Read Yimchungru Naga Yunir 7 Bible Online

Yunir 7 - Yimchungru Naga bible

Yunir 7

¹Judüki achangbe amükeambuhnü keokhi, “Harü atsütsü a de?”

²Tüsho Stephennü tha: “Keoniorü tüsho buhrübo, I ki aniang. Api Haran ching mülayide, Mesopotamia ching lachoki, müretahkhi Thrünpuhnü isa abuh Abraham ki akhiuk,

³tüsho api ki tha, ‘Nü lomi tüsho nü keoniorü kheaknü chamachihbah inü nü ki huhpü lakhi lomi ching yüang.’

⁴Jumonü apinü Kaldearü lomi bahjihbah Haran ching la. Tüsho api abuh she dunglim, Thrünpuhnü ju chingnü kheakü nüsa lakhi lomi ching api bekhit;

⁵tüsho apinü ju ching anihbuh kilim amüphü dubopü lang she yamrüplurüp müjih. Tüshe Abraham tsührü mülaa lalashe, apinü anihbuh le adunglim api tsühsoniusobo kilim yamalo jihpü alokhi.

⁶Thrünpuhnü api ki hanangde tha: Nü tsühsoniusobo khiungkerü lomi ching hanrü thsüde alabah, tüsho arübo kam chi phüyi azhorü thsübah.

⁷Tüsho arü junokhi trükshih inü mahkhapbah, Thrünpuhnü tha, ‘tüsho ju dunglim arü akhiukbah ha dangpung ching I tankihbah.’

⁸Judüki apinü anihbuh kilim tsütabahpü tangzüng jih; junangde Abrahamnü Isak ngü tüsho nimung tizheahpü ching api tsütabah; tüsho Isak kheaknü Jakob trükkhit tüsho Jakob kheaknü jipürü 12 trükkhit.

⁹“Jakob tsührübonü Josep mükthsüde kambah api Ijip ching yin; tüshe api lung Thrünpuh lakheah,

¹⁰api thsümütsü alala chingnü api bekhit tüsho Ijip kiulongthsüpuh Pharao miki amuzho tüsho lümlung jihbah apinü anihbuh Ijip tüsho api yamkhün alala kurungkheak kovünor kamshih.

¹¹Kheakü Ijip tüsho Kanan alala ching khümzung tüsho küpkhuk ato arüchoki isa jipürübo tsühyungbe müngüde alakheah.

¹²Tüshe küyimki Ijip ching hi lakhi Jakobnü asokhea, apinü isa jipürübo akhuhbe thsüde thiyia yüshih.

¹³Tüsho mahne kipü Josep ju akeoniorübo ki mükheahshih, tüsho Pharaonü Josep yamkhün mükheahde kam.

¹⁴Judüki Josepnü yüshihbah abuh le keoniorübo alala mihtsürü 75 api ki jia lu.

¹⁵Junangde Jakobnü Ijip ching yüki; tüsho api le isa jipürübo sheabah.

¹⁶Tüsho arübo Shekem lim hanlode arü tüsho Abrahamnü Shekem abuh Hamor ki shonü athulokhi kiuyuk ching bah.

¹⁷“Tüshe Thrünpuhnü Abraham ki mülüjihkhi kim thüninchoki, mihtsürübo Ijip ching wüh bu.

¹⁸Ashulim Josep mümükheahkhi kiulongthsürünü Ijip ching yakzan shuhpü tankih.

¹⁹Apinü isa mihtsürü le isa jipürübo, arü khungarübo asheshihpü thüyam chingnü yihkhita bahpü nimkih tüsho junode rhimo.

²⁰Ju kim ching Mosa zübe, tüsho Thrünpuh miki akhamde alakheah. Tüsho api ju abuh yam ching khinu mahsam mütrü;

²¹küyimki api yihkhita bahkhea, Pharao tsührübenü bea lubah anihbe tsührü nangde mütrüzo.

²²Mosa ki Ijip lümlung alala thsangyu tüsho api ju thiyu tüsho rhimobo ching mungkhung mihtsürü kam.

²³“Küyimki api kam 40 azorü lakhea, akeoniorü Israel tsührübo rhuakheahpü mulong ching arü.

²⁴Apinü arü bolung khülang Ijipbuhnü thsümüchide ngübah api rungpü yü tüsho royimjihde Ijipbuh ju laksah.

²⁵Thrünpuhnü api mihtsürü bekhitpü api ahorichoh de anihbuh mihtsürübonü anikhitbah de Mosanü lüm, tüshe arünü manikhit.

²⁶Ashidopü Israelrü mahne rukachihde Mosanü ngübah ane dükeak mungtsü thsüde tha, ‘Mihtsürübo, nüke keoniorü ah; tümüde nükenü yuriachihcho le?’

²⁷Tüshe shepünü api yamhingbuh müneahde alakheanü Mosa nima bahde tha, ‘Shepünü nü isa kurungkheak yakzanshuhrü tüsho mahkhaprü kamshihkhea?

²⁸Nünü yini Ijipbuh kheak rhimokhi nangde I she alaksahpü künla de?’

²⁹Ha thakhi sobah Mosanü Midia lomi ching yünü tsotsahrü thsüde la. Ju ching api tsührü 2 lakheah.

³⁰“Küyimki kam yirü hokhea, Sinai Müzüng sunglo, sangrung ching yunirü api ki akhiuk.

