Read Yimchungru Naga Yunir 3 Bible Online

Yunir 3 - Yimchungru Naga bible

Yunir 3

¹Nimung khülang Peter le Johan ane anirelim 3 king ching tamkhüntamnü kim ching arüngyam lim wutude alakheah.

²Mihtsürü khülang zübechokinü jingkikrü arüngyam ching yüzahrü kheak kakheangshihpü Akheahakham Ripit de ajikhi ki nimung aban hande yünü binshihde alakheah.

³Peter le Johan ane arüngyam ching yüzahpü thsüde ngübah apinü tümükhüh kheang.

⁴Anenü api kheak kheahkih tüsho Peternü tha, “Ike kilim kheahang.”

⁵Tüsho apinü ane kilimnü tümükhüh leangkhipü mükkin thsüde ane kheak kheahkih.

⁶Tüshe Peternü tha, “I a shotoyinchi tüsho suna müla, tüshe I tümü lanü inü nü kilim jihchoh; Nazarethrü Jisu mung chingnü tsahang.”

⁷Tüsho apinü akhah tsülimnü thoa lubah düjitmusu; tüsho zukleangnü amüphü tüsho ajingmükbo düküngde kam.

⁸Tüsho apinü jukmusubah tsahde tüsho jukde Thrünpuh mung shide ane lung arüngyam ching yüzah.

⁹Mihtsürü alalanü ju tsahde tüsho Thrünpuh mung shide ngü,

¹⁰tüsho arüngyam Akheahakham Ripit ki kakheangde abinbuh ah de mütsan; api kheak dünjikhinü arübo amüyinsahkhinü mide kam.

¹¹Küyimki apinü Peter le Johan büne kheak tholokhea, mihtsürü alala müyinsahde Solomon yam ayinkhe de ajikhi lim rukhühnü alihde yü.

¹²Küyimki Peternü ju ngükhea, apinü mihtsürübo ki tha, “Israel mihtsürübo, tümü thsükhi nüsanü ha kheak müyinsahcho, yungsho isa wu yungsho isa tsakamkhinü api tsahshihkhi nangde isa kheak kheahcho?

¹³Abraham Thrünpuh, Isak Thrünpuh, tüsho Jakob Thrünpuh, isa jipürü Thrünpuhnü, apinü adükhepü pungkhia lachoki nüsanü Pilat miki jihabahde abahyukbuh api yamlarü Jisu müretahshihdo.

¹⁴Tüshe nüsanü Amüsüh tüsho Thiyuro-lungkibuh bahyuk, tüsho mihlaksahrü nüsa kilim dükheshihpü kheang,

¹⁵tüsho Thrünpuhnü ashe chingnü arhang kamloshihbuh, rhangdung Putungpuh laksah. Ha thsungkheak isa thiyumütsanbo ah.

¹⁶Tüsho api mung ching akin hode nüsanü ngüde mükheahde alakhi ha mihtsürü düküngshih; tüsho Jisu hode apinü ha mihtsürü nüsa alala mikinü phü tsüde kamshih.

¹⁷“Keoniorübo, nüsa le nüsa limberübonü manikhitde rhimodo de inü mükheahlah.

¹⁸Tüshe wukihrübo alala mün hode Khrista thsünüpü Thrünpuhnü tümü thajungkheanü ha dünjido.

¹⁹Jumonü mulong müthriang, tüsho rholoang, junangde nüsa neakbo nankhita bahbah Atungpuh kilimnü me düküngpü kimbo arübah,

²⁰tüsho nüsa thsungkheak akhukhi Jisu Khrista apinü nüsa kilim thiyibah.

²¹Thrünpuhnü api yo amüsüh wukihrübo adüso larü hode amükheahshihkhi nangde, alala aso kamlopü kim marüyi khiungde api ju yinmi ching aninga labeah.

²²Mosanü tha, ‘Apinü I thiyikhi nangde Atungpuh Thrünpuhnü nüsa bolungnü nüsa thsungkheak wukihrü khülang thiyibah. Apinü nüsa ki thakhi alala nüsa ki anibah.

²³Tüsho ju wukihrü ki manirü mihtsürü aban mihtsürü bolungnü adükheakshihbah.’

²⁴Tüsho wukihrü alala, Samuel tüsho ashulim arürünü harü nimungbo müchitdo.

²⁵Nüsa ju wukihrübo tüsho Thrünpuhnü isa jipürü Abraham ki, ‘Nü müjih ching alomi yamkhün alala müngühmühibah,’ de tangzüngkhi tsührübo ah.

²⁶Thrünpuhnü api yamlarü mokhita, nüsa mihbüm aban amülimbo chingnü rholode müngühshihpü nüsa kilim akhuhde arüshih.”