Read Yimchungru Naga Yunir 10 Bible Online

Yunir 10 - Yimchungru Naga bible

Yunir 10

¹Kaesarea ching mihtsürü khülang amung Kornelia, Italia bonungrü boto de ajikhi kurungkheak wühkenorü lakheah.

²Api ju shuhmülanga jihrü, api yamkhün alalanü Thrünpuh trede, zhochihrübo kilim arung jihde, tüsho mutukzhakde Thrünpuh ki tamkhüntamnüde alakheah.

³Anirelim 3 king ngüm Thrünpuh yunirü arübah api ki thakhi michih ching mütsande ngü, “Kornelia”.

⁴Apinü trede api kheak kheah, tüsho tha, “Ju tümü a, Atungpuh?” Tüsho apinü anihbuh ki tha, “Nü tamkhüntamnü tüsho arung-jihkhibo mümihbe thsüde Thrünpuh miki akihdo.

⁵Kheakü mihtsürübo Joppa ching yüshang, tüsho Peter de ajikhi Simon bede arang;

⁶api ju keto yean lakhi thüyam ching, shihküp-rhimorü Simon lung binlah.”

⁷Küyimki api ki asukbuh yunirü chamachihkhea, apinü ayamlarü mahne tüsho mutuklode api aleangrü lungnü mulong-jihrü bonungrü mahne ji.

⁸Apinü arü ki tümü dünjikheanü thaa huh, tüsho Joppa lim yüshih.

⁹Ashidopü hantsahde kiuto phünide arübah, Peternü animuro ngüm thüyam mün kheak tamkhüntamnüpü yükih.

¹⁰Api khümde kam tüsho tümüanü atsühpü kün; tüshe arübo tsühyungbe thsakhamde alachoki apinü michih khülang ngü.

¹¹Apinü thüning khimshuhbah, tümüanü pheak ato nangde amünkheam phüyi kheaknü alomi kheak akishihde ngü.

¹²Ju ching ajing phüyi kihbe shiwüh mungji alala, keakninphuru tüsho thüning wuhnubo lakheah.

¹³Tüsho ju ching api kilim düsheak arü, “Asürang Peter; laksahang tüsho tsühang.”

¹⁴Tüshe Peternü tha, “Yung, Atungpuh; tümüde tümükhüh amünean yungsho amümüsüh inü küyimkishe mütsühakheah.”

¹⁵Tüsho mahne kipü api kilim düsheak arü, “Tümü Thrünpuhnü müsühdünü, nünü amünean ah de müthabe ah.”

¹⁶Ha mahsam ki dünji, tüsho kukruk ju thüning lim hande yükihabah.

¹⁷Küyimki Peter ju apinü angükhi michih dünkheak müyinsahde alakhea, kheahang, Kornelianü athiyikhi mihtsürübonü Simon yam keokhi, tüsho ripit ki zhip,

¹⁸tüsho Peter de ajikhi Simon ju ching binla shi yungnü akeopü jikhit.

¹⁹Küyimki Peternü michih lümde alakhea, Menü api ki tha, “Kheahang mihtsürü mahsamnü nü yimchoh.

²⁰Asürang tüsho arü lung lüm düshangmangde yükiang, tümüde inü arü thiyikheah.”

²¹Peternü mihtsürübo kilim yüki tüsho tha, “Nüsanü ayimkhi ju I ah; nüsa arükhi amütsan tümü a?”

²²Tüsho arünü tha, “Kornelia, wühkenobuh, alungki tüsho Thrünpuh trekhi mihtsürü, Jihudarü trükshih alalanü tsülah dükhi, amüsüh yunirünü khuhlanga huhbah nü api yam ching arüshihpü tüsho nünü athakhi anipü nü kilim thiyi.”

²³Jumonü apinü arübo anihbuh hanrü thsüde beyuka yapshih. Ashidopü apinü asürübah arü lung yü tüsho api keoniorü khürü Joppa chingnü api lung yü.

²⁴Tüsho ju shidopü arünü Kaesarea ching yüzah. Kornelianü arü mükkin thsü tüsho api buhtsührü le müyamrü khungbo jimukhung.

²⁵Küyimki Peter yüzahkhea, Kornelianü khukningbah api kingaün.

