Read Yimchungru Naga Johan 3 Bible Online

Johan 3 - Yimchungru Naga bible

Johan 3

¹Pharisirü mihtsürü, Jihudarü yakzanshuhrü amung Nikodema lakheah.

²Ha mihtsürünü azhing ching Jisu ki arübah tha, “Rabbi, nü a Thrünpuh kilimnü arükhi thsangyurü ah de isanü mükheahlah; tümütüsho api lung Thrünpuh müladüa nünü arhimokhi harü khinthiyinbebo shenü mürhimokhuk.”

³Jisunü alo tüsho api ki tha, “Atsütsü inü nü ki thachoh, api müzübephulosho shenü she Thrünpuh kiulongthsü müngü.”

⁴Nikodemanü api ki tha, “Mihtsürü khülang azorü kambah küde thsah azübepü? Apinü mahne kipü abe buk ching wutubah azübeba shi?”

⁵Jisunü alo, “Khide tsükjide inü nü ki thachoh, shepü ke tüsho me ching müzübephulobanü apinü Thrünpuh kiulongthsü ching müyüzahkhuk.

⁶Shihnü zübekhi ju shih, tüsho menü zübekhi ju me.

⁷Nü zübephulobah de inü nü ki thakhi dümüyinsah.

⁸Apungnü külimpeang yünnelanü yünchoh, tüsho nünü ju düsheak sochoh, tüshe küchingnü arücho tüsho külim yüchonü nünü mümükheah, me ching zübekhi aban junangde lah.”

⁹Nikodemanü alo tüsho api ki tha, “Ha küde alapü?”

¹⁰Jisunü api ki alo, “Nü Israelrü thsangyurü thsübah harü mümükheah de?

¹¹Atsütsü inü nü ki thachoh, isanü tümü mükheahlanü ju asukchoh tüsho tümü ngüdünü thiyumütsan thsüchoh, tüshe nünü isa thiyumütsan müleangkhichoh.

¹²Inü nü ki alomi dünkheak thabah nünü mükinsho, nü ki yinmi dünkheak thakhi küde akinpü?

¹³Mihtsürü Tsührü yinmi chingnü akikhi kheak hode shenü she yinmi ching müyükihyi.

¹⁴Tüsho Mosanü sunglo ching phuruto shuhkihkhi nangde, Mihtsürü Tsührü she ashuhkihbah,

¹⁵junangde shepünü api kheak kinbanü müdükheak tüshe akheam müla rhangdung labah.

¹⁶“Tümütüsho Thrünpuhnü alomiküp muzhokhinü api tsührü lapkhiung jih, junangde shepünü api kheak kinbanü müdükheak tüshe akheam müla rhangdung labah.

¹⁷Tümüde Thrünpuhnü alomiküp bahyukshihpü atsührü arüshihkhi yung, tüshe api hode alomiküp khümkhitpü thsungkheak ah.

¹⁸Shepü api kheak kinchonü mübahyuk; tüshe shepünü mükinnü bahyukabahdo, tümütüsho apinü Thrünpuh tsührü lapkhiung mung ching mükin.

¹⁹Tüsho abahyukkhi ha lakhi ju, alomiküp ching ayin arü tüsho mihtsürübonü ayin kheaknü amiting muzho tümütüsho arü rhimobo amütsü lakheah.

²⁰Tümüde amütsü rhimorü abannü ayin thraneanchoh tüsho ayin lim marü, jude yungsho api rhimobo lahkhitbah.

²¹Tüshe shepünü thiyuro rhimochonü ayin lim arüchoh, junangde Thrünpuh ki mihyuanide arhimokhi api rhimobo mütsande angübah.”

²²Ju dunglim Jisu tüsho api jingyanrübo Judea lomi ching arü, tüsho ju ching arü lung api la tüsho bapti.

²³Kheakü Johan she Salim phüni Aenon ching baptide alakheah, tümütüsho ju ching ke suhde alakheah.

²⁴Tümüde Johan ju rihyam ching muyukyide alakheah.

²⁵Judüki Johan jingyanrü khürü le Jihudarü dükeak atsangkhitkhi dünkheak marüpachih akhiuk.

²⁶Arünü Johan ki arübah tha, “Thsangyurü, Jordan hobah nü lung labuh nünü thiyumütsan jihbuh thsü kheahang, apinü baptichoh, tüsho alala api kilim arüchoh!”

²⁷Johannü alo, “Yinmi chingnü api ki müjih-a lasho mihtsürünü tümü leangkhikhukpü.”

²⁸Nüsa thiyumütsan lah, junangde inü tha, “ ‘I Khrista yung,’ tüshe ‘l api müngüh thiyikheah.’

²⁹Yamkhün-kambe ju yamkhünkambuh yo ah; tüshe yamkhünkambuh müyamrü, shepünü zhipbah api ki anichonü yamkhün-kambuh düsheak hode tode asühachihchoh. Jumonü ha I asühkhi dünjido.

³⁰Api ato kambah, tüshe I a aninibe kambah.”

³¹Shepü akulimnü arüchonü alala kheaknü akube; shepü alomi kilimnü lanü alomi yo ah tüsho alomi dünkheak asukchoh. Shepü yinmi chingnü arüchonü alala kheaknü akube ah.

³²Apinü tümü ngükhea tüsho asokheanü asukchoh, tütüshe shenü she api yusheak müleangkhi.

³³Shepünü api yusheak leangkhichonü Thrünpuh ju thiyuro de junü adüngakhi thsüchoh.

³⁴Tümüde shepü Thrünpuhnü athiyikheanü Thrünpuh yubo asukchoh, tümütüsho Thrünpuhnü me ju adünbah müjihchoh.

³⁵Abuhnü atsührü muzhochoh, tüsho lüpdükhi api khah ching jihdo.

³⁶Shepünü atsührü kheak kinchonü akheam müla rhangdung lah; tüsho shepünü atsührü mükinnü rhangdung müngü, tüshe api kheak Thrünpuh bukakhiukkhi lah.