Read Yimchungru Naga Yunir 12 Bible Online

Yunir 12 - Yimchungru Naga bible

Yunir 12

¹Ju kim ching Herod kiulongthsüpuhnü borü ching kheyukrü khürü thsümüchipü tankih.

²Apinü Johan akhiung Jakob nukshangnü laksah;

³tüsho junü Jihudarü asühshihkhi apinü ngübah Peter she arampü tankih. Ha phaüm muyukkhi thünio kim ching lakheah.

⁴Küyimki apinü anihbuh ramkheanü rihyam ching yuk, tüsho phungho-thünio dunglim mihtsürübo kilim bekhitpü thsüde api ju mihtsürü phüyiyi lakhi bonungrü khunung phüyi kilim aheangshihpü jih.

⁵Junangde Peter ju rihyam ching zo; tüshe borünü api thsungkheak Thrünpuh ki tamkhüntamnüjih.

⁶Ju re Herodnü api bekhitpü lachoki, Peter ju wuhrünliu mahnenü rhükbah bonungrü mahne dükeak yapde la, tüsho ripit ki aheangrübonü aheangde alakheah;

⁷tüsho kheahang, Atungpuh yunirü khülang akhiuk, tüsho akhiungshak ching ayin tahyuk; tüsho apinü Peter ju adubuh kheaknü niukmusude tha, “Nahde asürang.” Tüsho wuhrünliubo akhahbo chingnü ayoabah.

⁸Yunirünü api ki tha, “Nü khimmih yihang tüsho jingkhümpübo khümang.” Tüsho apinü jude thsü. Tüsho apinü anihbuh ki tha, “Nü chim kheak khim rüma lubah I yande arang.”

⁹Apinü wukhiuk tüsho api yande yü; yunirübonü arhimokhi ju atsütsülim ah de apinü mümükheah, tüshe apinü michih ngüchoh de lüm.

¹⁰Küyimki anenü akhuhbuh le mahnepü aheangrü hokheanü kiuto lim yükhi yinchi ripit ki arü. Aküdah thsüde junü ane kilim khimshuhjih, tüsho anenü wukhiukbah kiudunglimro khülang ho; tüsho zukleangnü yunirü ju api kinü dükheakabah.

¹¹Peter ju müsüde arü tüsho tha, “Atungpuhnü api yunirü thiyibah Herod le Jihudarünü mükkin thsükhi alala chingnü I bekhitdo de kheakü inü mütsando.”

¹²Küyimki api müsükhea, Mark de ajikhi Johan abe Mari yam ching, mihtsürü ahihkhüh mukhunga tamkhüntamnüde alapung yü.

¹³Apinü ripit aleanglim thrung tüsho Rhoda de ajikhi anünübenü alopü arü.

¹⁴Peter düsheak mütsanbah alibenü asühkhinü ripit mükhimshuhjihde alihde yü tüsho ripit ki Peter zhiplah de tha.

¹⁵Arünü alibe ki tha, “Nü bünchoh.” Tüshe jude ah de alibenü ningkihde tha. Arünü tha, “Ju api yo yunirü ah!”

¹⁶Tüshe Peternü mutuklode thrung; tüsho küyimki arünü akhimshuhkheanü api ngü tüsho müyinsah.

¹⁷Tüshe apinü arü ki malanpü akhah niukde thabah, künangde Atungpuhnü rihyam chingnü api bekhitkheanü kheana huh. Tüsho apinü tha, “Ha Jakob tüsho keoniorü ki thaang.” Jushu apinü chamachih tüsho püpü lim yü.

¹⁸Küyimki ayinkhikhea, Peter kheak tümü dünjikhea de aheangrü bolung ayingyingkhi ato lakheah.

¹⁹Tüsho küyimki Herodnü api yimbah müngükheanü, aheangrübo phüakheah tüsho arü asheshihpü thiyukhüm jih. Ju dunglim Herodnü Judea chingnü Kaesarea ching yükibah ju ching mung.

²⁰Kheakü Herodnü Tair le Sidon mihtsürü kheak bukakhiukde alakheah; jumonü arünü bo khülang thsübah api shorupü yü. Akhuhde arü rungshihpü arünü kiulongthsüpuh-yam atorü Blasta ju shukheam. Jushu arünü Herod ki yübah mungtsü thsungkheak keokhi tümütüsho arü lomi tsühyungbebo ju kiulongthsüpuh lomi chingnü ngüde alakheah.

²¹Akhukhi nimung Herodnü api kiulongthsürü khim yihbah kiulongthsü-binkiu kheak bin, tüsho arü ki thiyu tha.

²²Tüsho mihtsürübonü zhi, “Mihtsürü yung tüshe thrünpuh düsheak ah!”

²³Zukleangnü Atungpuh yunirünü api shik, tümütüsho apinü Thrünpuh müremütah; api ju musonü ru tüsho sheabah.

²⁴Tüshe Thrünpuh yu alü jade yü.

²⁵Tüsho Barnaba le Saul bünenü arü rhimo akuk ngü dunglim, Mark de ajikhi Johan bebah Jirusalem chingnü arülo.