Read Yimchungru Naga Johan 21 Bible Online

Johan 21 - Yimchungru Naga bible

Johan 21

¹Harü dunglim Jisunü Tiberia keto ching jingyanrübo ki hanangde api huh:

²Simon Peter, rüpde-zübekhi de ajikhi Thoma, Galilee ching Kananrü Nathanael, Zebedee tsührübo, tüsho api jingyanrü püpürü mahne rukhüh lakheah.

³Simon Peternü arü ki tha, “I thüngüh rampü yüchoh.” Arünü api ki tha, “Isa she yüchoh.” Arünü nahde wukhiukbah sangkung ching yüzah tüshe ju re arünü tümü müram.

⁴Tüshe küyimki ayinkhikhea, Jisu ju keyean zhip; tütüshe jingyanrübonü ju Jisu ah de mümükheah.

⁵Judüki Jisunü arü ki tha, “Athrününgtsüngbo, nüsa tsühyungbe khürü la shi?” Arünü api ki alo, “Müla.”

⁶Tüsho apinü arü ki tha, “Sangkung tsülimpeang keang jipang, tüsho nüsanü tümüanü angübah.” Jumonü arünü jip, tüsho kheaküa thüngüh hihdakkhinü arünü thoa mulukhukde alakheah.

⁷Jumonü Jisunü amuzhokhi jingyanrü junü Peter ki tha, “Ha Atungpuh ah!” Küyimki ju Atungpuh thsüa lah de Simon Peternü asokhea, apinü yihkhita lakhi aleangbe khimmih yuka lu, tüsho keto ching jukyuk.

⁸Tüshe jingyanrü püpürünü sangkung anini chingnü thüngüh bede keang thobah arü tümüde arü alo kheaknü limshude müla, tüshe khahnap 200 bande alakheah.

⁹Arübo alo kheak arü akede arünü ju ching mokhih takkhi mo khülang ngü, tüsho thüngüh le yikhap ju kheak yihkih.

¹⁰Jisunü arü ki tha, “Nüsanü kheakü ramkhi thüngüh anükhüh lude arang.”

¹¹Simon Peternü wutu tüsho keang ju thüngüh atoto 153 mide zahde thobah alo kheak arü; tüsho khide hih-a lalashe keang ju müthsümünim.

¹²Jisunü arü ki tha, “Arübah tsühang.” Tütüshe api ju Atungpuh thsüa lah de mükheahbah, “Nü she a?” de jingyanrü shenü she api ki keopü mümürang.

¹³Jisunü arübah yikhap lu tüsho arü kilim jih, tüsho thüngüh she jude thsü.

¹⁴Api ashe chingnü arhang kamlobah Jisunü ajingyanrübo ki huhkhi ha mahsam kipü lakheah.

¹⁵Jumonü küyimki arünü yimtsühkhea, Jisunü Simon Peter ki tha, “Jona tsührü Simon, harü kheaknü alü nünü I muzhola shi?” Apinü alo, “Am, Atungpuh; inü nü muzholah de nünü mükheahlah.” Apinü anihbuh ki tha, “I yo namfimihnunubo mütrüang.”

¹⁶Apinü anihbuh ki mahne kipü tha, “Jona tsührü Simon, nünü I muzhola shi?” Apinü alo, “Am, Atungpuh; inü nü muzholah de nünü mükheahlah.” Apinü anihbuh ki tha, “I yo namfimihnubo kümang.”

¹⁷Apinü anihbuh ki mahsam kipü tha, “Jona tsührü Simon, nünü I muzhola shi?” Apinü anihbuh ki, “Nünü I muzhola shi?” de mahsam ki keomonü Peternü mulong mütsüde alakheah. Tüsho apinü tha, “Atungpuh, nünü alala mükheahlah; inü nü muzholah de nünü mükheahlah.” Jisunü api ki tha, “I yo namfimihnubo mütrüang.

¹⁸Atsütsü inü nü ki thachoh, küyimki nü athunu lakhea, nü küdah thsüde khimmih yihbah nünü amulongkhi lim tsah; tüshe küyimki nü ashinbanü, nünü nü khahbo chungbah, tüsho püpürünü nü khimmih yihjihbah tüsho nünü mümulongkhi lim bede ayübah.”

¹⁹Ha tümü limronü Peter shebah Thrünpuh müretahpü lanü amütsan apinü athakheah. Tüsho küyimki apinü ha thakheanü anihbuh ki tha, “I dunglim yanang.”

²⁰Judüki Peternü rholo tüsho Jisunü amuzhokhi, yimtsühchoki api rheang ki binbuh jingyanrü ngü tüsho tha, “Atungpuh, shenü nü yinatsühpü thsücho?”

²¹Peternü api ngübah Jisu ki tha, “Tüshe Atungpuh, ha mihtsürü küde?”

²²Jisunü api ki tha, “I arüpü khiungde inü api alashihpü mulongsho, nü tümü la? Nünü I yanang.”

²³Judüki ha jingyanrü müshe de alabah de ha thakhi keoniorü bolung bude yü. Tütüshe Jisunü a api müshe de mütha tüshe hade tha, “I arüpü khiungde inü api alashihpü mulungsho, nü tümü la”?

²⁴Hanü thiyumütsan jihbuh tüsho harü thrütkhi ju jingyanrü ha buh ah; tüsho api thiyumütsan thiyuro de isanü mükheahlah.

²⁵Jisunü püpü rhimokhi ahihdo lah. Jurü alala thrütkhülaa, athrütkhi hümnü alomiküp alala she mazühde alabah de inü lümchoh.