Read Yimchungru Naga Johan 5 Bible Online

Johan 5 - Yimchungru Naga bible

Johan 5

¹Ju dunglim Jihudarü thünio khülang lakheah, tüsho Jisunü Jirusalem lim wutu.

²Jirusalem ching Namfimihnu Chipiripit thüninde, Ibri yunü Bethesda de ajikhi, yünshim 5 lakhi kedükim khülang lah.

³Harü ching mihtsürü tukthsürü boto, müktukrü, jingkikrü, thripshe thsürübo ke aphapkhi aleangde yapa lakheah.

⁴Tümüde kim kim ching yunirü khülang kedükim ching yüki tüsho ke ju abükshih; tüsho ke abük dunglim shepü akhuh yüzahbanü api tukthsü tümü lanü thsüngude la.

⁵Ju ching mihtsürü khülang kam samrükheak tizheah tukthsükhi lakheah.

⁶Küyimki Jisunü api ju ching yapde angükhea, tüsho ju ching kim ashang ju ruk lakhi mükheahkhea, apinü anihbuh ki tha, “Nü tsüde kamnela de?”

⁷Tukthsübuhnü api ki alo, “Atobuh, ke abükchoki kedükim ching I yüzahshihpü mihtsürü she müla; küyimki I yüzahpü mürangbanü I müngüh khürü yüzah-a lachoh.”

⁸Jisunü api ki tha, “Asürübah nü yapkiu hanang tüsho tsahang.”

⁹Tüsho zukleangnü mihtsürü ju tsüde kambah ayapkiu han tüsho tsah. Tüsho ju nimung Amuni lakheah.

¹⁰Jumonü Jihudarünü athsüngubuh ki tha, “Ha Amuni ah; nünü yapkiu hanpü yakzan müla.”

¹¹Apinü arü ki tha, “Shepünü I thsüngukheanü I ki tha, ‘Nü yapkiu hanang tüsho tsahang.’”

¹²Judüki arünü api ki keokhi, “Nü yapkiu hanbah tsahang de nü ki thabuh ju shepü mihtsürü a?”

¹³Tüshe thsüngua labuhnü api sheanü mümükheah, tümüde ju ching lakhi boto ching tsoabah.

¹⁴Ju dunglim Jisunü arüngyam ching api ngü, tüsho tha, “Kheahang, nü tsüde kamdo, neak düyihbeaklo, jude yungsho amütsübe nü kheak arübah.”

¹⁵Mihtsürü junü chamachih tüsho api thsüngubuh ju Jisu ah de Jihudarü ki tha.

¹⁶Ha dünkheaknü Jihudarünü Jisu thsümüchipü tankih, tümütüsho apinü ju Amuni rhimo.

¹⁷Tüshe Jisunü arü ki alo, “I Buhnü kheakü khiungde rhimochoh, tüsho I she rhimochoh.”

¹⁸Jumonü Jihudarünü api laksahpü alü thsüde yim, tümütüsho apinü Amuni lang athsümünimkhi yung, tüshe Thrünpuh ju api Abuh ah de tha, tüsho api ju Thrünpuh lung rukhüh khea lu.

¹⁹Judüki Jisunü arü ki tha, “Atsütsü inü nüsa ki thachoh, atsührünü aküdahnü tümü müthsükhuk, tüsho Abuhnü tümü rhimode apinü ngüchonü ju rhimochoh; tümütüsho apinü tümü rhimochonü, atsührünü she ju ruk rhimochoh.

²⁰Tümüde Abuhnü atsührü muzhochoh, tüsho apinü arhimokhi alala api ki huhchoh; tüsho nüsanü amüyinsahpü thsüde harü kheaknü atobe rhimobo apinü anihbuh ki huhbah.

²¹Tümüde Abuhnü asherü arhang kamloshihde arü ki rhangdung jikhi nangde atsührünü she apinü amulongrü ki rhangdung jihchoh.

²²Tümüde Abuhnü sheshe mahmükhap tüshe mahkhap alala atsührü kilim jihdo,

²³junangde arünü Abuh wüntre jihkhi nangde alalanü atsührü wüntre jihbah. Shepünü atsührü wüntre müjihbanü api thiyibuh Abuh wüntre müjihchoh.

