Read Yimchungru Naga Johan 17 Bible Online

Johan 17 - Yimchungru Naga bible

Johan 17

¹Jisunü harü thabah, yinmi lim kheahde tha, “Abuh, kim arüdo. Nü tsührü müretahshang, junangde nü tsührünü she nü müretahbah,

²nünü api kilim jihkhi alala kilim lünnü rhangdung jihpü thsüde mihtsürü alala kurungkheak nünü api ki thiyukhüm-sühmüh jih.

³Tüsho ha lün rhangdung ah, junangde arünü nü ju lang thiyuro, Thrünpuh, tüsho nünü athiyikhi Jisu Khrista mükheahbah.

⁴Inü alomi ching nü müretahdo. Nünü I kilim rhimopü jihkhi rhimo bando.

⁵Tüsho kheakü, O Abuh, alomi mülayichoki nü lang I müretah lakhi nangde I müretahshang.

⁶“Nünü alomi chingnü I kilim jihkhi mihtsürübo ki nü mung akhiuka huhdo. Arübo nü yo lakheah, nünü arübo I kilim jih, tüsho arünü nü yu zo.

⁷Kheakü nünü I kilim jihkhi alala nü kilimnü ah de arünü mükheahdo.

⁸Tümüde nünü I kilim jihkhi yubo inü arü kilim jihdo; arünü jurü leangkhido, tüsho I ju nü kilimnü arükheah de tsükjide mükheahdo; tüsho nünü I thiyikheah de arünü kindo.

⁹Inü arü thsungkheak tamkhüntamnüjihchoh. Inü alomi thsungkheak mütamkhüntamnü tüshe nünü I kilim jihrü thsungkheak, tümüde arübo nü yo ah.

¹⁰I yo alala nü yo, tüsho nü yobo I yo ah, tüsho inü jurü ching müretahchoh.

¹¹Kheaküa I alomi ching müla, tüshe harübo alomi ching lah, tüsho I nü kilim arüchoh. Amüsüh Abuh, nünü I kilim jihrü nü mung hode zojang, junangde isa nangde arü khülang labah.

¹²I alomi ching arü lung lachoki nü mung ching inü arü küma zo. Nünü I kilim jihkhibo inü neakdo; amüsühyu dünjipü thsüde adükheakpü akhua lakhi tsührü kheak hode arü sheshe müdükheak.

¹³Tüshe kheakü I nü kilim arüchoh, tüsho arü kheak I asühkhi dünjishihpü thsüde inü harü alomi ching thachoh.

¹⁴Inü arü kilim nü yu jihdo; tüsho alominü arü thraneando tümütüsho I alomi yo yungkhi nangde arübo alomi yo yung.

¹⁵Arübo alomi chingnü luakhinpü inü nü ki mütamkhüntamnü, tüshe nünü arübo amütsübe chingnü küma lashang.

¹⁶I alomi yo yungkhi nangde arübo alomi yo yung.

¹⁷Nü thiyuro hode arü tsangkhitjang. Nü yu ju thiyuro ah.

¹⁸Nünü I alomi ching thiyikhi nangde, inü she arübo alomi ching thiyido.

¹⁹Tüsho arü dünkheaknü I tsangkhitchoh, junangde thiyuro hode arü she atsangkhitbah.

²⁰“Inü arü thsungkheak lang mütamkhüntamnü, tüshe arü yu hode I kheak kinpü larü thsungkheak she ah;

²¹junangde nü, Abuh I kheak, tüsho I nü kheak lakhi nangde arü alala khülang labah; isa nangde arü she khülang labah, junangde nünü I thiyikheah de alominü akinbah.

²²Tüsho isa khülang lakhi nangde arübo khülang lapü thsüde nünü I kilim jihkhi müretah arü kilim jihdo:

²³I arü lung lah, tüsho nü I lung lah; junangde arübo khülang tsütsü kambah, junangde nünü I thiyikheah, tüsho nünü I muzhokhi nangde arü muzhodo de alominü amükheahbah.

²⁴Abuh, nünü I kilim jihrü she I lapung I lung lashihnelah, junangde nünü I kilim jihkhi I müretah ngübah; tümüde alomi khimtan müngühnü nünü I muzho.

²⁵O thiyuro-lungki Abuh! Alominü nü mümükheah, tüshe inü nü mükheahdo; tüsho nünü I thiyikheah de harünü mükheahlah.

²⁶Inü arü ki nü mung khipkhitdo, tüsho ju khipkhitbah, junangde nünü I muzhokhi amuzho arü kheak labah tüsho I arü kheak labah.”