Read Yimchungru Naga Yunir 18 Bible Online

Yunir 18 - Yimchungru Naga bible

Yunir 18

¹Ha dunglim apinü Athen chingnü chamachihbah Korint ching yü.

²Tüsho apinü Pontus chingnü asürükhi Jihudarü amung Aquila, aniube Priscilla bebah Itali chingnü ashude arükhi ngü, tümütüsho Klaudianü Jihudarü alala Rom chingnü atsopü thiyukhüm jih. Tüsho apinü ane shorupü yü;

³tümütüsho ane nangde api she khimyam-thsürü lamonü ane lung rhimode mung.

⁴Apinü sinagog ching Amuni aban atsangachih tüsho Jihudarü le Greekrü mushuyukpü mürang.

⁵Küyimki Sila le Timothi büne Macedonia chingnü arükhea, Paul a Jisu ju Khrista lakheah de Jihudarü ki thiyumütsan thsüde thsangyuthsangrade alakheah.

⁶Tüsho küyimki arünü api azhihde aluhkhea, apinü akhim chingnü asungthulung dütrüna bahde arü ki tha, “ Nüsa thiyih nüsa kubo kheak lashang! Inü a tümü mümükheah. Kheakü I khiungkerü kilim yübah.”

⁷Apinü ju chingnü chamachihbah Thrünpuh kingaünrü Tita Justa yam ching yü; api yam ju sinagog ki lakheah.

⁸Sinagog yakzanshuhrü Krispanü api yamkhün alala bede Atungpuh kheak kin; tüsho Korintrü ahihkhühnü Paul ki anibah kin tüsho bapti.

⁹Tüsho tsüngre khülang Atungpuhnü Paul ki michih chingnü tha, “Dütre, tüshe asukang tüsho zhikde düla;

¹⁰tümüde I nü lung lah, tüsho mihtsürü shenü she nü trünthsüpü mukuk; tümüde ha kiuto ching I mihtsürü ahihkhüh lah.”

¹¹Tüsho apinü arü bolung Thrünpuh yu thsangyude kam khülang kheak khinu thuruk la.

¹²Tüshe küyimki Gallio ju Akaia kovünor lakhea, Jihudarünü arihbah Paul ram tüsho mahkhappung ching bedarü.

¹³Arünü tha, “Ha mihtsürünü yakzan azhihde Thrünpuh kingaünshihpü mihtsürübo münityukchoh.”

¹⁴Tüshe küyimki Paulnü thiyu thapü thsükhea, Gallionü Jihudarü ki tha, “O Jihudarübo, ha amülim yungsho athsümünim dünkheak thsükhülaa inü nüsa ki anipü kuklah;

¹⁵tüshe ha a thiyubo le mungbo tüsho nüsa yakzan dünkheak a le nüsa küdah thsüde khikzhakang: inü harü dünkheak a mahmükhap.”

¹⁶Jumonü apinü arübo mahkhappung chingnü yankhitabah.

¹⁷Tüsho arü alalanü sinagog yakzanshuhrü Sosthena rambah mahkhappung kinü king. Tüshe Gallionü ju rheakashe mükheah.

¹⁸Ju dunglim Paulnü nimung ashang mung, tüsho keoniorübo zojihbah api lung Priscilla tüsho Aquila bebah sangkung chingnü Siria lim yü. Mütsahmusuyide apinü Kenkrea ching ku hüt, tümüde apinü thiyuchihchima lakheah.

¹⁹Arüsam Efisia ching arü, tüsho apinü ane ju ching zojih; tüshe api a sinagog ching yüzahbah Jihudarübo ki atsangachih.

²⁰Küyimki arünü api ki aruhkhüh mungpü thakheanü apinü reanglo;

²¹tüshe arü chamachihde apinü arü ki tha, “Thrünpuhnü mulongsho I nüsa kilim alode arübah,” tüsho apinü Efisia chingnü tsahmusu.

²²Küyimki api Kaesarea khiungkhea, apinü wutubah borü ki salüm tha, tüsho Antiok lim yüki.

²³Apinü ju ching anükhüh kheak bin tüsho Galatia tüsho Phrygia lomi dangpung khülang chingnü püpü ching yüde akinrü alala düküngshih.

²⁴Kheakü Alexandria chingnü asürükhi Jihudarü amung Apollo ju Efisia ching arü. Api thiyu thasorü tüsho amüsühyu tsüde mükheahde alakheah.

²⁵Api ju Atungpuh limro ching thsangdana lakheah, tüsho apinü Johannü baptikhi lang mükheah-a lalashe me ching düküngde Jisu dünkheak tha tüsho thsangyu.

²⁶Apinü mulong tode sinagog ching thapü tankih; küyimki Priscilla le Aquila bünenü api dünkheak sokhea, anenü thüyam ching bede yübah Thrünpuh limro alü thsüde api ki lungkide thanaka huh.

²⁷Tüsho küyimki apinü Akaia lim hode ayüpü mulongkhea, keoniorübonü api mulong toshih, tüsho api leangkhipü akinrübo kilim thrüt. Küyimki api akhiungkhea, mihmüthsüm hode akinrübo apinü tode rung,

²⁸tümüde apinü amüsühyu huhde Jisu ju Khrista ah de boto chingnü Jihudarübo müzhakde kukabah.