Read Yimchungru Naga Johan 1 Bible Online

Johan 1 - Yimchungru Naga bible

Johan 1

¹Atankih ching Thiyu lakheah, Thiyu ju Thrünpuh lung lakheah tüsho Thiyu ju Thrünpuh lakheah.

²Atankih chingnü api Thrünpuh lung lakheah.

³Lüpdükhi api hode thrün tüsho thrüna lakhi ching api mübede tümü she mülakheah.

⁴Api kheak rhangdung lakheah, tüsho rhangdung ju mihtsürü ayin lakheah.

⁵Ayinnü amiting ching tahchoh, tüsho amitingnü ju müyihdokhuk.

⁶Thrünpuh kilimnü athiyikhi mihtsürü khülang amung Johan lakheah.

⁷Ha mihtsürü ju api hode alala kinshihpü ayin thiyumütsan thsüpü arü.

⁸Api ju ayin yung, tüshe ayin thiyumütsan thsüpü arüshih.

⁹Thiyuro ayin ju mihtsürü aban kilim ayin jihkhi alomi ching arükheah.

¹⁰Api alomi ching lakheah, alomi ju api hode thrün, tüsho alominü api mümükheah.

¹¹Api nihbuh lomi lim arü, tüshe nihbuh mihtsürünü api müleangkhi.

¹²Tüshe api leangkhirü ahihkhüh kilim, api mung ching kinrü kilim she apinü Thrünpuh tsührü kampü alim jih:

¹³Arübo thiyihnü yung, shih lümkhinü yung, mihtsürü lümkhinü yung tüshe Thrünpuh hode zübe.

¹⁴Thiyu ju shih kam tüsho isa bolung la, tüsho mihmüthsüm le thiyuronü mide alakhi lapkhiung tsührü müretah isanü ngü.

¹⁵Johannü api thiyumütsan thsüde tüsho zhide tha, “Inü thade alabuh ju ha, ‘Shepü I dunglim arüchonü I kheaknü atobe, tümüde api I müngühnü alakheah.’ ”

¹⁶Tüsho api kim khiukkhi ching isanü müngühmühi kheaknü müngühmühi leangkhi.

¹⁷Tümüde yakzan ju Mosa hode jih, tüshe Jisu Khrista hode amüthsüm tüsho thiyuro arü.

¹⁸Shenü she tümü kim ching she Thrünpuh müngü. Abuh khüh kheak lakhi lapkhiung tsührünü lang api khipkhit.

¹⁹Kheakü ha Jirusalem ching Jihudarünü amükeamrübo le Levirübo ki api she a de akeopü thiyichoki Johan thiyumütsan lakheah.

²⁰Apinü müreanglode khipkhitde tha, “I Khrista yung.”

²¹Tüsho arünü api ki keo, “Dale tüsho she a? Nü Elija a shi?” Apinü alo, “I a yung.” Arünü keo, “Nü wukihrü a shi?” Tüsho apinü alo, “Yung.”

²²Judüki arünü api ki tha, “Isanü isa thiyirü ki alopü thsüde nü she a? Nü dünkheak nünü küde thacho?”

²³Apinü alo, “I ju Isaia wukihrünü athakhi nangde ‘Sunglo ching azhikhi düsheak khülang: Atungpuh limro mukhiungarihdo thsüjang.’ ”

²⁴Kheakü thiyia larübo ju Pharisirü kilimnü alakheah.

²⁵Tüsho arünü api ki keokhide tha, “Nü ju Khrista, Elija yungsho wukihrü she yungsho tümü thsüde nünü bapticho?”

²⁶Johannü arü ki alo, “Inü nüsa kenü baptichoh, nüsanü mümükheahkhi khülang nüsa bolung zhiplah.

²⁷Shepü I dunglim arüchonü ajingkhümpü zhi she inü atrünjihpü müthülün.”

²⁸Harübo Johannü baptide alapung Jordan hobah Bethani ching dünji.

