Read Yimchungru Naga Johan 7 Bible Online

Johan 7 - Yimchungru Naga bible

Johan 7

¹Ju dunglim Jisunü Galilee ching tsah, tümütüsho Jihudarünü api laksahpü yimkhinü Judea ching tsahpü mükünde alakheah.

²Kheakü Jihudarü Arüngkhimyam Thünio thüninde alakheah.

³Jumonü api keoniorübonü anihbuh ki tha, “Nü jingyanrübonü she nünü arhimokhi ngüpü thsüde ha chingnü chamachihbah Judea ching yüang.

⁴Tümütüsho amikheak akhiukde amükheahshihpü yimrünü a shenü she ramde mürhimochoh. Nünü harü rhimochosho, alomi ki nü huhang.”

⁵Tümüde api keoniorübonü she api kheak mükinde alakheah.

⁶Judüki Jisunü arü ki tha, “I kim marüyi, tüshe nüsa kim a kamruhroro thsakhama lah.

⁷Alominü nüsa müthranean, tüshe ju rhimo amütsü lah de inü thiyumütsan thsümonü I thraneanchoh.

⁸Nüsa a thünio ching wutuang, I a ju thünio ching muwutu, tümüde I kim dükde mukhiungyi.”

⁹Küyimki apinü arü ki harü thakhea, api Galilee ching lakheah.

¹⁰Tüshe küyimki akeoniorübo wutukhea, api she thünio ching amümürang thsüde wutu.

¹¹Judüki Jihudarübonü thünio ching api yimde tha, “Api küching la.”

¹²Tüsho mihtsürü bolung api dünkheak khide phiphirarakhi lakheah. Khürünü tha, “Api tsülah”; püpürünü tha, “Yung, apinü mihtsürü rükakichoh.”

¹³Tütüshe Jihudarü trekhinü shenü she aleangkheak akhiukde api dünkheak masuk.

¹⁴Kheakü thünio phulung ching Jisunü arüngyam ching wutubah thsangyu.

¹⁵Tüsho Jihudarübonü müyinsahde tha, “Ha mihtsürü küyimkishe mükhele küde thsah athrütkhi mükheahla?”

¹⁶Jisunü arü ki alo tüsho tha, “I kingaün-yakzan ju I yo yung, tüshe I thiyibuh yo ah.

¹⁷Khürünü api lümkhi rhimopü mulongsho kingaün-yakzan ju Thrünpuh kilimnü a shi I thiyukhüm-sühmühnü asukchonü amükheahbah.

¹⁸Shepünü nihbuh kilimnü asukchonü nihbuh müretah yimchoh; tüshe shepünü I thiyibuh müretah yimchonü thiyuro, tüsho thiyuro mulungkikhi tümü müla.

¹⁹Mosanü nüsa kilim yakzan jihbah nüsanü yakzan muzokhi yung de? Tümüde nüsanü I laksahpü yimcho?”

²⁰Mihtsürübonü alo tüsho tha, “Nü a amünean me lah. Shepünü nü laksahpü yimcho?”

²¹Jisunü arü ki alo, “Inü khülang rhimodo, tüsho nüsa alalanü müyinsahchoh.

²²Jumonü Mosanü nüsa kilim tsütabahpü jih (Mosa kilimnü yung tüshe jipürü kilimnü), tüsho nüsanü Amuni athrürü tsütabahchoh.

²³Mosa yakzan müthsümünimpü thsüde mihtsürü khülang Amuni tsütabahsho, inü Amuni mihtsürü khülang tsüde akamshihpü dünkheak nüsanü I kheak bukakhiukcho de?

²⁴Amikheaknü mahdükhap, tüshe thiyuro-lungkinü mahkhapang.”

²⁵Judüki Jirusalem ching khürünü tha, “Ha arünü alaksahpü yimbuh thsü yung de?

²⁶Tüshe kheahang! Apinü mulong tode thachoh, tüsho arünü api ki tümü mütha. Ha atsütsü Khrista ah de yakzanshuhrübonü mükheahla shi?

