Read Yimchungru Naga Yunir 23 Bible Online

Yunir 23 - Yimchungru Naga bible

Yunir 23

¹Tüsho Paulnü kiuthsürü kheak kheahmürip tüsho tha, “Keoniorübo, khihni khiungde lümkhi atsü alala ching inü Thrünpuh miki lado.”

²Tüsho achangbe amükeambuh Ananianü api ki zhiprü ki api mün kheak dampü thiyukhüm jih.

³Paulnü api ki tha, “Nü amüye mujukhi-rhü, Thrünpuhnü nü shikbah! Nünü yakzan yande I mahkhappü binbah ju yakzan azhihde I shikpü thiyukhüm jihcho de?”

⁴Ju ki zhiprübonü tha, “Nünü Thrünpuh yo achangbe amükeambuh azhihba de?”

⁵Tüsho Paulnü tha, “Keoniorübo, api achangbe amükeamrü ah de inü mükheah-a müla; tümüde ha thrüta lah, ‘Nünü nüsa mihtsürü yakzanshuhrü dünkheak amütsü dasuk.’ ”

⁶Tüshe küyimki Paulnü khürü Sadukirü tüsho püpü Pharisirü de amütsankhea, apinü kiuthsü-binkiu ching zhi, “Keoniorübo, I Pharisirü tsührü Pharisi ah; mulonglam tüsho asherü arhang kamlopü dünkheaknü I mahkhap ching lah.”

⁷Küyimki apinü ha thakhea, Pharisirü le Sadukirü dükeak alanaji akhiuk; tüsho amukhungrü ju chamnak.

⁸Tümüde Sadukirünü arhang kamlokhi, yunirü yungsho me müla de tha; tüshe Pharisirünü arü alala kin.

⁹Judüki alanaji tode kam; tüsho Pharisirü yakzan thsangyurü khürünü wusu tüsho müküpde tha, “Isanü ha mihtsürü kheak amülim tümü müyimkhit. Me yungsho yunirünü api ki asukachihsho tümü la?”

¹⁰Küyimki alanaji ju mütsüde akamkhea, arünü Paul ju adütre kamde thonakbah de limthobuhnü trede lüm, jumonü bonungrübo yükibah arü bolungnü api arochihde bea lubah bonungrü-yam ching arüpü thiyukhüm jih.

¹¹Ju tsüngre Atungpuh api ki zhipbah tha, “Mulong toang, tümüde nünü Jirusalem ching I dünkheak thiyumütsan jihdo, junangde nünü Rom ching she thiyumütsan thsübah.”

¹²Küyimki ayinkhikhea, Jihudarübonü rük yim tüsho Paul mülaksahyikia mütsühyungpü thiyuchihchim thsü.

¹³Ha rukhüh lümkhi thsükhi ching arü 40 akumung lakheah.

¹⁴Tüsho arünü amükeam putungrübo tüsho azothsürübo kilim yübah tha, “Isanü Paul mülaksahyikia mütsühyungpü thiyuchihchima lah.

¹⁵Kheakü jumonü kiuthsübinkiu lung arihbah nüsanü api ki keokhikeorapü nangde bede akipü limthobuh ki lümkhi jihang; tüshe thüninde marüyide isanü api laksahpü thsakhambah.”

¹⁶Kheakü arünü ajimkhi Paul achi tsührünü so; jumonü apinü bonungrü-yam ching yüzah tüsho Paul ki tha.

¹⁷Tüsho Paulnü atorü khülang jibah tha, “Athrününgtsüngbuh ha limthobuh kilim bede yüang; tümüde apinü anihbuh ki tümüanü athapü lah.”

¹⁸Jumonü apinü anihbuh bea lubah limthobuh kilim yü tüsho tha, “Aramrü Paulnü I ji tüsho ha athrününgtsüngbuh nü kilim bede arüpü tha, tümüde apinü nü ki tümüanü athapü lah.”

¹⁹Limthobuhnü akhah kheaknü thoa lu tüsho tsahhuhbah mükhingde api ki keokhi, “Nünü I ki thapü ju tümü a?”

²⁰Tüsho apinü tha, “Jihudarübonü nüsa ki keokhikeorapü nangde shido kiuthsü-binkiu kilim Paul bede akipü nü ki keopü mulongdo.

²¹Tüshe arü ki dani; tümüde arü mihtsürü 40 akumung api mülaksahyikia mütsühyungpü thiyuchihchimbah jika binlah; tüsho kheakü nü kilim alokhikhi yu arünü aleanglah.”

²²Jumonü limthobuhnü athrününgtsüngbuh ki thiyu thabah tsoshih, “I ki ha thiyusheak jihkhi she ki she dütha.”

²³Judüki apinü atorü mahne jihbah tha, “Are 9 king ching bonungrü 200, ju lung khoraberü 70 tüsho thsüh-shuhrü 200 bebah Kaesarea khiungde ayüpü thsakhamang.

²⁴Paul binshihpü khora khürü jihang, tüsho kovünor Felix kilim tsüde bede yüang.”

²⁵Tüsho apinü kihüm hanangde thrüt:

²⁶“Klaudia Lysianü atoashangrü kovünor Felix kilim salüm.

²⁷Ha mihtsürü Jihudarünü rambah alaksahpü thsü, tüshe inü bonungrübo bebah arüchoki api ju Rom mihkhung ah de inü mükheahbah anihbuh khümkhit.

²⁸Tüsho arünü api müdamkhi mükheahpü künde inü arü kiuthsübinkiu kilim api bede aki.

²⁹Api ju arü yakzan keokhikhi dünkheak müdama lah, tüshe ashepü yungsho aramyukpü thsüde tümü müthülün de inü yimkhit.

³⁰Tüsho küyimki ha mihtsürü azhihde rük yimkhi I ki thakhea, inü khülangki api nü kilim thiyichoh. Api azhihrü kilim she nü ki arü lümkhi thashihpü inü thiyukhüm jihdo.”

³¹Jumonü bonungrübonü arü yukhümbo hanbah azhing ching arü lung Paul bea lu tüsho api Antipatri ching bedarü.

³²Tüsho ashidopü arünü khoraberübo api lung yüshihbah bonungrü-yam lim yülo.

³³Küyimki arü Kaesarea ching arübah kovünor kilim kihüm jihkhea, arünü Paul she api kilim jih.

³⁴Kihüm khebah api tümü lomi chingnü a de keokhi. Küyimki api Kilikia chingnü ah de apinü amükheahkhea,

³⁵apinü tha, “Küyimki nü müdamrü arübanü inü nü ki aniakheahbah.” Jushu apinü Paul ju Herod yam ching aheangde azopü thiyukhüm jih.