lim shuhkihbah thiyuchihchim: I lünnü lah,

⁴¹Küyimki inü I nukshang zhingzhingde azükhitba, tüsho I khahnü mahkhapkhi kheak ramloba; inü I riri kheak royimbah tüsho I thraneanrü kheak athrihlobah.

⁴²Inü I hühzobo thiyih yungshihbah tüsho I nukshangnü shih tsühshihbah — alaksahkhi tüsho aramrü thiyihbo, thiriri limberü kubo. @SP ACE =

⁴³O trükbo, ATUNGPUH mihtsürübo shiang; tümüde api yamlarübo laksahrü alala kheak apinü royimchoh, tüsho api riri kheak royimchoh, tüsho api lo le amihtsürü neak bahjihchoh.

⁴⁴Mosa tüsho Nun tsührü Jihusua anenü arübah ha khün yubo mihtsürübonü sode khe.

⁴⁵Mosanü harü yu alala Israelrü ki thakham,

⁴⁶tüsho apinü arü ki tha, “Inü khihni thiyumütsan jihkhi kheak nüsa mulong zoang, ha yakzan Israel tsührübonü kümkangde anishihpü nüsanü thiyukhüm jihang.

⁴⁷Tümüde ha nüsa thsungkheaknü akeangkeang yung, tümütüsho ha nüsa rhangdung, tüsho ha yunü nüsa Jordan hode yübah mükühpü lo ching jingtsüpkutsüp labah.”

⁴⁸Tüsho ju nimung ATUNGPUHNÜ Mosa ki tha,

⁴⁹“Jirikho hode yübah, Moab lomi ching, ha Abarim müzüngbo ching, Nebo müzüng kheak yükihang. Inü Israel tsührübo kilim jihkhi Kanan lo lim abina kheahang;

⁵⁰tüsho nü khiung Aron Hor müzüng kheaknü ashekhi nangde nü ju müzüng kheaknü ashebah;

⁵¹tümütüsho nünü Israel tsührü bolungnü I azhihde Zin sunglo ching lakhi, Meriba Kadesh ke ching neak yihbeakdo, tümütüsho Israel tsührü bolung nünü I ki wüntre müjih.

⁵²Nünü alomi ju limshu chingnü angübah, tüshe inü Israel tsührübo kilim jihkhi lomi ching nü müyüzah.”