Read Yimchungru Naga Yunir 11 Bible Online

Yunir 11 - Yimchungru Naga bible

Yunir 11

¹Kheakü Judea ching lakhi amüsüh-thsangyurübo tüsho keoniorübonü khiungkerü she Thrünpuh yu leangkhido de so.

²Jumonü küyimki Peter Jirusalem lim wutukhea, tsütabahrübonü api amülim jihde tha,

³“Tümü thsükhi nünü tsütamübahkhi mihtsürübo kilim yübah arü lung yimtsühkhea?”

⁴Tüshe Peternü akhinashunü arü ki thanaka huhpü tankih:

⁵“I a Joppa kiuto ching tamkhüntamnüde alakheah; tüsho michih khülang ching tümüanü pheak nangde thüning limnü amünkheam phüyi kheaknü akishihde inü ngü; tüsho I ki aki.

⁶Ju thüninde kheahshe ajing phüyi kihkhi shiwühbo le shihtsühbe shiwühbo, keakninphuru tüsho thüning wuhnubo inü ngü.

⁷Tüsho I ki thakhi düsheak inü so, ‘Asürang, Peter; laksahang tüsho tsühang.’

⁸Tüshe inü tha, ‘Yung, Atungpuh; tümü she amünean yungsho amümüsüh küyimkishe I mün ching müyüzahakheah.’

⁹Tüshe yinmi chingnü mahne kipü düsheaknü alo, ‘Thrünpuhnü tümü müsühdünü nünü amünean de müjibeah.’

¹⁰Ha mahsam kipü dünji, tüsho alala thüning lim thokihloa lu.

¹¹Ju kim ching Kaesarea chingnü I kilim arüshihkhi mihtsürü 3 I lapung thüyam limkhuh zhip.

¹²Judüki mudukiuhlode arü lung yüpü Menü I ki tha, junangde harü keoniorü 6nü I atrude arü, tüsho isanü mihtsürü yam ching ju yüzah.

¹³Tüsho künangde api yam ching yunirü zhipbah thade angükheanü apinü isa ki tha, ‘Joppa lim yüshang tüsho Peter de ajikhi Simon bedarang;

¹⁴apinü nü, tüsho nü yamkhün alala khümkhitpü yusheak nü ki thabah.’

¹⁵Inü thiyu thapü tankihchoki, atan isa kheak nangde Amüsüh Me arü kheak yükih.

¹⁶Tüsho Atungpuhnü athakhi yu inü lümkhit, ‘Johannü nüsa kenü baptijih, tüshe Amüsüh Menü nüsa baptibah.’

¹⁷Jumonü isanü Atungpuh Jisu Khrista kinchoki isa kilim jihkhi thsambah Thrünpuhnü arü kilim jih-a lasho, Thrünpuh yanlokhukpü thsüde I she lakhea?”

¹⁸Küyimki arünü ha sokheanü zhikde kamabah. Tüsho arünü Thrünpuh müretahde tha, “Judüasho khiungkerü kilim she Thrünpuhnü rhangdung lapü mulong müthrishihpü mülüjih-a lah.”

¹⁹Kheakü Stephen laksahkhinü thsümüchi lakhi hode amüzütrübonü Phoenikia, Saipra tüsho Antiok khiungde Jihudarü ki lang thiyusheak thade yü.

²⁰Tüshe arü khürü, Saipra tüsho Serene mihtsürü Antiok ching arünü Atungpuh Jisu dünkheak Greekrü ki she thsangyuthsangra.

²¹Atungpuh wu arü kheak lakheah, tüsho akinrü ahihkhüh Atungpuh kilim rholo.

²²Ha yusheak Jirusalem borü ching arü tüsho arünü Barnaba Antiok ching yüshih.

²³Küyimki api arübah Thrünpuh amüthsüm ngükheanü, apinü asüh; tüsho apinü arü alala ki mulong düküngde Atungpuh kheak akin lapü mulong tuthsuk;

²⁴tümüde api ju Amüsüh Me tüsho akinnü mide alakhi mihtsürü atsü lakheah. Tüsho boto ahihkhüh Atungpuh kilim bedarü.

²⁵Jumonü Barnabanü Saul yimpü Tarsa lim yü;

²⁶tüsho küyimki apinü anihbuh ngükhea, apinü Antiok lim bebah arü. Arünü kam khülang amuyung borü shoru, tüsho mihtsürü boto ato thsangyu; tüsho Antiok ching akinrübo ju akhuhbe thsüde Khristanrü de ajikheah.

²⁷Ju kim ching wukihrübo Jirusalem chingnü Antiok ching aki.

²⁸Tüsho arü bolung khülang amung Agabanü zhipbah alomiküp alala ching khümzung labah de me hode müchit; tüsho ha Klaudia kim ching dünji.

²⁹Tüsho mihbüm aban nihbuhnü akukkhi thülün Judea ching lakhi keoniorübo rungpü yüshihpü jingyanrübonü pungkhi;

³⁰tüsho junangde arünü Barnaba le Saul büne kheaknü azothsürübo kilim ju mühah-a yüshih.