Read Yimchungru Naga Yunir 9 Bible Online

Yunir 9 - Yimchungru Naga bible

Yunir 9

¹Tüshe Saulnü judü lang Atungpuh jingyanrübo thsümüchide laksahde alakheah. Apinü achangbe amükeambuh ki yü

²tüsho athrürü yungsho aliberü thsüthsü apinü limro ching ngüsho Jirusalem lim rhüka lubah arüpü Damaska ching sinagogbo kilim kihüm jihang de api ki keokhi.

³Tüsho api hantsahde alachoki Damaska thüninde arü, tüsho zukleangnü thüning limnü api mükamde ayin tahkhi.

⁴Judüki api alo kheak keam, tüsho api ki thakhi düsheak so, “Saul, Saul, tümüde nünü I thsümüchicho?”

⁵Tüsho apinü tha, “Nü she a Atungpuh?” Atungpuhnü tha, “I nünü athsümüchibuh Jisu ah;

⁶tüshe asürang tüsho kiuto ching yüzahang, tüsho tümü rhimobeanü nü ki thabah.”

⁷Api lung tsahkhi mihtsürübo ju düsheak a sobah she mülakhi hode thiyu müthade zhip.

⁸Saulnü alo kheaknü asürü; tüsho küyimki api mükbo khimshuhkhea, apinü tümü mükheahkhuk; jumonü arünü akhahnü thobah Damaska ching arü.

⁹Tüsho nimung mahsam apinü mükheahkhukde mütsühyungde alakheah.

¹⁰Kheakü Damaska ching Khristanrü amung Anania lakheah. Atungpuhnü michih ching api ki tha, “Anania.” Apinü alo, “I ha ching lah, Atungpuh.”

¹¹Atungpuhnü api ki tha, “Langakindo alakhi kiudunglimro kheak Juda yam ching yüang tüsho Tarsa chingnü mihtsürü khülang amung Saul dünkheak keokhiang, tümüde api tamkhüntamnüde lah.

¹²Tüsho mihtsürü khülang amung Anania arübah api mük bitshihpü anihbuh kheak akhahbonü nimde michih ching ngüdo.”

¹³Tüshe Ananianü alo, “Atungpuh, ha mihtsürünü Jirusalem ching nü yo amüsührübo kheak küdükhüh amütsü rhimokheanü ahihdo kilimnü inü sodo;

¹⁴tüsho ju ching nü mung jirü alala rhükpü amükeam putungrübo kilimnü api thiyukhüm-sühmüh lah.”

¹⁵Tüshe Atungpuhnü api ki tha, “Yüang, tümüde api ju khiungkerü le kiulongthsürübo tüsho Israel mihtsürübo ki I mung mükheahshihpü thsüde I tankihpü inü mokhitdo;

¹⁶tümütüsho I mung dünkheaknü küdükhüh thsünübeanü inü api ki huhbah.”

¹⁷Jumonü Ananianü tsahmusu tüsho thüyam ching ju yüzah. Tüsho akhahbo api kheak nimde tha, “Keoniorü Saul, nü mük bitshihpü tüsho Amüsüh Menü mide akamshihpü, limro ching nü ki akhiukbuh Atungpuh Jisunü I nü kilim thiyikheah.”

¹⁸Tüsho zukleangnü tümüanü thüngüh küpbo nangde api mükbo chingnü ayokhi tüsho api müknü ngüde kam. Apinü wusu tüsho bapti,

¹⁹tüsho tsühyungbe tsühbah reangzahde kam. Nimung ashang api ju jingyanrübo lung Damaska ching lakheah.

²⁰Tüsho zukleangnü apinü sinagogbo ching Jisu dünkheak zhiyukde tha, “Api ju Thrünpuh tsührü ah.”

²¹Tüsho api yu sorü alalanü müyinsah tüsho tha, “Api ju Jirusalem ching ha buh mung jirü thsümüchibuh yung de, tüsho arübo rhüka bede yünü amükeam putungrübo kilim jihpü ha ching arükhi yung de?”

