Read Yimchungru Naga Yuzüng 7 Bible Online

Yuzüng 7 - Yimchungru Naga bible

Yuzüng 7

¹“Küyimki ATUNGPUH nüsa Thrünpuhnü nüsanü amükühpü lakhi lo ching bedarübanü, tüsho nüsa müngühnü trükshihbo, Hitrü, Girgashrü, Amorrü, Kananrü, Perizrü, Hivrü tüsho Jebusrü, trükshih atoto thüne nüsa kheaknü sühmüh lakhi yankhitbanü,

²tüsho küyimki ATUNGPUH nüsa Thrünpuhnü arübo nüsa khah ching jihbanü arübo shahde adükheakkhambah. Nüsanü arü kheak tümü tangzüng düthsü yungsho mihmüthsüm dühuh.

³Yungsho nüsanü arü kheak düyihluachih. Nüsanü tsührü aliberübo arü kilim dürhangshih, yungsho nüsa tsührü athrürü khilim arü tsührübebo dülu.

⁴Tümüde jurü liberübonü nüsa tsührübo püpü thrünpuhbo tankihshihpü I kheaknü beakhinde atsobah; junangde nüsa azhihde ATUNGPUH bukakhiukbah tüsho nüsa nahde adükheakbah.

⁵Tüshe ha ruk nüsanü arü ki rhimoang: nüsanü arü yo kingaün sadam khapkheamjang, dungjingbo kingkheamjang, Ashera dungjingbo kiukheamjang, tüsho sangthsübo monü takabahjang.

⁶Tümüde nüsa ATUNGPUH Thrünpuh kilim amüsüh mihtsürü lah; ATUNGPUH nüsa Thrünpuhnü nüsa api mihtsürü thsüpü alomi ching mihtsürü alala kurungkheak atsüdakbe lakhit thsüde nüsa mokhit.

⁷“Nüsa wühkhe hihmonü ATUNGPUHNÜ nüsa muzhokhi yung yungsho amokhitkhi yung, tümüde nüsa mihtsürü alala bolungnü anükbe ah;

⁸tüshe ATUNGPUHNÜ nüsa muzho, tüsho apinü nüsa bebuhrü ki thiyuchihchimkhi zomonü, ATUNGPUHNÜ nüsa api Wuto khah hode bekhit tüsho Ijip kiulongthsüpuh Pharao khah hode azhorü kuhi chingnü rhokhit.

⁹Jumonü ATUNGPUH nüsa Thrünpuh ju Thrünpuh, thiyuronü tangzüngkhi tüsho amüthsüm chithürü lünbo ching, sherünü api muzhocho tüsho thiyukhüm anirü kheak thiyuro Thrünpuh ah de mükheahang;

¹⁰tüshe api thraneanrü thsümüchipü apinü mudukiuhlo.

¹¹Jumonü nüsanü inü khihni rhimode alapü thiyukhüm jihkhi thiyukhümbo, yakzanbo, thiyuzüngbo zoang.

¹²“Tümütüsho nüsanü harü yuzüngbo anide arhimokhi hode, ATUNGPUH nüsa Thrünpuhnü nüsa kheak tangzüngkhi tüsho nüsa bebuhrü kheak mihmüthsüm jihpü alokhikhi zobah.

¹³Tüsho apinü nüsa muzhobah, müngühjihbah, tüsho wüh bushihbah; apinü nüsa pang chingnü aso asoshihpü tüsho alo chingnü aso asopü müngühjihbah; nüsa hi, yukhu, müdangke, moshibo tüsho mihnu boto nüsa jihshihpü apinü nüsa bebuhrü ki thiyuchihchimkhi lo ching müngühjihde abushihbah.

¹⁴Nüsa mihtsürü alala kurungkheak müngühjihbah; nüsa bolung athrürü yungsho aliberü yungsho moshi bolung aniungyüh mülashih.

¹⁵Tüsho ATUNGPUHNÜ tukthsü nüsa kheaknü hande atsobah; nüsanü amükheahkhi tukthsü Ijip ching lakhi tümü she nüsa kheak marüshih, tüshe apinü jurübo nüsa thraneanrübo kheak yükihshihbah.

¹⁶Tüsho ATUNGPUH nüsa Thrünpuhnü nüsa kilim jihkhi mihtsürübo nüsanü adükheakshihbah, nüsa müknü arü kheak mümuzho; yungsho nüsanü arü thrünpuhbo mütankih, tümüde nüsa thsungkheaknü ju qimürip labah.

¹⁷“Nüsanü nüsa mulong ching, Harü trük ha I kheaknü atobe ah de lümsho; inü küde thsah arü yankhitpü?

¹⁸Nüsanü arü dütre, tüshe ATUNGPUH nüsa Thrünpuhnü Pharao tüsho Ijiprübo kheak tümü rhimokheanü nüsanü lümkhitang,

¹⁹nüsa müknü angükhi rükakikhi ato, amükheahmihbe, khinthiyinbe, tüsho Wuto khahnü chunghuhde ATUNGPUH nüsa Thrünpuhnü nüsa bekhit; jumonü ATUNGPUH nüsa Thrünpuhnü nüsanü trede alakhi mihtsürü alala ju ruk rhimobah.

²⁰Kheaküshe ATUNGPUH nüsa Thrünpuhnü aninga larü, nüsa kheaknü jika larü müdükheakkhamyi khiungde arü bolung mukhutopü yüshihbah.

²¹Nüsanü arü ki dümüyinsah; tümüde ATUNGPUH nüsa Thrünpuh, ato tüsho atrebe Thrünpuh nüsa bolung lah.

²²Tüsho ATUNGPUH nüsa Thrünpuhnü harü trükbo adümdümnü nüsa müngühnü yankhita bahbah; nüsanü arü khülangkiyu thsüde düdükheakshih, jude thsüsho nüsa thsungkheaknü mütüm shiwühbo mükhebinde akambah.

²³Tüshe arübo müyinnimde müdükheakkhamyi khiungde ATUNGPUH nüsa Thrünpuhnü arübo nüsa kilim jihbah.

²⁴Tüsho apinü arü kiulongthsürübo nüsa khah ching jihbah, tüsho nüsanü arü mung thüning bukkhüpnü dükheakshihbah; nüsanü arü müdükheakkhamshihyi khiungde she mihtsürünü nüsa azhihde müzhipkhuk.

²⁵Arü thrünpuhbo thsüa zokhi nüsanü monü atakbah; nüsanü arü kheak lakhi shotoyinchi yungsho suna dümürüh, yungsho nihbuh thsungkheak dulu, jude thsüsho junü nüsa mükhiplobah; tümüde ha ATUNGPUH nüsa Thrünpuh kilim athraneanbe lah.

²⁶Tüsho nüsanü athraneanbe kukruk nüsa yam ching hande arübahle ju ruk muthrumünean dükamshih; nüsanü hoju khülang kinü thraneanang tüsho bahyukang, tümüde ha muthrumünean kukruk lah.