Read Yimchungru Naga Johan 15 Bible Online

Johan 15 - Yimchungru Naga bible

Johan 15

¹“I kurungasoliu tsütsü, tüsho I Buh ju kurungasolu thsürü.

²I kheak aso masokhi khah aban apinü rhea bahchoh; tüsho aso asokhi khah aban hihde asoshihpü apinü mülakkhitchoh.

³Inü nüsa ki asukkhi yu hode nüsa müsühkhita lah.

⁴I kheak lang, tüsho I nüsa kheak labah. Aliu ching mülade akhahnü aküdah thsüde aso masokhi nangde, nüsa I kheak mülasho nüsa she masokhuk.

⁵I kurungasoliu, nüsa akhahbo. Shepü I kheak lacho, tüsho I api kheak lanü hihde asochoh; tümütüsho I mübede nüsanü tümü müthsükhuk.

⁶Khürünü I kheak mülasho, sangkhah nangde jipa bahchoh tüsho kungabahchoh; arünü jurü hanmukhungbah mo ching jipyukchoh, tüsho jurü aniuabahchoh.

⁷Nüsanü I kheak lasho tüsho I yubo nüsa kheak lasho, nüsanü tümü künlanü akheangbah, tüsho ju nüsa thsungkheak rhimobah.

⁸Nüsanü aso hihde asokhinü I Buh müretahbah; junangde nüsa I jingyanrübo thsübah.

⁹Abuhnü I muzhokhi nangde, inü she nüsa muzhodo; I muzho ching laang.

¹⁰Nüsanü I yuzüng zosho, inü I Buh yuzüng zobah api amuzho ching lakhi nangde nüsanü I muzho ching labah.

¹¹“I asühkhi nüsa kheak lapü tüsho nüsa asühkhi khiukde alapü thsüde inü harü nüsa ki asukdo.

¹²Inü nüsa muzhokhi nangde nüsa khülangnü khülang muzhoachihpü thsüde ha I yuzüng ah.

¹³Khürünü api müyamrü thsungkheak nihbuh rhangdung jihkhi kheaknü püpü amuzho atobe müla.

¹⁴Inü nüsa ki thiyukhüm jihkhibo nüsanü rhimosho nüsa ju I müyamrübo ah.

¹⁵Kheakü inü nüsa ki yamlarübo de müji, tümüde yamlarünü api putungrünü tümü rhimochonü mümükheah; tüshe inü nüsa ki müyamrübo de ji, tümüde inü I Buh kilimnü asokhi alala nüsa ki mükheahshihdo.

¹⁶Nüsanü I mokhitkhi yung, tüshe inü nüsa mokhit tüsho yübah tsüpde alabe nüsa sangaso asopü thsüde nüsa moyuk, junangde nüsanü tümüpürü I mung chingnü I Buh ki kheangbanü apinü nüsa kilim jihbah.

¹⁷Nüsa khülangnü khülang muzhoachihpü thsüde inü nüsa ki thiyukhüm jihchoh.

¹⁸“Alominü nüsa thraneansho, nüsa müthraneanyide I thraneando de nüsanü mükheahang.

¹⁹Nüsa ju alomi yo thsükhülaa, alominü nihbuh yo muzhobah, tütüshe nüsa ju alomi yo yung tüshe alomi chingnü inü nüsa mokhit, jumonü alominü nüsa thraneanchoh.

²⁰Inü nüsa ki, ‘Yamlarü khülang ju nihbuh putungrü kheaknü atobe yung,’ de athakhi lümkhitang. Arünü I thsümüchisho, nüsa she athsümüchibah. Arünü I yubo zosho, nüsa ki she anibah.

²¹Tüshe harü alala I mung dünkheaknü arünü nüsa ki rhimochoh, tümütüsho arünü I thiyibuh mümükheah.

²²I arübah arü ki masukkhülaa, arünü neak müyihbeaka labah, tüshe kheakü arü neak thsungkheak arünü amudopü müla.

²³Shepünü I thraneanchonü I Buh she thraneanchoh.

²⁴Shenü she mürhimokhi inü arü bolung mürhimokhülaa, arü neak mülade alabah; tüshe kheakü arünü ngüdo tüsho I le I Buh chido thraneando.

²⁵Tüshe ha yakzan ching, ‘Amütsan mülade arünü I thraneando,’ de thrüta lakhi yu dünjipü lakheah.

²⁶“Tüshe küyimki I Buh kilimnü inü nüsa kilim thiyipü lakhi arungrü arüba, Abuh kilimnü arükhi thiyuro Menü I dünkheak khipkhitbah.

²⁷Tüsho nüsanü she I thiyumütsan thsübah, tümütüsho atankih chingnü nüsa I lung lakheah.