Read Yimchungru Naga Johan 4 Bible Online

Johan 4 - Yimchungru Naga bible

Johan 4

¹Jumonü, küyimki Jisunü Johan kheaknü alü jingyanrü kamshihde baptijihdo de Pharisirübonü asokhi Atungpuhnü amükheahkhea

²(Jisunü a mübaptijih tüshe api jingyanrübonü ah),

³apinü Judea chingnü chamachihde Galilee lim yülo.

⁴Tüshe api ju Samaria hode ayüpü yihnüpü lakheah.

⁵Jumonü Jakobnü atsührü Josep jihkhi lo phüni Samaria kiuto Saikar de ajikhi ching apinü arü.

⁶Jakob kekhip ju ching lakheah. Jumonü Jisunü hantsah ching keaka lakhinü kekhip ki bin. Ju animuro lakheah.

⁷Samaria liberü khülang ke khippü arü, tüsho Jisunü alibe ki tha, “I kilim ke yungpü kü.”

⁸Tümüde api jingyanrübo tsühyungbe thulopü kiuto ching yüa lakheah.

⁹Judüki Samaria liberünü api ki tha, “Küde thsah nü Jihudarünü I Samaria liberü ki ke yungpü kheangcho?” (Tümüde Jihudarünü Samariarü lung jimpung mütsühachih).

¹⁰Jisunü alibe ki alo, “Nünü Thrünpuh thsambah tüsho nü ki, ‘I kilim ke yungpü kü,’ de akheangbuh mükheahkhülaa, nünü api ki kheangbah, tüsho apinü nü kilim rhangdung ke jih-a labah.”

¹¹Alibenü api ki tha, “Atobuh, nü akhipbe müla, tüsho kekhip süklah. Dale küchingnü nünü rhangdung ke ngüpü?

¹²Nü a isa jipürü, api le atsührübo tüsho shiwühbo yungbah isa kilim kekhip jihbuh Jakob kheaknü atobe a de?”

¹³Jisunü alibe ki alo, “Shepünü ha ke yungbanü kethürilobah,

¹⁴tüshe shepünü inü api kilim jihpü lakhi ke yungbanü küyimkishe kemüthüri. Tüshe inü api kilim jihpü lakhi ke ju akheam müla rhangdung kenü bukpung khülang kambah.”

¹⁵Alibenü api ki tha, “Atobuh, I kemüthüripü yungsho kekhippü ha ching marüpü thsüde I kilim ju ke kü.”

¹⁶Jisunü alibe ki tha, “Yüang tüsho nü niubuh jibah ha ching arang.”

¹⁷Alibenü alo, “I niubuh müla.” Jisunü alibe ki tha, “I niubuh müla de nünü dükde thado,

¹⁸tümüde nü niubuh 5 lah tüsho kheakü shepü lanü ju nü niubuh yung; ju nünü thiyuro thado.”

¹⁹Alibenü api ki tha, “Atobuh, nü a wukihrü ah de inü kheahkhitlah.

²⁰Isa jipürübonü ha müzüng kheak kingaünkheah, tüsho Jirusalem ching nüsanü kingaünpü dangpung lah de nüsa Jihudarünü thachoh.”

²¹Jisunü alibe ki tha, “Alibe, I kheak kinang, nünü ha müzüng kheak yungsho Jirusalem ching Abuh mükingaünpü kim arüchoh.

²²Nüsanü tümü mümükheahnü ju kingaünchoh; isanü tümü mükheahlanü ju kingaünchoh, tümüde akhümkhit ju Jihudarü kilimnü lah.

²³Tüshe thiyuro kingaünrünü me tüsho thiyuro chingnü Abuh kingaünpü kim arüchoh; tüsho ha kheak lah; tümüde Abuhnü api kingaünshihpü hadürü yimchoh.

²⁴Thrünpuh ju me ah, tüsho sherünü api kingaünchonü me tüsho thiyuro ching kingaünbeah.”

²⁵Alibenü api ki tha, “Khrista de ajikhi Messia arüchoh. Küyimki api arübanü isa ki lüpdükhi thanaka huhbah.”

²⁶Jisunü api ki tha, “I shepü nü ki asukchonü api ah.”

²⁷Ju kim ching api jingyanrübo arü, tüsho apinü alibe ki asukachihkhi arünü müyinsah; tüshe, “Nü tümü yimcho, yungsho tümüde nünü alibe ki asukachihcho?” de shenü she mükeo.

