Read Yimchungru Naga Johan 11 Bible Online

Johan 11 - Yimchungru Naga bible

Johan 11

¹Kheakü mihtsürü khülang amung Lazar tukthsüde alakheah. Api ju Mari tüsho achi Martha kiulong Bethani chingnü alakheah.

²Ha Mari, shepü niurü Lazar tukthsüde alakheanü, hoju Atungpuh kheak rhümthünea mujujihbe tüsho akuyünü ajing nanjihbe lakheah.

³Jumonü achi pürünü api ki yüshihde tha, “Atungpuh, nünü muzhode alabuh tukthsülah.”

⁴Jisunü ju sobah tha, “Ha tukthsü ju ashebe yung, tüshe Thrünpuh tsührü müretahbah.”

⁵Kheakü Jisunü Martha tüsho aniurü le Lazar muzho.

⁶Jumonü küyimki apinü anihbuh tukthsükhi sokhea, api binpung nimung mahne munglo.

⁷Ju dunglim apinü ajingyanrübo ki tha, “Isanü Judea lim alode yüanü.”

⁸Jingyanrübonü api ki tha, “Thsangyubuh, kheakü lang Jihudarünü nü kingpü yimdo, tüsho nüa ju ching alode ayüba de?”

⁹Jisunü alo, “Nimung khülang ching kimkhü 12 yung de? Khürünü animuro tsahsho, api jing mümükhechoh, tümütüsho apinü ha lomi ayin ngüchoh.

¹⁰Tüshe khürünü azhing ching tsahsho, api jing mükhechoh, tümütüsho api kheak ayin müla.”

¹¹Apinü harü tha, tüsho ju dunglim arü ki tha, “Isa müyamrü Lazar yapa lah, tüshe inü api yihmusupü thsüde ayübah.”

¹²Judüki jingyanrübonü tha, “Atungpuh, api yapa lasho atsübah.”

¹³Jisunü api shekhi thakheah tüshe ayapkhi ching sühakhimkhi apinü thachoh de arünü lüm.

¹⁴Judüki Jisunü arü ki khipkhitde tha, “Lazar shea lah.

¹⁵Tüsho nüsanü akinshihpü thsüde nüsa thsungkheaknü I ju ching mülakhi asühchoh. Judüalalashe, isanü api kilim yüanü.”

¹⁶Judüki Didama de ajikhi Thomanü rukhüh jingyanrübo ki tha, “Isa she api lung shepü thsüde thsangyubuh lung yüanü.”

¹⁷Jumonü küyimki Jisu arükhea, api ju kiuyuk ching nimung phüyi lakhi ngü.

¹⁸Kheakü Bethani ju Jirusalem phünide mail 2 bande alakheah.

¹⁹Tüsho Jihudarü ahihkhühnü Martha tüsho Mari mükamdoa, ane niurü dünkheak mulong shukheamde alakheah.

²⁰Judüki Marthanü Jisu arüchoh de aso müleangnü yübah api shoru, tüshe Mari a thüyam ching binde alakheah.

²¹Marthanü Jisu ki tha, “Atungpuh, nü ha ching lakhülaa, I niurü müshede alabah.

²²Tüshe kheaküshe Thrünpuh ki nünü tümüpürü kheangbanü, nü kilim jihbah de inü mükheahlah.”

²³Jisunü alibe ki tha, “Nü niurü arhang kamlobah.”

²⁴Marthanü api ki alo, “Akheam nimung arhang kamlokhi ching api asürübah de inü mükheahlah.”

²⁵Jisunü alibe ki tha, “I arhang kamlokhi tüsho rhangdung. Shepünü I kheak kinchonü, api shea lalashe arhang labah.

²⁶Tüsho sherünü I kheak lacho tüsho kinchonü küyimkishe müshe. Nünü ha kincho shi?”

²⁷Alibenü alo, “Am, Atungpuh, nü ju alomi ching arüpü lakhi Thrünpuh tsührü, Khrista ah de inü mükheahlah.”

²⁸Tüsho küyimki alibenü harü thakhea, anihbenü alimro ching yü tüsho ramde aniurü Mari jibah tha, “Thsangyurü arüa lah tüsho nü jihchoh.”

²⁹Alibenü ju soakede tsahmusubah api kilim arü.

³⁰Kheakü Jisu ju kiuto ching marüyi, tüshe Marthanü api shorukhi dangpung ching lakheah.

³¹Judüki alibe mulong shukheamde thüyam ching lakhi Jihudarübonü Mari wusubah nahde awukhiukkhi ngübah alibe yande wungdo wukhiukbah tha, “Alibe a kiuyuk ching mitrippü yüchoh.”