²⁶Tüshe Peternü api thomusude tha, “Zhipang; I she mihtsürü lang ah.”

²⁷Tüsho apinü anihbuh ki asukachihbah yüzah tüsho mihtsürü ahihkhüh mukhunga ngü;

²⁸tüsho apinü arü ki tha, “Jihudarünü püpürü trükshih lung arihpü yungsho rhuakheahpü yakzan müla de nüsanü mükheahlah, tüshe inü mihtsürü sheshe amünean yungsho amümüsüh müjipü I ki huh.

²⁹Jumonü küyimki I jipü arüshihkhea, inü marochihde arü. Dale tümü thsüpü I jipü arüshihkhea de inü nü ki keokhichoh.”

³⁰Tüsho Kornelianü tha, “Nimung phüyi hode, ha kim ching, anirelim 3 king ching I yam ching I tamkhüntamnüde alakheah; tüsho kheahang, mihtsürü khülang I müngüh khimmih azhingzhing yihbah zhip,

³¹tüsho tha, ‘Kornelia, Thrünpuhnü nü tamkhüntamnü sodo tüsho nünü jihchungkhi lümkhitdo.

³²Jumonü Joppa ching yüzahang tüsho Peter de ajikhi Simon keoshang; api ju keto yean shihküprhimorü yam ching lah.’

³³Jumonü inü nü kilim arüshih, tüsho nünü muzhode arü. Jumonü kheakü isa alala ha ching Atungpuhnü nü ki thiyukhüm jikhi anipü Thrünpuh miki lah.”

³⁴Peternü api mün khimshuh tüsho tha: “Tsükjide Thrünpuhnü jakmükheah de inü mütsanlah,

³⁵tüshe trükshih alala ching shepünü api trecho tüsho alungki rhimobanü api kilim aleangkhikhukbe lah.

³⁶Thrünpuhnü Jisu Khrista — api ju alala yo Atungpuh — hode mungtsü yusheak atsü zhiyukpü Israel kilim thiyusheak yüshihkhi nüsanü mükheahlah.

³⁷Johannü baptipü yusheak thsangyuthsangra dunglim Galilee chingnü tankihbah Israel ching tümü dünjikheanü nüsanü mükheahlah.

³⁸Nüsanü Nazarethrü Jisu kheak Thrünpuhnü Amüsüh Me tüsho wu dungkihkhi mükheahlah. Apinü lüpdükhi atsü rhimode tüsho Arimri wu bukkhüp lakhi alala thsüngude yü, tümüde api lung Thrünpuh lakheah.

³⁹Tüsho apinü Jihudarü lomi tüsho Jirusalem ching rhimokhi alala isa thiyumütsanbo lah. Arünü sangdung kheak zhinde api sheshih;

⁴⁰tüshe Thrünpuhnü mahsam nipü api asürüshih tüsho api amikheak akhiukshih;

⁴¹mihtsürü alala kilim yung tüshe thiyumütsanbo thsüpü Thrünpuhnü amokhitkhi, api ashe chingnü asürüshu api lung tsühyungrü isa kilim ah.

⁴²Tüsho apinü mihtsürübo ki thsangyuthsangrapü isa ki thiyukhüm, tüsho rhangdung lakhi le asherü kurungkheak mahkhaprü thsüpü Thrünpuhnü amokhitkhi thiyumütsan thsüpü jih.

⁴³Sherünü api kheak kinchonü api mung hode neak bahjihkhi leangkhichoh de wukihrübo alalanü api kilim thiyumütsan thsüchoh.”

⁴⁴Peternü ha thade alachoki, thiyu sorü alala kheak Amüsüh Me keam.

⁴⁵Tüsho Peter lung arükhi tsütabahrü bolung akinrübonü müyinsah, tümütüsho khiungkerü kheak she Amüsüh Me dungkih.

⁴⁶Tümüde arünü arübo ju püpürü yutha chingnü thade tüsho Thrünpuh shide so. Judüki Peternü khipkhit,

⁴⁷“Isa nangde harü mihtsürü Amüsüh Me leangkhia larü baptipü khürünü azhipdopü kukla de?”

⁴⁸Tüsho apinü Jisu Khrista mung chingnü baptipü arü ki thiyukhüm jih. Judüki arünü nimung anükhüh mungpü api ki keokhi.