Read Yimchungru Naga Johan 18 Bible Online

Johan 18 - Yimchungru Naga bible

Johan 18

¹Küyimki Jisunü harü yubo thakhea, apinü ajingyanrübo bebah chamachih tüsho Kidron ayung hode yü. Ju dangpung ching shahwün khülang lakheah tüsho Jisu le ajingyanrübonü ju ching yüzah.

²Tüsho api yinatsühbuh Judanü she ju dangpung mükheahkheah; tümüde Jisunü ju ching ajingyanrübo alochode shorude la.

³Jumonü Judanü bonungrü khürü tüsho amükeam putungrübo le Pharisirübonü athiyikhi arüngyam aheangrübo bebah thsühnuk shuh tüsho tsünpung le tsünduphungbo hanbah ju ching yü.

⁴Jumonü Jisunü api kheak dünjipü alala mükheahbah mikhuhlim yü tüsho arü ki tha, “Nüsanü she yimcho?”

⁵Arünü api ki alo, “Nazarethrü Jisu.” Jisunü arü ki tha, “I api ah.” Tüsho api yinatsühbuh Juda she arü bolung zhip.

⁶Küyimki apinü arü ki, “I api ah,” de athakhea, arünü ashitlode yü tüsho alo kheak angak.

⁷Judüki apinü arü ki keolo, “Nüsanü she yimcho?” Arünü tha, “Nazarethrü Jisu.”

⁸Jisunü alo, “I api ah de inü nüsa ki thado. Jumonü I yimchosho, harübo arü limro ching yüshang,”

⁹junangde apinü, “Nünü sherü I kilim jihkheanü sheshe müdükheak,” de athakhi dünjipü lakheah.

¹⁰Judüki Simon Peternü nukshang dukkhitbah achangbe amükeambuh yamlarü tsülim nuku thsüpkhijih. Yamlarü mung ju Malka lakheah.

¹¹Jisunü Peter ki tha, “Nü nukshang nuktrüp ching yukang. I Buhnü I kilim jihkhi pung inü muyungbea de?”

¹²Judüki Rom bonungrü le wühkenorübo tüsho Jihudarü torübonü Jisu rambah rhük.

¹³Tüsho arünü api ju akhuhde Anna kilim bede yü, tümüde api ju, ju kam achangbe amükeamrü Kaifa akü lakheah.

¹⁴Mihtsürübo dünkheak mihtsürü khülang ashepü tsülah de Jihudarü ki ajuhkhi ju Kaifa lakheah.

¹⁵Simon Peter le jingyanrü püpünü Jisu dunglim yü. Kheakü jingyanrü püpü ju achangbe amükeamrünü mükheahde alakheah, tüsho Jisu lung achangbe amükeambuh yamkhuh ching yü.

¹⁶Tüshe Peter a wungdo ripit ki zhip. Judüki achangbe amükeambuhnü mükheahkhi jingyanbuhnü wukhiukbah ripit neakbe ki tha tüsho Peter ju beyuk.

¹⁷Judüki ripit neakkhi yamlaberünü Peter ki tha, “Nü she ha mihtsürü jingyanrü bolung belah yung de?” Apinü tha, “I a yung.”

¹⁸Tüsho yamlarübo le atorübo mo thsübah ju ching zhip, tümüde athsakkhinü arünü mo thüyüpde alakheah. Peternü arü lung zhipbah thüyüp.

¹⁹Judüki achangbe amükeambuhnü Jisu ki api jingyanrübo tüsho api kingaün-yakzan dünkheak keokhi.

²⁰Jisunü api ki alo, “Inü alomi ki khipkhitde thado. Inü Jihudarü mukhungpung sinagogbo le arüngyam ching kamruhroro thsangyudo, tüsho inü ramde tümü mütha.

²¹Tümüde nünü I ki keokhicho? Inü arü ki thabah asorübo ki keokhiang. Inü tümü thakheanü arünü mükheahlah.”

²²Küyimki apinü harü thakhea, ju ki zhiprü atorü bolung khülangnü amüyinü Jisu dambah tha, “Nünü achangbe amükeambuh ki ju ruk alobea de?”

²³Jisunü api ki alo, “Inü amütsü asuka lasho, amütsü thiyumütsan thsang; tüshe atsü thsüa lasho, tümü thsükhi nünü I damcho?”

²⁴Jushu Annanü jude rhükbah achangbe amükeambuh Kaifa kilim yüshih.

²⁵Kheakü Simon Peternü zhip tüsho anihbuh mo thüyüpa lu. Jumonü arünü api ki tha, “Nü she api jingyanrü bolung belah yung de?” Apinü reanglode tha, “I a yung!”

²⁶Achangbe amükeambuh yamlarü bolung khülang, Peternü anuku thsüpkhibuh betsührünü tha, “Inü api shahwün ching ngükhi yung de?”

²⁷Peternü kheaküshe reanglo; tüsho zukleangnü thununü khung.

²⁸Jushu arünü Jisu ju Kaifa kinü kovünor yam ching bede yü, tüsho ju yapsu mükikde alakheah. Tüshe arü a kovünor yam ching müyüzah, tümüde arünü phungho-thünio tsühpü thsüde arü arüngde alakheah.

²⁹Judüki Pilatnü arü kilim wukhiukbah tha, “Nüsanü ha mihtsürü azhihde tümü amudopü lubah arücho?”

³⁰Arünü api ki alo, “Api amütsü rhimorü yungkhülaa isanü api nü kilim müjih.”

³¹Pilatnü arü ki alo, “Nüsanü api bea lubah nüsa yakzan yande mahkhapang.” Jumonü Jihudarübonü api ki tha, “Isanü sheshe asheshihpü yakzan müla,”

³²junangde Jisunü api künangde ashebeanü amütsan thsüde athakhi dünjipü lakheah.

³³Judüki Pilatnü thüyam ching yüzahlobah Jisu ji tüsho api ki tha, “Nü Jihudarü kiulongthsüpuh a de?”

³⁴Jisunü api ki alo, “Ha nü küdahnü thacho shi dashi püpürünü I dünkheak nü ki thakhea?”

³⁵Pilatnü alo, “I Jihudarü a de? Nü trükshih tüsho amükeam putungrünü nü I kilim jihkheah. Nünü tümü rhimokhea?”

³⁶Jisunü alo, “I kiulongthsü ju ha lomi yo yung. I kiulongthsü ju ha lomi yo thsükhülaa, I jingyanrübonü keochihbah, junangde I Jihudarü kilim müjih; tüshe I kiulongthsü ju ha chingnü yung.”

³⁷Jumonü Pilatnü api ki tha, “Judüasho nü ju kiulongthsürü a shi?” Jisunü alo, “I kiulongthsürü ah de nünü dükde thado. Ha dünkheaknü I zübekheah tüsho ha lomi ching arükheah, junangde inü thiyuro thiyumütsan thsübah, thiyuro yo thsürü abannü I düsheak anichoh.”

³⁸Pilatnü api ki tha, “Thiyuro ju tümü a?” Tüsho küyimki apinü ha thakhea, apinü Jihudarü kilim wungdo wukhiuklobah arü ki tha, “Inü api kheak amülim tümü müyimkhit.

³⁹“Tüshe phungho-thünio ching inü mihtsürü khürü nüsa kilim dükhepü nüsa yakzan khülang lah. Jumonü inü nüsa kilim Jihudarü kiulongthsüpuh dükheshihnela shi?”

⁴⁰Judüki arü alalanü zhide tha, “Ha mihtsürü yung, tüshe Baraba!” Kheakü Baraba ju jangkhijangrarü lakheah.