³¹Mosanü ju kheahbah müyinsah; apinü akheahpü thüninde ayülichoki Atungpuh düsheak arü,

³²‘I a nü pü pürü Abraham, Isak tüsho Jakob Thrünpuh ah.’ Tüsho Mosanü ajan tüsho akheahpü mümürang.

³³Tüsho Atungpuhnü api ki tha, ‘Nü jing chingnü jingkhümpü yihkhitang, tümüde nü zhipkhi dangpung ju amüsüh lo ah.

³⁴Tsükjide Ijip ching arü thsümüchikhi tüsho arü ashekhi inü sodo, tüsho arü bekhitpü I akikheah. Kheakü arang, inü nü Ijip lim yüshihanü.’

³⁵“Ha buh Mosa, shepü arünü, ‘Shepünü nü isa kurungkheak yakzanshuhrü tüsho mahkhaprü kamshihkhea?’ de reanglode athabuh thsü Thrünpuhnü api ki sangrung ching yunirü akhiukbuh khah hode yakzanshuhrü tüsho abekhitrü chido kamde thiyi.

³⁶Apinü Ijip ching, Amürüm keto, tüsho sunglo ching kam yirü khinthiyinbe tüsho amüyinsahbebo rhimode bekhit.

³⁷Mosa hanü Israelrü ki tha, ‘Apinü I bemusukhi nangde Thrünpuhnü nüsa thsungkheak wukihrü khülang nüsa keoniorü bolungnü akhiukshihbah.’

³⁸Api ju Sinai Müzüng ching api le isa jipürü ki asukbuh yunirü bede sunglo ching amukhungrü lung lakheah; tüsho apinü isa kilim jihpü rhangdung yubo leangkhi.

³⁹Isa jipürünü api ki mihyumanide bahyuk, tüsho arü mulong ching Ijip lim yülode,

⁴⁰Aron ki tha, ‘Isa müngüh yüpü isa thsungkheak thrünpuhbo thsüjang; tümüde isa Ijip lo chingnü bekhhitbuh Mosa kheak tümü dünjia lanü isanü mümükheah.’

⁴¹Arünü jurü nimungbo ching moshinunu khülang thsü, tüsho sangthsü kilim laksah-a kingaün jihde arü khahnü athsükhi ching asühachih.

⁴²Tüshe Thrünpuhnü rholode tso tüsho wukihrübo hüm ching thrüta lakhi nangde arünü chiningbo kingaünshih: ‘O Israel yamkhün, nüsanü sunglo ching kam yirü shiwühbo laksah-a I kilim jihdü de?

⁴³Nüsanü kingaünpü thsükhi Molek khimyam tüsho Rephan thrünpuh chining han; tüsho inü nüsa Babilon hode atsoshihbah.’

⁴⁴“Isa jipürübo sunglo ching ashorupung khimyam lakheah. Ha Thrünpuhnü Mosa ki khuhlangahuhkhi yande thsü.

⁴⁵Isa jipürünü arüngkhimyam leangkhia lubah Thrünpuhnü arü müngüh yankhita bahkhi trükshih lomi luchoki Jihusua lungnü hanbah yü. Tüsho ju ching David kim khiungde la.

⁴⁶Apinü Thrünpuh amuzho ngü tüsho Jakob Thrünpuh lapung yimkhitpü keo.

⁴⁷Tüshe Solomonnü api thsungkheak thüyam thsükheah.

⁴⁸Tütüshe khide Achangbuhnü mihtsürü khahnü athsükhi yambo ching mülachoh; wukihrünü athakhi nangde, @SPACE =

⁴⁹‘Yinmi I binkiu, tüsho alomi I jing-dubopung. Nüsanü I khilim tümü yam thsüjihkhea, Atungpuhnü thachoh, yungsho I sühakhimpü dangpung tümü a?

⁵⁰I khahnü harü alala thsükhi yung de?’

⁵¹“Nüsa achungthülang mihtsürübo, mulong tüsho nükhün ching tsütamübahrü, nüsanü kamruhroro Amüsüh Me reanglochoh. Nüsa jipürübonü arhimokhi nangde nüsanü rhimochoh.

⁵²Nüsa jipürübonü müthsümüchikhi wukihrübo sherü a? Arünü thiyuro-lungki Khülang arüpü zhiyukbuh she laksah. Tüsho kheakü nüsanü api mülapyukde laksah —

⁵³yunirübonü ajihkhi yakzan nüsanü leangkhi tüshe ju mihyumani.”

⁵⁴Küyimki arünü harü sokheanü arü bukakhiuk tüsho api azhihde arü hü mütrüt.

⁵⁵Tüshe Amüsüh Menü mide apinü yinmi lim kheah tüsho Thrünpuh müretah tüsho akhah tsülim Jisu zhipde ngü;

⁵⁶tüsho apinü tha, “Kheahang, yinmi khimshuhkhi, tüsho Thrünpuh khah tsülim Mihtsürü Tsührü zhipkhi inü ngüchoh.”

⁵⁷Tüshe arünü düsheak achangnü zhi tüsho arü nükhünbo yihdode api kilim nanachihde yü.

⁵⁸Jushu arünü api kiuto ching bekhit tüsho arupü tankih. Tüsho thiyumütsan thsürübonü arü khimmihbo athrününgtsüngbuh Saul jing ki zojih.

⁵⁹Arünü Stephen rude alachoki, apinü tamkhüntamnü, “Atungpuh Jisu, I me leangkhiang.”

⁶⁰Tüsho apinü khukningbah düsheak achangnü zhi, “Atungpuh, arü azhihde ha neak dülümkhitjih.” Küyimki apinü ha thakhea, api sheabah.