Read Yimchungru Naga Yunir 13 Bible Online

Yunir 13 - Yimchungru Naga bible

Yunir 13

¹Antiok borü ching wukihrübo tüsho thsangyurübo Barnaba, Niger de ajikhi Simeon, Serenerü Lucia, Herod kiulongthsüpuh mahkhappung ching kheyukrü Manaen tüsho Saul lakheah.

²Arü Atungpuh kingaünde tüsho khümkeakde alachoki, Amüsüh Menü tha, “Inü arhimoshihpü arü jihkhi rhimo thsungkheak Barnaba le Saul büthsüang.”

³Judüki khümkeak thsüde ane kheak arü khahbo nimbah tamkhüntamnü dunglim ane thiyia yüshih.

⁴Junangde Amüsüh Menü thiyide, arünü Seleukia lim yüki; tüsho ju chingnü Saipra lim yü.

⁵Küyimki arübo Salami khiungkhea, arünü Jihudarü sinagogbo ching Thrünpuh yu zhiyuk. Tüsho arü rungpü Johan lakheah.

⁶Küyimki arünü kekung-lo hode Paphos khiungde ayükhea, Jihudarü arükchih wukihrü, Bar-Jisu de ajikhi wurük-huhrü ki arübo arü.

⁷Api ju kovünor Sergia Paula rüklakhi mihtsürü lung lakheah. Ju buhnü Barnaba le Saul ji tüsho Thrünpuh yu anipü yim.

⁸Tüshe wurük-huhrü Ilymanü (Greek yu ching ju api mung) akin chingnü kovünor rholoshihpü zhipdo.

⁹Tüshe Paul de ajikhi Saulnü Amüsüh Menü mibah api kheak kheahkih

¹⁰tüsho tha, “Nü arimri tsührü, akeangyu tüsho mülapmüjinü mide alakhi thiyurolungkirü alala riri, nünü Atungpuh limro khürangshihpü mutukloba de?

¹¹Kheahang, Atungpuh khah nü kheak lah, tüsho anükhühkheak nü mük tuka ani müngüde alabah.” Zukleangnü shumuliu tüsho amiting api kheak yükih tüsho api khah kheaknü athoshihpü mihtsürübo yimde yü.

¹²Judüki kovünornü adünjikhi ngübah kin, tümüde Atungpuh dünkheak thsangyukhi apinü müyinsah.

¹³Paul tüsho api müyamrübo Paphos chingnü hantsahmusu tüsho Pamphylia ching lakhi Perga ching arü. Tüsho Johannü arü zojihbah Jirusalem lim alode yü;

¹⁴tüshe arünü Perga chingnü tsahmusubah Pisidia ching lakhi Antiok ching arü. Tüsho arünü Amuni sinagog ching yüzahbah bin.

¹⁵Yakzan tüsho wukihrübo khe dunglim, sinagog yakzanshuhrübonü arü kilim yüshihde tha, “Keoniorübo, nüsanü mihtsürübo thsungkheak atuthsukyu tümükhüh lasho thaang.”

¹⁶Jumonü Paulnü zhip, tüsho akhah hihde tha: “Israel mihtsürü tüsho nüsa Thrünpuh trerübo, aniang.

¹⁷Ha Israel mihtsürü Thrünpuhnü isa jipürübo mokhitbah arü Ijip lomi ching lachoki ato kamshih, tüsho khah shuhkihde apinü arübo ju chingnü bekhit.

¹⁸Tüsho apinü kam yirü sunglo ching arü küm.

¹⁹Küyimki apinü Kanan lomi ching trükshih thüne thsümünimkhea, apinü arü kilim yamrüplurüp thsüde jih.

²⁰Ju dunglim apinü arü kilim kam 450 bande Samuel wukihrü khiungde mahkhaprübo jih.

²¹Tüsho ju dunglim arünü kiulongthsürü khülang kheang; jumonü Thrünpuhnü Benjamin trük mihtsürü Kish tsührü Saul kam yirü khiungde yakzan shuhshih.

²²Küyimki apinü anihbuh yihkhita bahkhea, arü thsungkheak apinü kiulongthsürü thsüpü David asürüshih; Thrünpuhnü api dünkheak tha, ‘Inü alümkhi alala rhimopü, inü amulongkhi mihtsürü khülang, Jesse tsührü David inü yimkhitdo.’

²³Thrünpuhnü alokhikhi nangde Israel mihtsürü khümkhitrü kamshihkhi ju David tsühsoniuso Jisu ah.

²⁴Jisu marüyichoki Israel mihtsürü alala mulong müthripü tüsho baptipü Johannü thsangyuthsangra.

²⁵Johannü api rhimo banpü lachoki tha, ‘Nüsanü I she ah de lümcho? I api yung. Tüshe kheahang, api jingkhümpü zhi inü atrünjihpü müthülünkhi khülang I dunglim arüchoh.’