²⁹Ashidopü Johannü api kilim Jisu arüde ngü, tüsho tha, “Kheahang, alomi neak hande atsokhi Thrünpuh namfimihnunu!

³⁰Ha inü athabuh ju ah, ‘I dunglim arükhi mihtsürü I kheaknü atobe, tümüde api I müngühnü alakheah.’

³¹Inü api mümükheah tüshe api Israel ki akhiuka huhpü lah, jumonü inü kenü baptide arü.”

³²Tüsho Johannü thiyumütsan thsüde tha, “Yinmi chingnü müthrithrümpü nangde me akikhi inü ngü tüsho api ju anihbuh kheak la.

³³Inü api mümükheah, tüshe shepünü kenü baptipü I thiyikheanü I ki tha, ‘Me akibah api kheak lade shepü nünü angükhea, api ju Amüsüh Menü baptijihbuh lah.’

³⁴Tüsho ha Thrünpuh tsührü ah de inü ngü tüsho thiyumütsan thsü.”

³⁵Kheaküshe ashidopü, Johannü ajingyanrü mahne bebah zhip.

³⁶Tüsho api tsahde alachoki Jisu kheak kheahde tha, “Thrünpuh namfimihnunu kheahang!”

³⁷Jingyanrü mahnenü apinü athakhi so, tüsho anenü Jisu dunglim yan.

³⁸Judüki Jisunü rholo tüsho ane api dunglim yande ngübah tha, “Nüke tümü yimcho?” Anenü api ki tha, “Rabbi (amütsan Thsangyurü), nü küching lacho?”

³⁹Apinü ane ki tha, “Arübah kheahang.” Anenü yübah api lapung kheah, tüsho ju nimung api lung la (ju anirelim 4 king ngüm lakheah).

⁴⁰Johannü athakhi sobah Jisu dunglim yankhi mahne lung khülang ju Simon Peter niurü Andria lakheah.

⁴¹Apinü akhuhde akhiung Simon ngübah api ki tha, “Isanü Messia ngüdo” (amütsan Khrista).

⁴²Tüsho apinü anihbuh Jisu kilim bedarü. Küyimki Jisunü api kheak kheahkhea, apinü tha, “Nü a Jona tsührü Simon ah. Nü Kephas de ajihbah (amütsan Lung Khülang).”

⁴³Ashidopü Jisunü Galilee ching yüpü pungkhi, tüsho apinü Philip ngübah api ki tha, “I dunglim yanang.”

⁴⁴Kheakü Philip ju Andria le Peter büne kiuto Bethsaida chingnü alakheah.

⁴⁵Philipnü Nathanael ngübah tha, “Mosa yakzan ching tüsho wukihrübonü thrüta lakhi Josep tsührü Nazarethrü Jisu isanü ngüdo.”

⁴⁶Nathanaelnü api ki tha, “Nazareth chingnü tümükhüh atsü akhiukkhukba de?” Philipnü api ki tha, “Arübah kheahang.”

⁴⁷Jisunü Nathanael api kilim arüde ngü, tüsho api dünkheak tha, “Kheahang, amülim mülakhi thiyuro Israelrü!”

⁴⁸Nathanaelnü api ki tha, “Küde thsah nünü I mükheahla?” Jisunü api ki alojihde tha, “Philipnü nü müjiyide, nü khubasodung khüp binchoki inü nü ngükheah.”

⁴⁹Nathanaelnü alo tüsho api ki tha, “Rabbi, nü a Thrünpuh tsührü ah! Nü Israel kiulongthsüpuh!”

⁵⁰Jisunü alo tüsho api ki tha, “Inü nü khubasodung khüp binkhi ngüdo de athamonü nünü kincho de? Nünü harü kheaknü atobe ngübah.”

⁵¹Tüsho apinü anihbuh ki tha, “Atsütsü inü nü ki thachoh, ha dunglim nünü yinmi khimshuhbah Thrünpuh yunirübo Mihtsürü Tsührü kheak yükihla akila dükhi ngübah.”