²⁴Atsütsü inü nüsa ki thachoh, shepünü I yu anicho tüsho I thiyibuh kheak kinchonü akheam müla rhangdung lah, tüsho mahkhap ching marü, tüshe ashe chingnü hode rhangdung lim yüdo.

²⁵“Atsütsü inü nüsa ki thachoh, kim arüchoh, tüsho kheakü asherünü Thrünpuh tsührü düsheak sopü lah; tüsho sherünü asobanü rhangdung labah.

²⁶Tümüde Abuh ju anihbuh kheak rhangdung lakhi nangde, api kheak rhangdung lapü atsührü ki mülüjihdo,

²⁷tüsho api kilim mahkhappü she thiyukhüm-sühmüh jihdo, tümütüsho api ju Mihtsürü Tsührü ah.

²⁸Ha kheak dümüyinsah; tümüde kiuyukbo ching larü alalanü api düsheak sopü kim arüchoh

²⁹tüsho akhiukbah — sherünü atsü rhimokheanü arhang kamlobah rhangdung labah, tüsho sherünü amütsü rhimokheanü arhang kamlokhi ching bahyukbah.

³⁰“I küdahnü tümü müthsükhuk. Inü asokhinü mahkhapchoh; tüsho I mahkhapkhi ju thiyuro-lungki, tümütüsho inü I lümkhi müyim tüshe I thiyibuh I Buh lümkhi yimchoh.

³¹Inü I küdah thsüde thiyumütsan thsüsho, I thiyumütsan ju thiyuro yung.

³²I thiyumütsan thsürü püpürü lah, tüsho apinü I thiyumütsan thsükhi thiyuro ah.

³³Nüsanü Johan kilim yüshih, tüsho apinü thiyuro thiyumütsan thsü.

³⁴Tütüshe inü mihtsürü kilimnü thiyumütsan müleangkhichoh; nüsa khümkhitpü thsüde inü harü thachoh.

³⁵Api ju takde tüsho yinde alakhi tsün lakheah, tüsho nüsanü api ayinatrüm ching asühachihpü mulongde alakheah.

³⁶Tüshe Johan kheaknü I thiyumütsan atobe lah; tümüde abanshihpü I Buhnü ajihkhi rhimo, tüsho inü rhimode alakhinü Abuhnü I thiyikheah de thiyumütsan thsüchoh.

³⁷Tüsho I Buh shepünü I thiyikheanü I thiyumütsan thsüchoh, nüsanü küyimkishe api düsheak muso yungsho api pang müngü.

³⁸Tüshe nüsa kheak api yu müla, tümütüsho apinü athiyibuh kheak nüsanü mükin.

³⁹Nüsanü amüsühyubo yimchoh, tümüde jurü ching akheam müla rhangdung lah de nüsanü lümchoh; tüsho harünü I thiyumütsan thsüchoh.

⁴⁰Tüshe nüsa rhangdung lapü thsüde nüsanü I kilim arüpü mümulong.

⁴¹Mihtsürü kilimnü inü wüntre müleangkhichoh.

⁴²Tüshe nüsa kheak Thrünpuh amuzho müla de inü mükheahlah.

⁴³I Buh mung chingnü I arükheah, tüshe nüsanü I müleangkhi; khürünü nihbuh mung ching arükhülaa, nüsanü api leangkhibah.

⁴⁴Nüsa khülangnü khülang wüntre luachihchoh tüshe Thrünpuh kilimnü arükhi wüntre müyimde nüsanü küde thsah akinpü?

⁴⁵I Buh miki inü nüsa müdambah de dülüm; nüsa müdampü khülang nüsanü mulonglamkhi Mosa lah.

⁴⁶Tümütüsho nüsanü Mosa kinkhülaa, nüsanü I kinbah; tümüde apinü I dünkheak thrüt.

⁴⁷Tüshe apinü athrütkhi nüsanü mükinsho, küde thsah I yubo kinpü?”