Read Yimchungru Naga Johan 13 Bible Online

Johan 13 - Yimchungru Naga bible

Johan 13

¹Kheakü phungho-thünio müngüh küyimki api kim arüdo de Jisunü amükheahkhea, alomi ching larü nihbuh yo muzhokhinü, apinü khide amuzho huh.

²Tüsho arelim yimtsühchoki api yinatsühshihpü Simon tsührü Juda Iskariot mulong ching amünean menü rük yukjih.

³Jisunü api khah ching Abuhnü lüpdükhi jihdo tüsho api Thrünpuh kilimnü arükheah tüsho Thrünpuh kilim yüchoh de mükheahbah,

⁴yimtsühpungnü wusu tüsho akhimmih yihkhia zobah khimnunu khülang rüma lu.

⁵Ju dunglim apinü müsühmüra-phuru ching ke yukbah api jingyanrübo jing müsühjihpü tüsho apinü arümkhi khimnununü ananjihpü tankih.

⁶Jushu apinü Simon Peter kilim arü. Tüsho Peternü api ki tha, “Atungpuh, nünü I jing müsühjihba de?”

⁷Jisunü api ki alojihde tha, “Inü tümü rhimochonü nünü kheakü manikhit, tüshe ha dunglim nünü amükheahbah.”

⁸Peternü api ki tha, “Nünü küyimkishe I jing mümüsüh!” Jisunü api ki alo, “Inü nü mümüsühjihsho, nü I lung shihcham müla.”

⁹Simon Peternü api ki tha, “Atungpuh, I jing lang yung, tüshe I khahbo le I ku she!”

¹⁰Jisunü api ki tha, “Shepü kemüyih-a lanü jingbo lang amüsühbah, api pang abümnü müsühlah; tüsho khülang kheak hode nüsa alala müsühlah.”

¹¹Tümüde shepünü api yinatsühbanü apinü mükheahlah; jumonü apinü tha, “Nüsa alala a amüsüh yung.”

¹²Jumonü küyimki apinü arü jing müsühjihkheanü akhimmih lu tüsho binlobah arü ki tha, “Inü nüsa ki tümü rhimokheanü nüsanü mükheahla shi?

¹³Nüsanü I ki thsangyurü tüsho Atungpuh de jichoh, tüsho nüsanü dükde thachoh, tümüde I ju ruk ah.

¹⁴Junangde I nüsa Tungpuh tüsho Thsangyurünü nüsa jingbo müsühkheasho, nüsanü she khülangnü khülang jing müsühjihbeah.

¹⁵Tümüde inü nüsa ki rhimoa huhkhi nangde nüsanü arhimoshihpü nüsa ki amütsan khülang jihdo.

¹⁶Atsütsü inü nüsa ki thachoh, yamlarü khülang ju api putungrü kheaknü atobe yung; yungsho shepü thiyia lanü api thiyibuh kheaknü atobe yung.

¹⁷Nüsanü harü mükheahde rhimosho nüsa asühpü.

¹⁸Inü nüsa alala dünkheak mütha. Inü shepü mokhitdünü inü mükheahlah; tüshe amüsühyu dünjibah, ‘Shepü I lung yikhap tsühchonü I azhihde api lahzhi shuhkihdo.’

¹⁹Ju müdünjiyide inü nüsa ki thachoh, junangde küyimki ju dünjibanü, I api ah de nüsanü amükheahbah.

²⁰Atsütsü inü nüsa ki thachoh, shepünü inü athiyikhi leangkhichonü I leangkhichoh; tüsho shepünü I leangkhichonü I thiyibuh leangkhichoh.”

²¹Küyimki Jisunü harü thakhea, api me ching küpkhuk, tüsho khipkhitde tha, “Atsütsü inü nüsa ki thachoh, nüsa khülangnü I yinatsühbah.”

²²Judüki jingyanrübonü khülangnü khülang kheahachihbah apinü athakhi dünkheak lümshangmangde kam.

²³Jingyanrü bolung khülang, Jisunü amuzhokhi Jisu ki binde alakheah.

²⁴Jumonü apinü shepü dünkheak thachonü Simon Peternü api ki ajuh-a keoshih.

²⁵Junangde apinü Jisu ki sühde yülibah tha, “Atungpuh, ju shepü a?”

²⁶Jisunü alo, “Inü shepü ki yikhap kheam thsambah ajihbanü api ah.” Tüsho apinü yikhap ju thsambah Simon tsührü Juda Iskariot kilim jih.

²⁷Kheakü yikhapkheam tsüh dunglim, api kheak amünean yüzah. Jisunü api ki tha, “Nünü tümü thsüpü lanü nahde rhimoang.”

²⁸Tüshe apinü tümü amütsan anihbuh ki thakheanü dükhüm ki binrü shenü she mümükheah.

²⁹Tümüde Juda ju sho qiuqiu lamonü thünio thsungkheak arü yihnüpü thulopü yungsho apinü tümükhüh zhochihrü kilim jihpü Jisunü api ki thakheah de khürünü lüm.

³⁰Yikhapkheam leangkhia lubah apinü nahde wukhiuk. Tüsho ju are lakheah.

³¹Jumonü küyimki api wukhiukkhea, Jisunü tha, “Kheakü Mihtsürü Tsührü müretahdo, tüsho api kheak Thrünpuh müretahdo.

³²Api kheak Thrünpuh müretahsho, Thrünpuhnü api kheak anihbuh müretahbah, tüsho nahde api müretahbah.

³³Azürü nunubo, I nüsa lung anükhüh ruhde alabah. Nüsanü I yimbah; tüsho inü Jihudarü ki, ‘I küching yüchonü nüsanü marükhuk,’ de athakhi nangde, kheakü inü nüsa ki thachoh.

³⁴Nüsa khülangnü khülang muzhoachihpü inü nüsa kilim thiyuzüng aso khülang jihchoh; inü nüsa muzhokhi nangde, nüsa she khülangnü khülang muzhoachihang.

³⁵Nüsa khülangnü khülang muzhoachihsho, ha hode nüsa I jingyanrübo ah de alalanü amükheahbah.”

³⁶Simon Peternü api ki tha, “Atungpuh, nü küching yücho?” Jisunü api ki alo, “I küching yüchonü nünü kheakü I müyankhuk, tüshe anükhüh dunglim nünü I yankhukbah.”

³⁷Peternü api ki tha, “Atungpuh, tümü thsükhi kheakü inü nü müyankhukpü? Nü dünkheaknü inü I rhangdung jihbah.”

³⁸Jisunü api ki alo, “I dünkheaknü nünü nü rhangdung jihba de? Atsütsü inü nü ki thachoh, nünü mahsam ki I malokhiyi khiungde thununü mukhung.