³²Küyimki Marinü Jisu lapung arübah api ngükhea, alibenü ajing ki khukningde tha, “Atungpuh, nü ha ching lakhülaa, I niurü müshede alabah.”

³³Jumonü küyimki alibe tüsho anihbe lung arükhi Jihudarü tripkhi Jisunü angükhea, api me ching thsünü tüsho küpkhukde alakheah.

³⁴Tüsho apinü tha, “Api küching yapshihla?” Arünü api ki alo, “Atungpuh, arübah kheahang.”

³⁵Jisunü trip.

³⁶Judüki Jihudarübonü tha, “Apinü küdükhüh anihbuh muzholanü kheahang!”

³⁷Tüsho arü khürünü tha, “Ha müktukkhi khimshuhjihbuhnü, Lazar she müsheshihde mülakhuk de?”

³⁸Judüki Jisunü kheaküshe api mulong mütsüde kiuyuk ching arü. Ju lungkhün mi kheak lung khülangnü khidoa lakheah.

³⁹Jisunü tha, “Lung ju lahkhia bahang.” Ashebuh achi Marthanü api ki alo, “Atungpuh, kheaküa shuhrhüm münimlah, tümüde api shekhi nimung phüyi thsüchoh.”

⁴⁰Jisunü alibe ki tha, “Nünü kinsho Thrünpuh müretahkhi ngübah de inü nü ki mütha de?”

⁴¹Jushu arünü ashekhi mihtsürü yappungnü lung ju lahkhia bah. Tüsho Jisunü abinkih-a kheahbah tha, “Abuh, nünü I ki sojihkhi nü ki makshe jihchoh.

⁴²Tüsho nünü kamruhroro I ki sojihchoh de inü mükheahlah, tüshe ha kheak zhipkhi mihtsürübonü nünü I thiyikheah de akinshihpü thsüde inü ha thachoh.”

⁴³Küyimki apinü harü thakheanü düsheak achangnü zhi, “Lazar, akhiukang!”

⁴⁴Tüsho ashebuh ju miphu-khimbonü akhah le ajingbo hingbah akhiuk, tüsho amiro ju khimnü muhiudoa lakheah. Jisunü arü ki tha, “Api trünang tüsho tsoshang.”

⁴⁵Judüki Mari lung arürü Jihudarü ahihkhühnü Jisunü arhimokhi ngübah api kheak kin.

⁴⁶Tüshe khürünü Pharisirü ki yübah Jisunü arhimokhi thaa huh.

⁴⁷Judüki amükeam putungrü tüsho Pharisirünü kiuthsü-binkiu bemukhungbah tha, “Isanü küde athsüba? Tümütüsho ha mihtsürünü khinthiyinbe hihde rhimochoh.

⁴⁸Isanü hanangde azuzu thsüshihsho, mihbüm abannü api kheak kinbah, tüsho Romrünü arübah isa lapung tüsho trükshih lude atsobah.”

⁴⁹Tüsho arü bolung, ju kam achangbe amükeambuh Kaifanü arü ki tha, “Nüsanü tümü mümükheah.

⁵⁰Trükshih abümnü adükheakpü kheaknü a mihtsürübo thsungkheak mihtsürü khülang shekhi atsübe ah de nüsanü mülümkhit.”

⁵¹Apinü ha anihbuh küdahnü mütha, tüshe ju kam achangbe amükeamrü thsükhinü Jisu ju Jihudarü trükshih dünkheak shebah de müchit,

⁵²tüsho ju trükshih thsungkheak lang yung tüshe Thrünpuh tsührübo hiumüzüta larü khülang kamde bemukhungpü lakheah.

⁵³Junangde ju nimungnü arünü api rhangdung lupü rük yim.

⁵⁴Jumonü Jisunü Jihudarü bolung kiumikheak mütsahde kam, tüshe ju chingnü sunglo phünikhi lomi, Ephraim de ajikhi kiuto ching yü, tüsho ju ching ajingyanrü lung la.

⁵⁵Jihudarü phungho-thünio thüninde alakheah, tüsho ahihkhühnü nihbuh tsangkhitpü phungho-thünio müngühnü ju lomi chingnü Jirusalem lim wutu.

⁵⁶Judüki arünü Jisu yim, tüsho arübo arüngyam ching zhipchoki arü bolung thaachih, “Atsütsü api thünio ching arüpü yung le nüsanü tümü lümcho?”

⁵⁷Kheakü amükeam putungrü tüsho Pharisirü chidonü, khürünü api ngüsho thiyusheak jihang junangde arünü api rambah de thiyukhüm jih.