Read Yimchungru Naga Yunir 6 Bible Online

Yunir 6 - Yimchungru Naga bible

Yunir 6

¹Judüki nimungbo ching akinrübo hihde kamchoki, Greek-yu-tharü Jihudarü le Jihudarü mihkhung dükeak rukachih lakheah, tümütüsho arü khimoberübo nimung aban chamzüchamdo ching bahyukde alakheah.

²Tüsho thürükheak mahnenü akinrü boto jibah tha, “Tsühyungbe adünarapü thsungkheaknü isanü Thrünpuh yu thsangyuthsangra bahyukpü alim yung.

³Jumonü keoniorübo, nüsa bolung mung atsü larü, Amüsüh Me tüsho lümlungnü mide alarü isanü ha rhimo ching zojihpü thsüde nüsa bolungnü mihtsürü thüne mokhitang;

⁴tüshe isanü tamkhüntamnü tüsho thsangyuthsangrapü khungde arhimobah.”

⁵Ju thakhinü boto alala asühshih. Tüsho arünü akin tüsho Amüsüh Menü mide alakhi Stephen, Philip, Prokora, Nikamor, Timon, Parmena, tüsho Antiok chingnü khiungkerü Nekola mokhit.

⁶Arünü harü amüsüh-thsangyurübo miki zhipshih, tüsho arünü arü kheak khah nimde tamkhüntamnüjih.

⁷Junangde Thrünpuh yu bude yü; Jirusalem ching akinrübo khide hihde kam, tüsho amükeamrü ahihkhühnü akin leangkhi.

⁸Tüsho Stephennü akin tüsho wunü mide mihtsürü bolung khinthiyinbe tüsho amüyinsahbe atobo rhimo.

⁹Tüshe zuzu ngükhi mihtsürübo sinagog ching kheyukrü Serene le Alexandria tüsho Kilikia le Asia chingnü Jihudarü Stephen kheak atsangde awusupü tankih,

¹⁰tüshe apinü Me lümlungnü athakhi azhihde müzhipkhuk.

¹¹Judüki arünü mihtsürü khürü ajuh-a thashih, “Stephennü Mosa tüsho Thrünpuh mükhemükimde athakhi yubo isanü sodo.”

¹²Jumonü arünü mihtsürübo le azothsürübo tüsho yakzan thsangyurübo thurumusu. Arünü Stephen rambah kiuthsübinkiu miki bedarü.

¹³Arünü arükchih thiyumütsan jihde tha, “Ha mihtsürünü kamruhroro isa amüsüh arüngyam tüsho Mosa yakzan azhihde athapü mutuklo;

¹⁴tümüde Nazarethrü Jisu hanü arüngyam lukbah tüsho Mosa kilimnü arükhi yakli alala müthribah de athakhi isanü sodo.”

¹⁵Kiuthsü-binkiu ching binrü alalanü Stephen kheak kheahkihde kheah, tüsho amiro ju yunirü miro nangde ngü.