²²Tüshe Saul sühmüh alü düküngde kam, tüsho Jisu ju Khrista de mütsanjihkhinü Damaska ching lakhi Jihudarübo yingyingde kamshih.

²³Nimung ahihkhüh ho dunglim, Jihudarübonü api laksahpü rük yim,

²⁴tüshe arünü rük thsükhi Saulnü mükheahabah. Arünü api laksahpü azhing ayin chipi ripit neakde alakheah;

²⁵tüshe api jingyanrübonü azhing ching bea lu tüsho muluk chingnü rhü yande akishih.

²⁶Tüsho küyimki api Jirusalem ching arükhea, apinü jingyanrü bolung bepü mürang; arü alalanü api tre, tümüde api ju jingyanrü khülang ah de arünü akin müla.

²⁷Tüshe Barnabanü api bea lubah amüsühthsangyurübo kilim arü, tüsho apinü Damaska limro kheak anihbuh ki asukbuh Atungpuh ngükhi tüsho Jisu mung chingnü mulong tode Damaska ching thsangyuthsangrakhi thaa huh.

²⁸Jumonü apinü Jirusalem ching arü bolung yüla arüla de,

²⁹Atungpuh mung ching mulong tode thsangyuthsangra. Apinü Greek-yu tharü Jihudarü azhihde tha; tüshe arünü api laksahpü yim.

³⁰Küyimki keoniorübonü ju mükheahkhea, arünü api Kaesarea ching bede aki, tüsho Tarsa lim yüabahshih.

³¹Junangde Judea, Galilee tüsho Samaria ching borü alala mungtsü lade tankih-a lakheah; tüsho Atungpuh trekhi ching tsahde tüsho Amüsüh Menü mulong shukheamkhi ching wüh bude kam.

³²Peternü lomi dangpung alala hode yü, junangde Lydda ching lakhi amüsührübo kilim she aki.

³³Ju ching apinü kam tizheah thripshe tukthsükhi amung Aenea ngü.

³⁴Tüsho Peternü api ki tha, “Aenea, Jisu Khristanü nü thsüngujihchoh; asürang tüsho nü yapkiu lukang.” Tüsho apinü nahdü lang asürü.

³⁵Lydda tüsho Sharon ching larü alalanü api ngü, tüsho Atungpuh kilim rholo.

³⁶Joppa ching aliberü akinrü amung Tabitha (Greek yunü Dorka, amütsan shihmüchi) lakheah. Alibe ju rhimo atsü tüsho rungzürungdo rhimonü mide alakheah.

³⁷Ju kim ching alibe tukthsü tüsho sheabah; alibe pang ju müsüh tüsho achangbe khiungshak ching yapshih.

³⁸Lydda ju Joppa phünide alakhinü ju ching Peter lah de akinrübonü sobah api ki mushushihpü mihtsürü mahne yüshih, “Muzhobah mashude isa kilim arang.”

³⁹Jumonü Peternü tsahmusubah ane lung yü. Tüsho küyimki api arükhea, arünü api achangbe khiungshak ching bede yükih. Khimoberü alala api rheang ki tripde zhip, tüsho alibe arü lung lachoki Dorkanü pangkhümpü le khimmihbo keakkhi huh.

⁴⁰Tüshe Peternü arü alala wungdo wukhiukshihbah khukning tüsho tamkhüntamnü; jushu pang lim ju rholode apinü tha, “Tabitha, asürang.” Alibenü amükbo rheak tüsho küyimki anihbenü Peter ngükheanü dukomusua bin.

⁴¹Apinü akhah chunga yüshih tüsho anihbe thomusu. Judüki akinrübo le khimoberübo jibah alibe ju arhang kama arü kilim jih.

⁴²Ju Joppa alala ching mükheahde kam, tüsho ahihkhühnü Atungpuh kheak kin.

⁴³Tüsho apinü Joppa ching nimung ashang shihküp-rhimorü Simon lung la.