Read Yimchungru Naga Yunir 16 Bible Online

Yunir 16 - Yimchungru Naga bible

Yunir 16

¹Paulnü Derbe ching yü tüsho Khristanrü Timothi lapung Lystra ching arü. Abe ju Jihuda liberü akinrü tüsho abuh a Greekrü lakheah.

²Lystra tüsho Ikonium ching keoniorübonü Timothi tsülah de tha.

³Paulnü api lung Timothi arüshihpü mulong; tüsho apinü anihbuh bea lubah jurü dangpung ching lakhi Jihudarübo thsülimnü tsütabahjih, tümüde abuh ju Greekrü lakheah de alalanü mükheahlah.

⁴Ane kiutobo hode ayüchoki, Jirusalem ching amüsühthsangyurübo tüsho azothsürübonü khikzhakkhibo mihyuanide arhimoshihpü akinrübo ki thade yü.

⁵Junangde borübo akin ching düküngde kam tüsho nimung aban wühkhe alü kam.

⁶Tüsho anenü Phrygia le Galatia lomi hode yü, tümütüsho Amüsüh Menü Asia ching müthsangyuthsangrashih.

⁷Tüsho küyimki ane Mysia aredungyean arükheanü Bithynia lim yüzahpü mürang, tüshe Jisu Menü ane ki mümülü;

⁸jumonü Mysia hobah anenü Troa lim yüki.

⁹Tüsho azhing ching Paul ki michih khülang huh: Macedonia mihtsürü khülangnü zhipbah api ki mushude tha, “Macedonia lim arübah isa rungang.”

¹⁰Küyimki apinü michih ngükheanü, arü kilim thiyusheakatsü thsangyuthsangrapü Thrünpuhnü ike jikheah de adüngakhibah nahdü lang Macedonia lim yüpü thsakham.

¹¹Isanü sangkung chingnü tsahmusubah Troa chingnü langde Samothra lim hode yü, tüsho ashidopü Neapoli khiung.

¹²Ju chingnü Macedonia lomi-chamnak yo kiuto ato, Rom kheang de ajikhi Filipi ching yü. Isanü ju kiuto ching nimung anükhüh mung;

¹³tüsho Amuni isanü kiuto chipi aleanglim, tamkhüntamnü mukhung dangpung ngüpü mükkin thsüde ayung lim yü. Isanü bin tüsho ju ching mukhungkhi aliberübo ki asukachihpü tankih.

¹⁴Isa ki anide alarü bolung aliberü khülang amung Lydia, Thyatira kiuto chingnü, mürümmuchu khimmih yinrü Thrünpuh kingaünrü lakheah. Paulnü athakhi anipü Thrünpuhnü anihbe mulong khimshuhjih.

¹⁵Tüsho küyimki alibe ju yamkhün bede baptikheanü isa jide tha, “Nüsanü I Atungpuh ki thiyuro lakhi khejihsho, I yam ching arübah binang.” Tüsho alibenü isa ki reangkihde ji.

¹⁶Isa tamkhüntamnü dangpung lim yüde alachoki, menü müchitde aputungrü khide alü thsüshihde alakhi azhorü liberü khülangnü isa shoru.

¹⁷Alibenü Paul dunglim zhide yü, “Harü mihtsürü ha nüsa ki akhümkhit limro zhiyukkhi Khide Achang Thrünpuh yamlarübo ah.”

¹⁸Tüsho alibenü hade nimung ashang thsü. Tüshe Paulnü mulong zhipzhipde kambah me ki tha, “Alibe kheaknü akhiukpü Jisu Khrista mung chingnü inü nü ki thiyukhüm jihchoh.” Tüsho ju kim chingnü akhiukabah.

¹⁹Tüshe küyimki alibe putungrünü arü mulonglam sho-arüpung tsokhi ngükhea, arünü Paul tüsho Sila rambah yinzüyindopung yakzanshuhrübo miki bede yü;

²⁰tüsho arünü ane ju mahkhaptorü miki bede arübah tha, “Harü mihtsürübo ha Jihudarü ah tüsho isa kiuto küpkhuk jihchoh.

²¹Arünü isa Romrünü müleangkhikhukbe tüsho mürhimokhukbe yakzan mülakhi yakli thsangyuchoh.”

²²Botonü mukhungbah ane zündo; tüsho mahkhaptorübonü ane khimmih rukrüpjih tüsho tsobonü arhappü thiyukhümbo jih.

²³Khide kingbah arünü rihyam ching yuk, tüsho ane ju tsüde rihdoa zopü aheangrü ki thiyukhüm jih.

²⁴Ha thiyukhüm lubah, apinü ane ju rihyam alungbe ching ane jingbo ching sang khrihyukbah zo.

²⁵Tüshe tsüngphulung ching Paul le Sila büne Thrünpuh ki tamkhüntamnüde tüsho khün thsüde alakheah, tüsho aramrübonü ane ki anide alakheah,

²⁶tüsho zukleangnü ju ching muliuyuk ato züng, junangde rihyam khimtan niuklaplap; tüsho zukleangnü khimdopü alala khimshuh tüsho aramrü wuhrünliubo atreakabah.

²⁷Küyimki aheangbuhnü asürübah khimdopübo khimshuhkhi ngükhea, aramrü alala tsoa lah de lümbah api nukshang lubah aküdah thsüde alaksahpü thsü.

²⁸Tüshe Paulnü düsheak achangnü zhi, “Nü düyuri tümüde isa alala ha ching lah.”

²⁹Apinü tsünbo thsungkheak ji tüsho alihde yüzahbah ajande Paul le Sila büne miki mükhüm,

³⁰tüsho ane bekhitbah tha, “Atorübo, akhümkhitpü thsüde inü tümü rhimoba?”

³¹Tüsho anenü tha, “Atungpuh Jisu kheak kinang, tüsho nü le nü yamkhün khümkhitbah.”

³²Anenü api le ayam ching larü alala ki Atungpuh yu tha.

³³Tüsho ju kim chingnü ane bea lubah mübo müsühjih tüsho api yamkhün alala bede api bapti.

³⁴Jushu apinü ane ju api yam ching bede wutu, tüsho ane miki tsühyungbe zojih; tüsho apinü Thrünpuh kheak kinkhi dünkheak api yamkhün alala bede asühachih.

³⁵Tüshe küyimki ayinkhikhea, mahkhaptorübonü bonungrü ki thaa yüshih, “Jurü mihtsürübo tsoshang.”

³⁶Tüsho aheangbuh junü Paul ki thiyusheakbo jih, “Mahkhaptorübonü nüke tsopü thiyia lah; jumonü kheakü akhiukbah mungtsü chingnü tsoang.”

³⁷Tüshe Paulnü arü ki tha, “Isa Rom mihkhung ah, amülim mülade boto mikinü shikbah rihyam ching yukdo; tüsho arünü kheakü ike ramde adükhepü? Yung! Arü arübah ike bekhitshang.”

³⁸Bonungrünü thiyu harü mahkhaptorübo ki tha, tüsho ane Rom mihkhung ah de sobah arünü tre;

³⁹jumonü arünü arübah ane ki neak kheang, tüsho arünü ane bekhitbah kiuto bahbah atsopü tha.

⁴⁰Junangde anenü rihyam chingnü wukhiukbah Lydia rhuakheah; tüsho küyimki anenü keoniorübo ngükheanü arü ki mulong tuthsuk tüsho chamachih.