²⁶“Keoniorübo, Abraham yamkhün tsührübo, tüsho nüsa bolung Thrünpuh trerübo, ha akhümkhit yu isa kilim arüshihdo.

²⁷Tümüde Jirusalem ching lakhi mihtsürübo tüsho arü limberübonü api akhümkhitbuh de mümükheah yungsho wukihrübo yu Amuni aban khekhi manikhit, tüshe arünü Jisu bahyukkhinü wukihrübo yu dünjishihdo.

²⁸Arünü api asheshihpü thsüde amudopü mülalashe api laksahpü thsüde Pilat ki keo.

²⁹Tüsho küyimki api dünkheak thrütkhi alala arünü abankhea, sangdung kheaknü api yihkhi, tüsho kiuyuk ching yapshih.

³⁰Tüshe Thrünpuhnü ashekhi chingnü api asürüshih;

³¹tüsho api lung Galilee chingnü Jirusalem khiungde atsahrü ki nimung ahihdo apinü akhiuka huh. Arübo mihtsürübo ki kheakü api thiyumütsanbo lah.

³²Tüsho Thrünpuhnü jipürü ki alokhikhi thiyusheak atsü isanü nüsa kilim hande arüchoh,

³³apinü ha ju arü tsührübo isa thsungkheak Jisu arhang kamloshihde dünjishih; ha mungshikhün mahnepü ching she thrüta lah, ‘Nü I tsührü, khihni I nü buh kamdo.’

³⁴Tüsho apinü ashekhi chingnü api arhang kamloshih, kheaküa küyimkishe kiuyuk ching müshuhabahshih, apinü hanangde tha, ‘Inü David ki alokhikhi amüsüh tüsho müngühmühi nü kilim jihbah.’

³⁵Jumonü apinü mungshikhün püpü ching she tha, ‘Nünü nü yo Amüsühbuh kiuyuk ching müshuhabahshih.’

³⁶Tümütüsho küyimki Davidnü api lün ching Thrünpuh mulongkhi tankihkhea, api sheabah; api jipürübo lung kiuyukabah tüsho aro abühabah;

³⁷tüshe shepü Thrünpuhnü asürüshihkheanü ashuhkhi müngü.

³⁸Jumonü keoniorübo, ha mihtsürü hode neak bahjihkhi nüsa ki zhiyukdo de mükheahang,

³⁹tüsho akinrü aban Mosa yakzannü zuzu mükamshihkhukkhi api hode lüpdükhi chingnü zuzu kamshih.

⁴⁰Jumonü wukihrübonü athakhi nüsa kheak müdünjipü kümkangang:

⁴¹‘Kheahang, nüsa luhmünerübo! Müyinsahang tüsho sheang! Tümüde khürünü thanaka huhhuh she nüsanü akin mülapü thsüde inü rhimochoh!’ ”

⁴²Paul le Barnaba ane sinagog chingnü awukhiukchoki, hadürü ju arübe Amuni she arü ki thapü mushu.

⁴³Tüsho sinagog chingnü müzüt dunglim, Thrünpuh amüthsüm ching mutuklode alapü anenü atharü Jihudarü le khiungkerü, Jihudarü kingaün ching mulong müthria larü ahihdonü Paul tüsho Barnaba büne dunglim yan.

⁴⁴Ju khin Amuni kiuto abümnü Thrünpuh yu anipü rukhüh mukhung.

⁴⁵Tüshe küyimki Jihudarünü boto ngükhea, arünü mükthsüde kam tüsho Paulnü athakhi reanglode api azhih.

⁴⁶Tüsho Paul le Barnaba anenü mulong tode tha, “Isanü nüsa ki akhuhde Thrünpuh yu thapü yihnüpü lakheah. Tüshe nüsanü ju bahyuk tüsho nüsa küdah thsüde lün rhangdung müthülünkhi khea lu, kheakü isanü khiungkerü kilim rholochoh.

⁴⁷Tümüde Atungpuhnü thiyukhüm jihde isa ki tha, ‘Inü nüsa ju khiungkerü khilim tsün kamshih, junangde nüsanü alomi alala ching akhümkhit hande arübah.’ ”

⁴⁸Tüsho küyimki khiungkerünü ha sokhea, arübo asüh tüsho Thrünpuh yu müretah; tüsho lün rhangdung thsungkheak mokhitrü alalanü kin.

⁴⁹Tüsho Atungpuh yu ju alomi alala ching bude yü.

⁵⁰Tüshe Jihudarünü kiuto ching adungto mihtsürü tüsho boto ching adungtorü Thrünpuh kingaünrü khiungkerü liberü thurumusu. Arünü Paul le Barnaba büne thsümüchipü tankih tüsho arü lomi chingnü yankhitabah.

⁵¹Tüshe anenü arü azhihde ane jing kheak yo asungthulung adankhia bah, tüsho Ikonium ching yü.

⁵²Tüsho akinrübo ju asühachihkhi tüsho Amüsüh Menü mide alakheah.