Read Yimchungru Naga Yunir 1 Bible Online

Yunir 1 - Yimchungru Naga bible

Yunir 1

¹Amuzho Theophila: Inü akhuhbe hüm ching thrütkhi ju Jisunü arhimopü tüsho thsangyupü tankihkhi alala dünkheak,

²Amüsüh Me hode apinü amokhitkhi amüsühthsangyurübo kilim thiyukhümbo jihkhi dunglim, api bede yükihkhi nimung khiungde alakheah.

³Api thsünü dunglim, api rhangdung lakheah de harü ki huh tüsho mütsandakkhi ahihdo jih. Apinü arü ki nimung yirü dükeak akhiuka huh tüsho Thrünpuh kiulongthsü dünkheak asuk.

⁴Tüsho küyimki arü mukhungkhea, apinü arü ki thiyukhüm jih: “Jirusalem bahbah dütso, tüshe inü nüsa ki thakhi I Buhnü alokhikhi thsambah thsungkheak aleangang.

⁵Johannü kenü bapti, tüshe nimung anükhüh labah Amüsüh Menü nüsa baptibah.”

⁶Jumonü küyimki arü mukhungkhea, arünü api ki keokhi, “Atungpuh, nünü ha kim ching Israel kilim kiulongthsü jihloba de?”

⁷Tüsho apinü arü ki tha, “Abuhnü thiyukhüm-sühmüh ching zokhi nüsa thsungkheak kimbo yungsho akheahmünchi mükheahpü yung.

⁸Tüshe küyimki Amüsüh Me nüsa kheak arübanü nüsanü wu leangkhibah; tüsho nüsabo ju Jirusalem, Judea tüsho Samaria alala ching, tüsho alomi akheam khiungde I thsungkheak thiyumütsanbo labah.”

⁹Kheakü küyimki apinü harü thakhea, arünü kheahde alachoki api bekih, tüsho arü mük kinü api ju amonü liudoabah.

¹⁰Tüsho arünü api thüning lim yükihkhi kheahmüripde alachoki, mihtsürü mahne amüye yihbah zhipde ngü,

¹¹tüsho tha, “Galilee mihtsürübo, tümüde nüsanü thüning lim kheahde zhipla? Shepü nüsa mikinü thüning lim bekihkheanü, nüsanü Jisu yinmi ching yüde angükhi nangde, api junangde arübah.”

¹²Judüki arünü kiuto chingnü mail 1 bande alakhi Oliv Müzüng chingnü Jirusalem lim alode arü.

¹³Tüsho küyimki arü yüzahkheanü, arünü arü binkhi achangbe khiungshak ching yükih: Peter, Jakob, Johan, Andria, Philip, Thoma, Bartholoma, Mathi, Alphia tsührü Jakob, Zealot de ajikhi Simon tüsho Jakob tsührü Juda.

¹⁴Arü alala rukhühnü aliberübo le Jisu abe Mari tüsho api keoniorübo lung tamkhüntamnüpü mutukzhakde mukhungde la.

¹⁵Nimung anükhüh dunglim akinrübo 120 bande küdang la, tüsho Peternü thiyu thapü wusu,

¹⁶tüsho tha, “I keoniorübo, David hode Amüsüh Menü, Jisu rampü limbebuh kamkhi Juda dünkheak thakhi amüsühyu dünjipü lakheah;

¹⁷tümüde api isa bolung kheyuk tüsho ha tankihpü shihcham ching lakheah.”

¹⁸(Judanü amütsü thsüde amulokhi shonü thulu khülang thulo, ju ching api she; abuk jukphukbah bukning alala akhiuk.

¹⁹Tüsho ju Jirusalem ching larü alalanü mükheahde kam; jumonü arü yutha chingnü ju lu ki Akeldama de ji, amütsan “Thiyih Lu.”)

²⁰Tümüde Mungshikhün ching ha thrüta lah: “ ‘Api lapung zhikrangkhündo kamshang, tüsho ju ching she dülashih, püpürünü api rhimoyam lushang.’

²¹Jumonü Atungpuh Jisu isa lung yüla arüla de alachoki isa lung berü,

²²Johannü baptikhi chingnü tankihbah isa bolungnü api bede ayükih khiungde, harü bolung khülang api arhang kamlokhi thiyumütsan thsürü kambeah.”

²³Tüsho arünü mahne moa jih: Barsaba de ajikhi Josep (Justa düshe ji) tüsho Mathia.

²⁴Tüsho arünü tamkhüntamnü, “O Atungpuh, shepünü alala mulong mükheahla, hane bolung nünü shepü mokhitdünü huhang,

²⁵Judanü thsümünimbah nihbuh dangpung ching tsokhi, amüsüh-thsangyuthsangra rhimo shihcham lupü.”

²⁶Arünü azan thsü, tüsho azan ju Mathia kheak akhiuk. Tüsho api ju amüsühthsangyurü thürükheak khülang lung kheyuk.