Read Yimchungru Naga Johan 2 Bible Online

Johan 2 - Yimchungru Naga bible

Johan 2

¹Nimung mahsampü ching Galilee yo Kana kiuto ching arhangrü thünio lakheah, tüsho Jisu abe ju ching lakheah.

²Kheakü Jisu tüsho api jingyanrübo chido arhangrü thünio ching ju jiyuk.

³Tüsho küyimki yukhu banabahkhea, Jisu abenü api ki tha, “Arü yukhu müla.”

⁴Jisunü alibe ki tha, “Aliberü, nünü I ki tümü thsüpü? I kim marüyi.”

⁵Abenü yamlarübo ki tha, “Apinü nüsa ki tümüpürü thachonü, ju rhimoang.”

⁶Ju ching Jihudarünü arüngako müsühmüra thsungkheak ahorikhi qiumuk 20 le 30 yüzahkhi lung pangjiphüh 6 lakheah.

⁷Jisunü yamlarübo ki tha, “Pangjiphühbo ching ke mide yukang.” Tüsho arünü mikhiukde yuk.

⁸Tüsho apinü arü ki tha, “Kheakü ke anükhüh khipkhitang, tüsho thünio putungpuh ki lude yüang.” Tüsho arünü ju lu.

⁹Küyimki thünio putungpuhnü ke yungakheahkhea, ju yukhu kama lakheah, tüsho küchingnü arükheanü mümükheah (tüshe ke khiprü yamlarübonü a mükheahde alakheah); jumonü apinü yamkhün-kambuh ju ji.

¹⁰Tüsho apinü anihbuh ki tha, “Mihtsürü abannü akhuhde yukhu akebe ahiuhchoh, tüsho küyimki hanrübo müshangbanü amükebe ahiuhchoh; tüshe nüsa a kheakü khiungde yukhu akebe zoa lah.”

¹¹Ha akhuhbe khinthiyinbe Jisunü Galilee ching lakhi Kana ching rhimo, tüsho api müretah akhiuka huh; tüsho ajingyanrübonü api kheak kin.

¹²Ju dunglim api le abe, keoniorübo tüsho api jingyanrübonü Kapernaum lim yüki, tüsho arünü ju ching nimung anükhüh mung.

¹³Kheakü Jihudarü phunghothünio thüninde alakheah, tüsho Jisunü Jirusalem lim wutu.

¹⁴Tüsho apinü arüngyam ching moshipungbo le namfimihnu tüsho müthrithrümpübo tüsho sho müthriachihrübo shothsümolode ngü.

¹⁵Apinü arhapbe liubo thsübah namfimihnubo le moshipungbo bede arüngyam chingnü arü alala yankhitabah, tüsho apinü sho müthriachihrü shonakbo hiumüzütjihde dükhüm lahyuka bahjih.

¹⁶Tüsho apinü müthrithrümpü yinrübo ki tha, “Harü lubah tsoang! I Buh yam ju yinzüyindo yam dükamshih!”

¹⁷Judüki api jingyanrübonü ha thrüta lakhi lümkhit, “Nü yam mürheangkhinü I aniuabahdo.”

¹⁸Jumonü Jihudarübonü api ki tha, “Nünü ha rhimopü alim lah de ahuhpü isa ki khinthiyinbe tümü rhimoba?”

¹⁹Jisunü arü ki alo, “Ha arüngyam khapkheamang tüsho inü ju nimung mahsam chingnü athsülobah.”

²⁰Judüki Jihudarübonü tha, “Ha arüngyam thsüpü kam yirükheak thuruk ludo, tüsho nünü ju nimung mahsam chingnü athsülopü?”

²¹Tüshe apinü api pang arüngyam dünkheak thade alakheah.

²²Jumonü küyimki api ashe chingnü arhang kamlokheanü apinü arü ki thakhi ajingyanrübonü lümkhit; tüsho arünü amüsühyu le Jisunü athakhi yu kin.

²³Küyimki api phungho-thünio lachoki Jirusalem ching lakhea, apinü khinthiyinbe rhimokhi ngüchoki ahihkhühnü api mung ching kin.

²⁴Tüshe Jisunü arü kheak akin müla, tümüde apinü mihtsürü alala mükheah,

²⁵tüsho khürünü mihtsürü dünkheak thiyumütsan thsüpü yihnüpü müla, tümüde apinü mihtsürü kheak lakhi alala mükheah.