Read Yimchungru Naga Yuzüng 34 Bible Online

Yuzüng 34 - Yimchungru Naga bible

Yuzüng 34

¹Judüki Mosanü Jirikho hode yübah alakhi Moab dükün chingnü Nebo müzüng tüsho Pisga wung mujuk kheak wutu. Tüsho ATUNGPUHNÜ api ki Gilead lomi alala Dan khiungde huh,

²Naphtali alala, Ephraim lomi, Manase, Juda lomi alala, Aniyüzahlim Keto khiungde,

³dukulim, tüsho Jirikho jindükhünbo, ashidungbo lakhi kiutobo, Zoar khiungde.

⁴Tüsho ATUNGPUHNÜ api ki tha, “Ha lo ha inü Abraham, Isak tüsho Jakob jihpü alokhikhi, hade tha, ‘Inü ha nü tsühsoniusobo kilim jihbah.’ Inü ju nü müknü ngüshihdo, tüshe nünü ju hode müyü.”

⁵Jumonü ATUNGPUH yukhüm nangde, ATUNGPUH yamlarü Mosa ju Moab lomi ching she.

⁶Tüsho ATUNGPUHNÜ api Beth Peor thripkhüh lim, Moab dükhün ching kiuyukabah; tüshe khihni khiungde shenü she api kiuyuk mümükheah.

⁷Mosa shechoki api kam 120 lakheah. Api mük neamneam müla yungsho ju ruk lang api sühmüh lakheah.

⁸Tüsho Israel tsührübonü Moab dükhün ching nimung samrü Mosa mitrip. Junangde Mosa dünkheak mitripkhi tüsho tüzhokhi arün thsü.

⁹Kheakü Nun tsührü Jihusua lümlung menü mithülamde lakheah, tümüde Mosanü akhah api kheak nimkih; jumonü Israel tsührübonü api yu ani, tüsho ATUNGPUHNÜ Mosa ki thiyukhüm jihkhi nangde rhimo.

¹⁰Tüshe Jushu a Israel ching ATUNGPUHNÜ mironü miro mükheahkhi Mosa nangde wukihrü masürü,

¹¹ATUNGPUHNÜ Ijip lomi ching Pharao miki, api yamlarü, tüsho api lo alala ching rhimoshihpü thiyikhi amütsan tüsho khinthiyinbe alala chingnü,

¹²tüsho wu ato, tüsho Israel mikinü Mosanü atrebe ato rhimokhi nangde wukihrü sheshe mülakheah.