Read Yimchungru Naga Yuzüng 5 Bible Online

Yuzüng 5 - Yimchungru Naga bible

Yuzüng 5

¹Tüsho Mosanü Israelrü alala jibah arü ki tha, “O Israel, yakzanbo tüsho thiyuzüngbo inü nüsa ki khihni thakhi aniang, junangde nüsanü jurü yande arhimopü kümkangang.

²ATUNGPUH isa Thrünpuhnü isa ki Horeb ching tangzüng khülang thsü.

³ATUNGPUHNÜ ha isa bebuhrü kheak mütangzüng, tüshe khihni ha ching lakhi rhangdung larübo isa ki ah.

⁴Awung kheak mo phulungnü ATUNGPUHNÜ nüsa ki mironü miro ki asukachih.

⁵Judüki ATUNGPUH yu thaa huhpü thsüde ATUNGPUH le nüsa dükeak I zhip; tümüde mo lakhinü nüsa trede alakheah, tüsho nüsanü awung kheak muwutu. Apinü tha,

⁶I nüsa Ijip lomi, azhorü kuhi chingnü abekhitbuh ATUNGPUH nüsa Thrünpuh.

⁷Nünü I miki püpürü thrünpuh tümü dülashih.

⁸Nünü nü thsungkheak tümükhüh sangthsü, yungsho thüning le alomi yungsho alomi bukkhüp ke ching lakhi tümükhüh kiphahde düthsü;

⁹nünü arü ki dükhukning yungsho dütankih; tümüde I ATUNGPUH nüsa Thrünpuh, mükthsübuh Thrünpuhnü bebuhrü neak lün mahsam tüsho phüyi khiungde I thraneanrübo rhua kheahchoh,

¹⁰tüshe I muzhorü tüsho I yukhüm anirü; chithürübo kilim amüthsüm huhchoh.

¹¹“Nünü ATUNGPUH nü Thrünpuh mung akeangkeang ching dütha, tümüde ATUNGPUHNÜ api mung akeangkeang ching tharü amülim müjihde müla.

¹²“ATUNGPUH nüsa Thrünpuhnü thiyukhüm jihkhi nangde nünü amunimung muang tüsho müsühde zoang.

¹³Nünü nimung thuruk nü rhimo alala rhimoang,

¹⁴tüshe athüne nipü ju ATUNGPUH nü Thrünpuh amunimung lah. Ha nimung nünü rhimo tümü düthsü; nü yungsho nü tsührübo athrürü tüsho aliberübo yungsho nü yamlarü athrürü tüsho aliberübo; yungsho moshipung yungsho donki, yungsho akam-shiwüh, yungsho nü chipimurung bukkhüp lakhi hanrü, junangde nü ruk nü yamlarü athrürü tüsho aliberü sühakhimbah.

¹⁵Tüsho nü Ijip lo ching azhorü lakheah de lümkhitang, tüsho ATUNGPUH nü Thrünpuh khah ato chunghuhde ju chingnü nü bekhit; jumonü ATUNGPUH nü Thrünpuhnü amunimung arüngshihpü nü kilim thiyukhüm jih.

¹⁶“ATUNGPUH nü Thrünpuhnü thiyukhüm jihkhi nangde nü be tüsho nü buh wüntreang, junangde ATUNGPUH nü Thrünpuhnü ajihkhi lo ching nü kutsüpde alabah.

¹⁷“Nünü dülaksah.

¹⁸“Nünü müzammüram düthsü.

¹⁹“Nünü dahüh.

²⁰“Nünü nü yamhingrü azhihde amülim thiyumütsan düthsü.

²¹“Nünü nü yamhingrü niube dümürüh; tüsho nü yamhingrü yam, thulu, yamlarü athrürü tüsho aliberü, moshipung, donki, yungsho api lakhi tümü she dülune.

²²“ATUNGPUHNÜ ha yubo alala awung ching mo phulung, amo, azhingdokhi ching düsheak atonü nüsa amukhungrü alala ki thado; tüsho apinü püpü tümü mütha. Tüsho apinü jurübo lungbeak mahne kheak thrütbahle I kilim jih.

²³“Junangde awung monü takde alachoki, küyimki nüsanü düsheak khülang amiting chingnü asokhea, nüsa trükbo ching akubo tüsho azothsürübo I kilim arü.

²⁴Tüsho nüsanü tha: Tsükjide ATUNGPUH isa Thrünpuhnü api müretahkhi tüsho api tokhi isa ki huhdo, tüsho isanü api düsheak mo phulungnü sodo. Khihni Thrünpuhnü mihtsürü ki asukachihkhi isanü ngüdo; tüsho api rhangdung lah.

²⁵Jumonü kheakü tümüde isa ashepü? Tümüde ha monü isa taksahbah; isanü ATUNGPUH isa Thrünpuh düsheak solosho, isa ashebah.

²⁶Tümüde isa lakhi nangde, mo phulungnü arhang Thrünpuh düsheak sokhi mihtsürü shepü la?

²⁷Nünü thüninde yüang tüsho ATUNGPUH isa Thrünpuhnü athakhi alala aniang, tüsho ATUNGPUH isa Thrünpuhnü nü ki thakhi isa ki thaa huhang, tüsho isanü anide ju rhimobah.

²⁸“Küyimki nüsanü I ki thakhea, ATUNGPUHNÜ nüsa düsheak so, tüsho ATUNGPUHNÜ I ki tha: Harü mihtsürünü nü ki thakhi düsheak inü sodo. Arünü athakhi alala dükdü ah.

²⁹O, arünü I wüntrekhi hadürü arü mulong ching lade kamruhroro I yukhüm zokhülaa, junangde arü tsührübo kheak lünnü tsüde alabah!

³⁰Yüang tüsho arü ki thaang, Nüsa khimyambo ching yüang.

³¹Tüshe nü a I ki ha kheak zhipang, tüsho inü nü ki thiyukhümbo, yakzanbo, tüsho thiyuzüngbo nünü arü ki thsangyupü thsüde athabah, junangde inü arü kilim amükühpü jihkhi lo ching jurü anide arhimobah.

³²“Jumonü ATUNGPUH nüsa Thrünpuhnü nüsa ki thiyukhüm jihkhi nangde kümkangde rhimoang; nüsanü tsülim khah yungsho huzulim danguh.

³³Nüsanü lüpdükhi ching ATUNGPUH nüsa Thrünpuhnü thiyukhüm jihkhi ching tsahang, junangde nüsa rhangdung tsüde alabah, tüsho nüsanü amükühpü lakhi lo ching nüsa kutsüp ashang alabah.