Read Yimchungru Naga Rom 1 Bible Online

Rom 1 - Yimchungru Naga bible

Rom 1

¹Jisu Khrista yamlarü Paul, amüsüh-thsangyurü thsüpü jikhi tüsho Thrünpuh thiyusheak-atsü thsungkheak büthsükhi —

²amüsühyubo ching api wukihrübo hode atannü apinü alokhikhi,

³mihtsürü ayannü David müjih chingnü azübekhi, api tsührü isa Atungpuh Jisu Khrista dünkheak,

⁴amüsühkhitkhi Me ayannü ashe chingnü arhang kamlode, wulade Thrünpuh tsührü de akhipkhitkhi,

⁵shepü hode isanü amüthsüm tüsho api mung ching trükshih alala bolung akin ching mihyuanipü amüsüh-thsangyurü thsüpü leangkhikhea,

⁶Jisu Khrista yo thsüpü jia larü bolung nüsa she belanü;

⁷Thrünpuhnü muzhokhi, amüsührü thsüpü jikhi Rom ching larü alala kilim: Isa Abuh Thrünpuh tüsho Atungpuh Jisu Khrista kilimnü nüsa amüthsüm tüsho mungtsü lashang.

⁸Akhuhde, Jisu Khrista hode I Thrünpuh kilim inü makshe jihchoh, tümütüsho nüsa akin alomiküp alala ching zhiyukdo.

⁹Api tsührü thiyusheak-atsü ching I menü atankihkhi Thrünpuh ju I thiyumütsan lah, junangde I tamkhüntamnü ching kamruhroro müdüchingde inü nüsa lümkhitchoh,

¹⁰junangde Thrünpuh lümkhi hode akheam ching I nüsa kilim arüpü akuk ngüpü keokhichoh.

¹¹Tümüde nüsa düküngshihpü thsüde me thsambah jihpü inü nüsa shorupü mulong duklah,

¹²junangde isabo akin hode nüsa tüsho I yanmusuachihbah.

¹³I keoniorübo, püpürü khiungkerü bolung nangde nüsa bolung yimlupü thsüde inü nüsa kilim arüpü ahihdo ki lümkhi thsükhi kheakü khiungde zhipdolah de nüsanü mükheahang.

¹⁴I a Greekrü le yakzan-mülarü, lümlung larü le makharü chido ki shozüng lah.

¹⁵Jumonü nüsa Rom ching larü ki she thiyusheak-atsü thsangyuthsangrapü mulungde lah.

¹⁶Tümütüsho inü thiyusheakatsü dünkheak machih: ha akin larü aban kilim akhuhde Jihudarü tüsho Greekrü kilim akhümkhit thsungkheak Thrünpuh wu lah.

¹⁷Tümüde ju ching Thrünpuh thiyuro-lungki ju akin chingnü akin hode akhiuka lah; ha thrüta lah, “Shepü thiyurolungkianü akin hode arhang alabah.”

¹⁸Tümüde arü amütsü tüsho mihbukmuyuknü thiyuro zhipdokhi mihtsürü alala azhihde Thrünpuh bukakhiukkhi yinmi chingnü amikheak akhiuka lah,

¹⁹tümütüsho Thrünpuh dünkheak tümü mükheahkhukbe lanü arü ki athülih lah, tümüde Thrünpuhnü arü ki ju huh.

²⁰Thrünpuhnü alomiküp thrünchokinü, amüngübebo, api akheam müla wu tüsho Thrünpuh yakli chido thrüna lakhibo chingnü mütsande ngü. Jumonü mihtsürübonü amudopü müla;

²¹tümüde arünü Thrünpuh mükheah-a lalashe api Thrünpuh ah de wüntre müjih yungsho makshe müjih, tüshe arünü alümkhi ching zhazhade kam tüsho arü makhakhi mulong mitingabah.

²²Lümlung lah de athakhinü, arü makharü kam,

²³tüsho amüshebe Thrünpuh müretah ju ashebe mihtsürü, wuhnubo, shiwühbo yungsho phurutobo mejak dün müthriachih.

²⁴Jumonü Thrünpuhnü mümüsühkhi arü mulongnü akünkhi lim, arü bolung arü pang wüntre müjihkhi lim arübo jihabah,

²⁵tümütüsho arünü Thrünpuh dünkheak thiyuro ju akeangyu dün müthriachih tüsho lünnü müngühmühikhi Athrünrü müthri loriloko kingaün tüsho tankih! Amen.

²⁶Ha dünkheaknü Thrünpuhnü arübo achihbe rhimo lim jihabah. Aliberübonü yakli lakhinü yakli mülakhi müthriabah,

²⁷junangde athrürübonü aliberü kheak yakli lakhi rhimo bahbah khülangnü khülang yimachihde athrürünü athrürü kheak achihbe rhimo tüsho arü mülimkhi thülünde arünü thsümüchi leangkhi.

²⁸Kheaküshe, arünü Thrünpuh mükheahmudu zopü athülün de mülümkhi hode amülim rhimopü lümkhi lim jihabah.

²⁹Arü ju mihbukmuyuk, amütsü, yihnelune, lungchihpünü mide kam. Mükthsü, mihlaksah, rukachih, mülapmüji, mükzahlungzah, jipjiprara,

³⁰dünthamungtha, Thrünpuh thraneanrü, mükmürüm, lungkhangkhi, kükheangkhi, amütsü rhimo, berübuhrü ki mihyumanikhi,

³¹makhakhi, akin mülakhi, mulong müzahkhi, mihmukhiuhnü mide kam.

³²Sherünü jurü rhimobanü ashepü thülünlah de arünü Thrünpuh yakzan mükheahkheah she, arünü arhimokhi lang yung tüshe jurü rhimorü she alim jihchoh.