Read Yimchungru Naga Yunir 2 Bible Online

Yunir 2 - Yimchungru Naga bible

Yunir 2

¹Küyimki thünimni-thünio nimung khiungkhea, arü alalanü rukhüh dangpung khülang ching mukhung.

²Tüsho zukleangnü yinmi chingnü düsheak khülang, apung müküpde ayünkhi nangde arü, tüsho arü binde alakhi thüyam alala mide kam.

³Judüki arünü mo nangde thiyutha chamnakkhibo ngü, tüsho arü aban kheak yükih.

⁴Tüsho arü alala Amüsüh Menü mide kam tüsho Menü athakhukshihkhinü püpürü yutha chingnü athapü tankih.

⁵Judüki thüning bukkhüp trükshih aban chingnü, shuhmülanga jihrü Jihudarü Jirusalem ching lakheah.

⁶Küyimki ha düsheak akhiukkheanü boto ju rukhüh mukhung tüsho yingyingde kam, tüsho arünü nihbuh yutha chingnü athakhi mihbüm abannü so.

⁷Judüki arü alala rukhühnü müyinsahde khülangnü khülang ki tha, “Kheahang, harü alalanü Galileerü yu thachoh yung de?

⁸Tüsho mihbüm abannü isa zübekhi yutha chingnü thade isanü asokhi ha küde?

⁹Parthiarü, Midiarü, Elamrü; Mesopotamia, Judea, Kappadokia, Pontus tüsho Asia,

¹⁰Phrygia le Pamphylia, Ijip tüsho Serene thüninde Libya ching larü; Rom chingnü rhuakheahrü

¹¹Jihudarü le khiungkerü chido Judearü kamabah, tüsho Kreterü le Arabrü — amüyinsahbe Thrünpuh rhimo thsüde arünü isa yutha chingnü athakhi isanü so.”

¹²Jumonü arü alala müyinsah tüsho shangmangde kambah khülangnü khülang ki tha, “Ha amütsan tümü laba?”

¹³Püpürünü keangrümünede tha, “Arübo yukhunü müshanga lah.”

¹⁴Tüshe Peternü thürükheak khülang lung zhipbah düsheak achangnü arü ki tha, “Juda mihtsürübo tüsho Jirusalem ching larü alala, nüsanü ha mükheahang, tüsho I yubo aniang.

¹⁵Tümüde harü mihtsürübo mümüshang, tümütüsho kheakü lang yapsu 9 kingchoh;

¹⁶tüshe Joel wukihrünü athakhi ha lah:

¹⁷‘Tüsho akheam nimungbo ching ha labah, Thrünpuhnü khipkhitchoh, junangde inü mihtsürü alala kheak I me dungkihjihbah, tüsho nüsa tsührübo le tsührübebonü müchitbah, nüsa tsührü athunurübonü michihbo ngübah, tüsho ashinbuhrübonü milimbo mibah;

¹⁸am, inü judüki I yamlarübo le yamlaberübo kheak I me dungkihjihbah tüsho arünü müchitbah.

¹⁹Tüsho inü akulim thüning ching khinthiyinbebo tüsho abolim alomi kheak amütsanbo, thiyih, mo, tüsho mokhüh liude ahuhbah;

²⁰Atungpuh nimung ato tüsho müretah arüpü müngüh, ani ju mitingdo akambah tüsho khinu ju thiyih nangde akambah.

²¹Tüsho shepünü Atungpuh mung jibanü akhümkhitbah.’

²²“Israel mihtsürübo, harü yubo aniang: Nazarethrü Jisu ju khinthiyinbebo, amüyinsahbebo tüsho amütsanbo hode Thrünpuhnü nüsa kilim jih, ju nüsa küdah thsüde mükheahlah.

²³Thrünpuhnü ha mihtsürü ju lümkhi lade tüsho mükheahjungde nüsa kilim jih; tüsho nüsanü mihbukmuyuk arung hode api sangkim kheak yümkihde sheshih.

²⁴Tüshe Thrünpuhnü ashe thsünü dükheakshihde api arhang kamshih, tümütüsho ashenü api tholopü mukukde alakheah.

