Read Yimchungru Naga Yuzüng 33 Bible Online

Yuzüng 33 - Yimchungru Naga bible

Yuzüng 33

¹Ha müngühmühi ha Thrünpuh mihtsürü Mosanü api shepü müngüh Israel tsührübo müngühjihkhi ah.

²Apinü tha, “ATUNGPUH Sinai chingnü arü tüsho Seir chingnü isa kheak yinkhi; apinü Paran müzüng chingnü tahkih, api amüsührü chithürü thürü lungnü arü, akhah tsülim peang amüküp yakzan lakheah.

³Am, apinü amihtsürü muzho; api kilim müsühkhitrübo alala api khah ching lakheah; jumonü isanü api jing ki binchoh tüsho api yubo leangkhichoh,

⁴Mosanü isa kilim jihkhi yakzan Jakob boto yamalo lah.

⁵Küyimki mihtsürü limberübo tüsho Israel trükbo alala mukhungkhea, hanangde Jeshurun ching ATUNGPUH ju kiulongthsüpuh kam.

⁶Reuben rhangdung lashang, tüsho düsheshih, yungsho api mihtsürü nükde dükamshih.” @SP ACE =

⁷Tüsho apinü Juda thsungkheak ha tha: “O ATUNGPUH , Juda düsheak sojang, tüsho amihtsürü bolung api bebah arang; anihbuh khahnü azangrü tsunglochoh, tüsho api riri azhihde api rungang.” @SP ACE =

⁸Tüsho Levi dünkheak apinü tha, “ATUNGPUH , nü yo Thummim tüsho Urim amüsüh mihtsürü Levi kilim jihang, shepü kheak nünü Massa ching rükakikhea, shepü kheak Meriba ching nünü shochihkhea;

⁹shepünü abuh tüsho abe ki, ‘Inü arü mümükheah’ de athakhea; apinü akhiung bahyuk tüsho atsührübo mümükheahde kam. Tümüde arünü nü yu ani tüsho nü ki tangzüngkhi zo.

¹⁰Arünü Jakob ki nü yuzüngbo tüsho Israel ki nü yakzan thsangyubah; arünü nü miki arhümthüneabe yukbah, tüsho nü kingaün sadam kheak taka kingaünbah.

¹¹O ATUNGPUH , api lakhibo müngühjang, tüsho api khahnü rhimokhibo leangkhijang; api azhihrü tüsho api thraneanrü müchero yihshakjang, junangde arü masürülo.” @SP ACE =

¹²Apinü Benjamin dünkheak tha, “ATUNGPUHNÜ amuzhodakkhi, apinü akümkhi ching lachoh; apinü nimung amuyung neakchoh tüsho api dubuh dükeak api sühakhimchoh.” @SP ACE =

¹³Josep dünkheak apinü tha, “Thüning kumungnü amokhitkhi thsambahnü, tüsho alunglim lakhi kenü, ATUNGPUHNÜ amüngühjihkhi api lo thsang;

¹⁴aninü asoshihkhi atsübe tüsho khinubonü suhdahde akhiukshihkhinü,

¹⁵adüso müzüngbo chingnü akhiukkhi atsüdakbe, tüsho akheam mülakhi awungbo kheaknü akhiukkhinü,

¹⁶api lo atsü alalanü mishang, sangrung aniukhi ching lakhi ATUNGPUHNÜ müngühshang. Harü müngühmühi trük kheak arüshang, tümütüsho khiungmungrü bolung api limberü lakheah.

¹⁷Api müretahkhi ju akhuh adrekhi moshipung kiphahlah, api juh ju mütüm moshipung kiphahlah; jurünü alomi akheam alala khiungde apinü trükshihbo khubah; Ephraimrü chithürü thürübo tüsho Manaserü chithürübo.” @SP ACE =

¹⁸Tüsho Zebulun dünkheak apinü tha, “Zebulun, nü yükhi ching, asühang; tüsho Issakar, nü khimyambo ching asühang.

¹⁹Arünü mihtsürübo arü müzüng ching jiyukbah; ju ching arünü thiyuro kingaünbo jihchoh; tümüde arünü kekim lakhit tüsho rama lakhi loyi lakhit dukchoh.” @SP ACE =

²⁰Tüsho Gad dünkheak apinü tha, “Gad wüh toshihbuh shiang! Gadnü kekhüzü nangde aleangchoh, apinü bin, tüsho thangphülang zamnakchoh.

²¹Apinü anihbuh thsungkheak alo atsüdak mokhit, tümüde ju ching limthobuh shihcham müküh-a lakheah; tüsho apinü mihtsürü limberübo kilim arü, apinü Israel lung thiyukhüm tüsho ATUNGPUH thiyuro yakzan rhimo.” @SP ACE =

²²Tüsho Dan dünkheak apinü tha, “Dan a Bashan chingnü ajukkhitkhi kekhüzü nunu ah.” @SP ACE =

²³Tüsho Naphtali dünkheak apinü tha, “O Naphtali, mihmuzho ching reangkeamlah, tüsho ATUNGPUH müngühmühinü mithülamlah, Galilee kechih tüsho düjinglim khiungde lah.” @SP ACE =

²⁴Tüsho Asher dünkheak apinü tha, “Asher tsührübo kurungkheak müngühmühi lah; api a khiungmungrünü lunekhi thsüshang, tüsho ajing müdangke ching thsamshang.

²⁵Nü sangkhrihbe ju yinchi tüsho müwayinchi labah; tüsho nü nimungbo yande, nü sühmüh labah.” @SP ACE =

²⁶“O Jeshurun, Thrünpuh nangde sheshe müla, shepünü nüsa rungpü achang yinmi hode, tüsho api kiulongthsü thüning hode arücho.

²⁷Akheam mülakhi Thrünpuh ju nü lapung lah, tüsho abukkhüp lakhi ju akheam mülakhi khahbo ah. Tüsho apinü thiriri nüsa müngühnü yana tsoshihchoh, tüsho tha, ‘Dükheang.’

²⁸Jumonü Israel a kurampung ching lah, Jakob kekhip küma zolah, hi tüsho yukhu lakhi lo ching, thüningbonü ayinke akishihchoh.

²⁹O Israel, nü asühpü! Shepü nü nangde la, ATUNGPUHNÜ khümkhitkhi mihtsürübo, nü rungpü thsungkheak tsung tüsho nünü akukpü thsungkheak thsühnuk! Thiriribonü nüsa miki mükhümde arübah; tüsho nüsanü arü düthsün kheak thrümbah.”