Read Yimchungru Naga Johan 9 Bible Online

Johan 9 - Yimchungru Naga bible

Johan 9

¹Kheakü Jisu hode alachoki, apinü mük tuka zübekhi mihtsürü khülang ngü.

²Tüsho api jingyanrübonü api ki keokhi, “Rabbi, api mük tuka zübekhi ju ha mihtsürünü a shi api berübuhrünü neak yihbeakkhea?”

³Jisunü alo, “Ha mihtsürü yungsho api berübuhrünü she neak müyihbeak, tüshe Thrünpuh rhimo api kheak akhiukpü lah.

⁴Nimung lachoki I thiyibuh rhimobo inü arhimobeah; shenü she mürhimokhukpü thsüde azhing arüchoh.

⁵I alomi ching la khiungdüa, I alomi ayinatrüm.”

⁶Küyimki apinü harü thakhea, alo kheak mukhiuk tüsho mükeke bede alo neam; tüsho apinü tuka lakhi mihtsürü mük ju mujujih.

⁷Tüsho apinü anihbuh ki tha, “Yübah Siloam (amütsan yüshih) kekhip chingnü müsühang.” Jumonü apinü yübah müsüh tüsho ngüde alodarü.

⁸Jumonü yamhingrübo le püpüki api mük tuka ngürünü tha, “Ha kakheangde abinkhi thsü yung de?”

⁹Khürünü tha, “Ha api ah.” Püpürünü tha, “Api ju buh ruk ah.” Apinü tha, “I api ah.”

¹⁰Jumonü arünü api ki tha, “Küde thsah nü mükbo khimshuhkhea?”

¹¹Apinü alo, “Jisu de ajikhi mihtsürü khülangnü alo mülebah I mükbo kheak mujujih tüsho I ki tha, ‘Siloam kekhip ching yübah müsühang.’ Jumonü inü yübah müsüh, tüsho I mük khimshuh.”

¹²Judüki arünü api ki tha, “Api küching la?” Apinü alo, “Inü mümükheah.”

¹³Püpüki mük tuka labuh arünü Pharisirü ki bedarü.

¹⁴Kheakü Jisunü alo neambah api mükbo khimshuhkhi ju Amuni lakheah.

¹⁵Jumonü künangde api mük khimshuhkheanü Pharisirünü api ki keolo. Apinü arü ki tha, “Apinü I mükbo ching alo yukjihbah I müsühde kam tüsho inü ngüchoh.”

¹⁶Jumonü Pharisirü khürünü tha, “Ha mihtsürü ju Thrünpuh kilimnü yung, tümütüsho apinü Amuni mümungchoh.” Püpürünü tha, “Aneakrünü küde thsah hadürü khinthiyinbe rhimokhukcho?” Tüsho arü bolung achamnak lakheah.

¹⁷Arünü mük tuka lakhi mihtsürü ki thalo, “Nü mük khimshuhkhi hode nünü api dünkheak küde thacho?” Apinü alo, “Api wukihrü khülang ah.”

¹⁸Tüshe arünü mük khimshuhbuh bebuhrü müjiyi khiungde api mük tukbah akhimshuhkheah de Jihudarünü akin mülakheah.

¹⁹Tüsho arübonü arü ki keokhide tha, “Nüsanü athakhi nüsa tsührü ha mük tuka zübekhea de? Dale küde thsah apinü kheakü ngücho?”

²⁰Api bebuhrünü arü ki alo, “Ha isa tsührü ah de isanü mükheahlah, tüsho api mük tuka zübekheah;

²¹tüshe küde thsah kheakü apinü ngücho, yungsho shenü amükbo khimshuhjihkheanü isanü mümükheah. Api azorü kama lale api ki keoang. Apinü aküdah thsüde athabah.”

²²Jihudarü tremonü api bebuhrünü jude athakheah, tümüde shepünü api ju Khrista ah de athabanü sinagog chingnü api yankhitbah de Jihudarünü münrüna lakheah.

²³Jumonü api bebuhrünü, “Api azorü kama lale api ki keoang,” de tha.

²⁴Jumonü arünü mük tuka lakhi mihtsürü ju ji tüsho api ki tha, “Thiyuro thapü Thrünpuh miki alokhiang! Ha mihtsürü aneakrü ah de isanü mükheahlah.”

²⁵Apinü alo, “Api aneakrü a shi yungnü inü mümükheah. Inü amükheahkhi khülang ju: I mük tuka lakheah tüshe kheaküa inü ngüchoh.”

²⁶Judüki arünü api ki thalo, “Apinü nü ki tümü thsükhea? Küde thsah apinü nü mükbo khimshuhkhea?”

²⁷Apinü arü ki alo, “Inü nüsa ki thaabahdo tüsho nüsanü mani. Tümüde nüsanü ju solopü künla le? Nüsa she api jingyanrü kamnela de?”

²⁸Judüki arünü api ki mükhemükimde tha, “Nü api jingyanrü ah tüshe isa a Mosa jingyanrübo ah.

²⁹Thrünpuhnü Mosa ki asukdo de isanü mükheahlah; ha buh ju küchingnüanü isanü mümükheah.”

³⁰Mihtsürü junü arü ki alo tüsho tha, “Tümü thsükhi, api küchingnüanü nüsanü mümükheah dükhi ju amüyinsahbe ah, tütüshe apinü I mükbo khimshuhjih!

³¹Thrünpuhnü a aneakrü ki manijihchoh de kheakü isanü mükheahlah; tüshe khürünü ju Thrünpuh kingaünrü thsüde api lümkhi rhimosho, apinü anihbuh ki anijihchoh.

³²Khürü mük tuka zübekhi khimshuhchoh de alomi tankihchokinü musoakheah.

³³Ha mihtsürü ju Thrünpuh kilimnü yungkhülaa apinü tümü müthsükhukde alabah.”

³⁴Arünü api ki tha, “Nü a neak chingnü zübemusukheah, tüsho nünü isa thsangyucho de?” Tüsho arünü api yankhitabah.

³⁵Arünü api yankhitdo de Jisunü so; tüsho apinü anihbuh ngübah tha, “Nünü Thrünpuh tsührü kheak kincho shi?”

³⁶Apinü alo tüsho tha, “Atungpuh, inü anihbuh kheak kinpü thsüde api ju she a?”

³⁷Tüsho Jisunü api ki tha, “Nünü api ngüdo tüsho shepünü nü ki asukachihchonü api ah.”

³⁸Judüki apinü tha, “Atungpuh, inü kinchoh!” Tüsho anihbuhnü api kingaün.

³⁹Tüsho Jisunü tha, “Mahkhappü thsungkheak ha lomi ching I arükheah, junangde shepünü müngünü angübah, tüsho shepünü ngülanü mük tukbah.”

⁴⁰Judüki api lung larü Pharisirü khürünü harü yubo sobah api ki tha, “Isa she mük tuka la de?”

⁴¹Jisunü arü ki tha, “Nüsa mük tukkhülaa neak müyihbeaka labah; tüshe kheakü nüsanü, ‘Isanü ngülah’ de thachoh, jumonü nüsa neakbo lah.”