²⁵Tümüde api dünkheak Davidnü tha, ‘Inü Kamruhroro I miki Atungpuh ngü, tümüde maphappü thsüde api I khah tsülim lah;

²⁶jumonü I mulong asühde la, tüsho I mulonü asühachih; kheaküshe I pang mulonglamkhi ching labah.

²⁷Tümüde nünü I me Ashe-lomi ching mübahyuk, yungsho nü yo amüsühbuhnü athsümünim müngüshih.

²⁸Nünü I kilim rhangdung limro mükheahshih; nünü nü bede asühkhinü I mide akamshihbah.’

²⁹“Keoniorübo, isa jipürü David shebah kiuyuka bahdo de inü nüsa ki mulong tode thakhuklah, tüsho api kiuyuk khihni khiungde isa lung lah.

³⁰Jumonü wukihrü thsümonü, tüsho api kiulongthsü-binkiu kheak anihbuh tsühsoniuso bolungnü khülang binshihpü Thrünpuhnü api ki thiyuchihchimkhi mükheahde,

³¹apinü ngüjung tüsho Khrista arhang kamlokhi dünkheak tha, junangde Ashe-lomi ching api mübahyuk, yungsho api pangnü athsümünim müngü.

³²Haju Jisu, Thrünpuhnü arhang kamloshih, tüsho ju dünkheak isa alala thiyumütsanbo ah.

³³Jumonü Thrünpuh khah tsülim shuhkihjihde, tüsho Amüsüh Menü alokhikhi Abuh kilimnü leangkhide, nüsanü angükhi tüsho asokhi ha apinü nüsa kheak dungkihjih.

³⁴Tümüde David a yinmibo lim müyükih; tüshe apinü aküdah thsüde tha, ‘Atungpuhnü I Tungpuh ki tha, I khah tsülim binang,

³⁵inü nü riribo nü jing-jungpung mükamshihyi khiungde.’

³⁶“Jumonü nüsanü ayümkihbuh Jisu ha, Thrünpuhnü api Atungpuh tüsho Khrista kamshihkheah de Israel yamkhün alalanü mütsande mükheahshang.”

³⁷Küyimki arünü ha sokheanü arü küpkhukde kam, tüsho Peter le aningkhi amüsüh-thsangyurübo ki tha, “Keoniorübo, isanü küde athsüba?”

³⁸Tüsho Peternü arü ki tha, “Nüsa mihbüm abannü nüsa neak bahpü thsungkheak Jisu Khrista mung chingnü mulong müthriang tüsho baptiang; tüsho nüsanü Amüsüh Me thsambah leangkhibah.

³⁹Tümüde alokhikhi ju nüsa le nüsa tsührübo tüsho limshu ching larü, Atungpuh isa Thrünpuhnü ajirü aban kilim lah.”

⁴⁰Tüsho apinü püpü yubo thiyumütsan thsüde tüsho mulong tuthsukde arü ki tha, “Ha mihbukmuyuk lün chingnü nüsabo khümkhitang.”

⁴¹Junangde sherünü api yu leangkhikheanü bapti, tüsho ju nimung mihtsürü 3000 bande kheyuk.

⁴²Tüsho arünü amüsühthsangyurübonü thsangyukhi le arihmukhung, yikhap yihnakkhi tüsho tamkhüntamnü ching mulong jih.

⁴³Mihtsürü aban kheak atrepü arü; tüsho amüsüh-thsangyurübo hode khinthiyinbebo le amüyinsahbebo ahihdo rhimo.

⁴⁴Akinrü alala rukhüh mukhung tüsho kukruk alala rukhüh yo lakheah;

⁴⁵tüsho arünü arü lakhitbo le kukrukbo yinbah khürü yihnüpü lakhi yande arü alala kilim chama jih.

⁴⁶Tüsho nimung aban arüngyam ching rukhüh mukhungde tüsho arü yambo ching yikhap yihnakde, arünü mulong asühde tsühyungbe tsüh,

⁴⁷Thrünpuh shijihde mihtsürü alala ki asühachih. Tüsho Atungpuhnü khümkhita larübo arü wühkhe ching kheyuk.