Read Yimchungru Naga Yunir 22 Bible Online

Yunir 22 - Yimchungru Naga bible

Yunir 22

¹“I keoniorü Israelrübo, kheakü nüsa miki inü alim thakhi anijang.

²Tüsho küyimki apinü Ibri yutha chingnü arü ki thakheanü arü alalanü zhi. Tüsho apinü tha:

³“I a Kilikia ching lakhi Tarsa chingnü azübekhi Jihudarü ah, tüshe Gamaliel kheaknü anikhitde ha kiuto chingnü asürü. Inü isa jipürü yakzan thsangdankhi mulong jihde leangkhi tüsho khihni nüsabo nangde Thrünpuh kilim shuhmülanga jih.

⁴Ha limro ching yanrü inü thsümüchide sheshih. Inü athrürübo tüsho aliberübo rama rihyam ching yuk.

⁵Inü thiyuro thachoh de achangbe amükeambuh tüsho kiuthsü-binkiu abümnü thiyumütsan jihpü kuklah. Arünü keoniorü Jihudarü kilim kihüm thrütkhi inü leangkhi, junangde inü arü rhüka lubah Jirusalem chingnü athsümüchipü Damaska ching yü.

⁶“I hantsahde Damaska thüninde arüchoki, animuro kim ching zukleangnü thüning chingnü ayin ato khülangnü I mükamde tah.

⁷I alo kheak keam tüsho I ki düsheak khülangnü athakhi so, ‘Saul, Saul, tümüde nünü I thsümüchicho?’

⁸Tüsho inü alo, ‘Nü she a Atungpuh?’ Apinü I ki tha, ‘I nünü thsümüchikhi Nazarethrü Jisu ah.’

⁹Kheakü I lung sherü lakheanü ayin ju ngü tüshe I ki thabuh düsheak a muso.

¹⁰Tüsho inü tha, ‘Inü tümü thsüba, Atungpuh?’ Atungpuhnü I ki tha, ‘Asürübah Damaska ching yüzahang, tüsho nünü arhimopü akhua lakhi alala ju chingnü nü ki thabah.’

¹¹Tüsho küyimki ayin tahkihkhinü inü mükheahkhukkhea, I lung berübo khahnü I thobah Damaska lim arü.

¹²“Ju kiuto ching akin ching mulong jihde isa yakzan mihyuanikhi mihtsürü ju ching lakhi Jihudarü alalanü wüntre jihkhi amung Anania,

¹³I kilim arü, tüsho I ki zhipbah tha, ‘Keoniorü Saul, ngülode kamang.’ Tüsho ju kim chingnü inü ngülode kam tüsho api ngü.

¹⁴Tüsho apinü tha, ‘Isa jipürü Thrünpuhnü api lümkhi mükheahpü Alungkibuh Khülang ngüpü tüsho api düsheak anipü nü mokhitdo;

¹⁵tümüde nü ju nünü angükhi tüsho asokhi mihtsürü alala ki api dünkheak thiyumütsan labah.

¹⁶Kheakü tümüde nünü aleangcho? Asürübah baptiang, tüsho api mung jide nü neakbo müsüh-a bahang.’

¹⁷“Küyimki I Jirusalem lim alode yübah arüngyam ching tamkhüntamnüde alakheanü I michih khülang lakheah,

¹⁸tüsho apinü I ki thade ngü, ‘Niokheamde Jirusalem chingnü wukhiukang, tümütüsho arünü I dünkheak nünü thiyumütsan thsükhi müleangkhi.’

¹⁹Tüsho inü tha, ‘Atungpuh, sinagog aban ching inü aramkhi tüsho nü kheak kinrü shikkhi arünü mükheahlah.

²⁰Tüsho küyimki nü thiyumütsan thsükhi Stephen thiyih bukkhea, I she ju ki mütsanmükhi jihde tüsho api laksahrü khimmihbo kümde zhip.’

²¹Tüsho apinü I ki tha, ‘Chamachihang; tümüde inü nü hurü khiungkerü kilim yüshihbah.’ ”

²²Ha thakhi khiungde arünü api ki ani, tüsho arü düsheak achangnü tha, “Hadürü ha alomi chingnü kheamshang, tümüde api alapü müthülün!”

²³Arünü zhide arü khimbo thorüp tüsho asungthulung apung ching suka bahchoki,

²⁴limthobuhnü api ju bonungrü-yam ching beyukpü thiyukhüm jih, tüsho arünü api azhihde azhikhi amütsan yimkhitpü api ki lakde akeokhipü tha.

²⁵Tüsho arünü shihküp-liunü api rhükchoki, Paulnü ju ki zhipkhi wühkenobuh ki tha, “Nünü Rom mihkhung mihtsürü amülim mülade ashikpü yakzan la shi?”

²⁶Küyimki wühkenobuhnü ha sokhea, apinü yübah limthobuh ki tha, “Nünü tümü rhimochonü kümkangang, tümüde ha Romrü ah.”

²⁷Judüki limthobuhnü arübah api ki tha, “I ki thaang, nü Romrü a shi?” Apinü alo, “Am.”

²⁸Limthobuhnü tha, “I a sho ahihkhüh jihbah mihkhung kamkheah.” Tüsho Paulnü tha, “Tüshe I a mihkhung zübekheah.”

²⁹Judüki api ki keokhipü larübonü nahde api kinü akhinabah; tüsho api Romrü ah de ayimkhit dunglim limthobuh she treabah, tümütüsho apinü anihbuh rhük.

³⁰Ashidopü Jihudarünü Paul müdamkhi yimkhitpü mulongde limthobuhnü api dükhe tüsho amükeam putungrübo le kiuthsübinkiu alala mukhungpü thiyukhüm jih, tüsho Paul bede akibah arü miki zhipshih.