²⁸Jushu alibenü kephüh zojihbah kiuto lim alode yü, tüsho mihtsürübo ki tha,

²⁹“Arang, inü arhimokhi alala thabuh mihtsürü kheang. Ha Khrista laba shi?”

³⁰Judüki arünü kiuto chingnü wukhiuk tüsho api kilim arü.

³¹Ju kim ching jingyanrübonü mushude api ki tha, “Rabbi, tsühyungang.”

³²Tüshe apinü arü ki tha, “I a nüsanü mümükheahkhi tsühyungbe lah.”

³³Jumonü jingyanrübo khülangnü khülang ki thaachih, “Khürünü api kilim tümüanü atsühpü hande arükhea shi?”

³⁴Jisunü arü ki tha, “I tsühyungbe ju I thiyibuh lümkhi rhimopü, tüsho api rhimo banpü lah.

³⁵Kheaküshe yimlupü khinu phüyi lah de nüsanü thachoh yung de? Kheahang, inü nüsa ki thachoh, nüsa mükbo rheakbah thulubo kheahang, tümüde yimlupü müna lah!

³⁶Shepünü yimluchonü mihkhah dün ngüchoh tüsho akheam müla rhangdung thsungkheak hibo hanmukhungchoh, junangde mükheanbuh le yimlubuh ane chido rukhüh asühachihbah.

³⁷Tümüde ha thakhi thiyuro lah: ‘Khülangnü mükheanchoh tüsho püpürünü yimluchoh.’

³⁸Nüsanü mürhimokhi yimlupü inü nüsa thiyido; püpürünü rhimodo, tüsho nüsanü arü rhimobo alü thsükhi yimludo.”

³⁹Tüsho, “Inü arhimokhi lüpdükhi apinü I ki thado,” de thiyumütsan thsükhi yu hode ju kiuto ching Samariarü ahihkhühnü api kheak kin.

⁴⁰Jumonü küyimki Samariarü api kilim arükhea, arünü api ju arü lung lapü mushu; tüsho apinü ju ching nimung mahne mung.

⁴¹Tüsho api yu hode ahihkhühnü kin.

⁴²Judüki arünü alibe ki tha, “Kheakü nünü athakhi hode isanü kinchoh yung, tümüde ha atsütsü Khrista tüsho alomiküp khümkhitbuh ah de isanü sodo tüsho mükheahdo.”

⁴³Nimung mahnepü dunglim apinü ju chingnü chamachihbah Galilee ching yü.

⁴⁴Tümüde Jisunü aküdah thsüde wukihrü khülang ju nihbuh lomi ching wüntre müla de thiyumütsan thsü.

⁴⁵Jumonü küyimki api Galilee ching arükhea, apinü Jirusalem ching thünio ching rhimokhi alala ngübah Galileerünü api leangkhi; tümüde arü she thünio ching yükheah.

⁴⁶Jumonü Jisunü Galilee ching lakhi Kana ching apinü kenü yukhu kamshihpung alode arü. Tüsho ju ching atorü tsührü khülang Kapernaum ching tukthsüde alakheah.

⁴⁷Küyimki apinü Jisu ju Judea chingnü Galilee ching akhiukdo de asokhea, apinü yü tüsho akibah atsührü thsüngupü api ki mushu, tümüde api ashepü thsüde alakheah.

⁴⁸Judüki Jisunü api ki tha, “Nüsabonü amüyinsahbebo tüsho khinthiyinbebo müngüyikia küdüküdü she akinpü yung.”

⁴⁹Atorü junü api ki tha, “Atobuh, I tsührü müsheyide akiang!”

⁵⁰Jisunü api ki tha, “Nü limro ching yüang; nü tsührü arhang lah.” Jumonü Jisunü api ki thakhi yu mihtsürü junü akin la, tüsho api limro ching yü.

⁵¹Tüsho api yükide alachoki, api yamlarübonü anihbuh shorubah tha, “Nü tsührü arhang lah!”

⁵²Judüki küyimki api tsüde akamkheanü apinü arü ki kim keokhi. Tüsho arünü api ki tha, “Yini anirelim 1 king ching api kheaknü phütsak tsodo.”

⁵³Jumonü Jisunü api ki, “Nü tsührü arhang lah,” de athakhi kim ching ah de abuhnü lümkhit. Tüsho api le ayamkhün alalanü kin.

⁵⁴Ha Jisunü Judea chingnü akhiukbah Galilee ching yüchoki khinthiyinbe rhimokhi mahnepü lakheah.