²⁷Judüalalashe, ha mihtsürü küchingnüanü isanü mükheahlah, tüshe küyimki Khrista arübanü, api küchingnüanü shenü mümükheah.”

²⁸Judüki Jisunü arüngyam ching thsangyude alachoki zhi, “Nüsa chidonü I mükheahlah, tüsho I küchingnüanü nüsanü mükheahlah; I küdahnü I arükhi yung, tüshe nüsanü mümükheahkhi I thiyibuh thiyuro lah.

²⁹Tüshe inü api mükheahlah, tümüde I api kilimnü ah, tüsho apinü I thiyikheah.”

³⁰Judüki arünü api rampü yim; tüshe shenü api kheak khah muchung, tümütüsho api kim marüyide alakheah.

³¹Tüsho mihtsürü ahihkhühnü api kheak kinde tha, “Küyimki Khrista arübanü ha mihtsürünü arhimokhi kheaknü apinü khinthiyinbe alü rhimoba shi?”

³²Botonü api dünkheak phiphirarakhi sobah Pharisirü le amükeam putungrübonü api rampü atorübo yüshih.

³³Judüki Jisunü arü ki tha, “I nüsa lung anükhüh ruhde alabah, tüsho I thiyibuh kilim yübah.

³⁴Nüsanü I yimbah tüshe I müngü, tüsho I küching lanü nüsanü marükhuk.”

³⁵Judüki Jihudarübonü arü bolung thaachih, “Api küching yüpü lümkhi isanü api müngüpü? Api ju isa mihtsürü lapung Greekrü lung yübah Greek thsangyupü lümla shi?

³⁶Apinü ha tümü thacho, ‘Nüsanü I yimbah, tüshe I müngü, tüsho I küching lanü nüsanü marükhuk’?”

³⁷Thünio ato akheam nimung Jisunü zhipbah zhide tha, “Khürü kethürisho, api I kilim arübah yungshang.

³⁸Shepünü I kheak kinbanü amüsühyunü athakhi nangde api mulong chingnü rhangdung ke ayungbo bukbah.”

³⁹Tüshe ha api kheak kinrübonü aleangkhipü me dünkheak apinü athakheah; tümüde Jisu müretah mülayikhinü Amüsüh Me müjihyide alakheah.

⁴⁰Jumonü boto ching ahihkhühnü ha thakhi sobah tha, “Atsütsü ha wukihrü ah.”

⁴¹Püpürünü tha, “Ha Khrista ah,” tüshe khürünü tha, “Galilee chingnü Khrista arüba de?

⁴²Khrista ju David tsühsoniuso chingnü tüsho David lapung Bethlehem kiuto chingnü arübah de amüsühyunü thachoh yung de?”

⁴³Jumonü api dünkheaknü mihtsürü bolung achamnak lakheah.

⁴⁴Kheakü khürünü api rampü lüm, tüshe shenü she api kheak khah muchung.

⁴⁵Küyimki atorübo arükheanü amükeam putungrübo le Pharisirübonü arü ki keo, “Tümü thsükhi nüsanü api bede marükhea?”

⁴⁶Atorübonü alo, “Mihtsürü shenü she ha mihtsürü ruk masuk!”

⁴⁷Judüki Pharisirünü arü ki tha, “Nüsa she bephülapa la de?

⁴⁸Yakzanshuhrü yungsho Pharisirü khürünü api kheak kinkhea de?

⁴⁹Tüshe harü botonü yakzan mümükheahkhinü muthrumüneana lah.”

⁵⁰Arü bolung kheyukrü, akhuhlim Jisu ki yübuh Nikodemanü arü ki tha,

⁵¹“Api musoyide tüsho api tümü rhimochonü mümükheahyide isa yakzannü mihtsürü khülang mahkhapcho de?”

⁵²Arünü api ki alo tüsho tha, “Nü Galilee chingnü a de? Yimang tüsho kheahang, Galilee chingnü wukihrü sheshe masürü.”

⁵³Tüsho mihbüm abannü nihbuh yam lim yü.