Read Yimchungru Naga Rom 10 Bible Online

Rom 10 - Yimchungru Naga bible

Rom 10

¹Keoniorübo, I mulongnü akünkhi tüsho Thrünpuh ki arü thsungkheak I tamkhüntamnü ju arü khümkhitpü lah.

²Arünü Thrünpuh thsungkheak mulong jihlah de inü thiyumütsan thsükhuklah, tüshe arünü thiyuro mükheahmudu kheak müningkih.

³Tümütüsho arünü Thrünpuh kilimnü arükhi thiyuro-lungki mümükheahde arü küdahnü arhimopü yim, jumonü arünü Thrünpuh thiyuro-lungki lim mümükhüm.

⁴Akin larü aban alim mütsanpü thsüde Khrista ju yakzan akheam ah.

⁵Mihtsürü shepünü yakzan kheak ningkihkhi thiyuro-lungki rhimochonü junü rhangdung labah de Mosanü thrüt.

⁶Tüshe akin kheak ningkihkhi thiyuro-lungkinü, “Shepü yinmi ching yükihba?” (ju, Khrista bekhipü) de nüsa mulong ching dütha de thachoh.

⁷Yungsho, “Shepü alomi khüp yüzahba?” (ju, ashe chingnü Khrista bekhitpü) de dükeo.

⁸Tüshe hanü tümü thacho? Thiyu ju nü thüninde, nü münküp kheak tüsho nü mulong ching lah (ju, isanü thsangyuthsangrakhi akin yu);

⁹tümütüsho Jisu ju Atungpuh de nü münküpnü alokhisho tüsho ashe chingnü Thrünpuhnü api bemusukheah de nü mulong ching kinsho nü akhümkhitbah.

¹⁰Tümüde mihtsürünü api mulongnü kinchoh, junangde alim mütsando tüsho api münküpnü alokhichoh tüsho api khümkhit.

¹¹Amüsühyunü thachoh, “Api kheak kinrü sheshe achih müngüshih.”

¹²Tümüde Jihudarübo le Greekrü dükeak achamnak müla; ju Atungpuh alala Tungpuh tüsho api mung jirü alala kilim api lakhitbo jihchoh.

¹³Tümütüsho, “Atungpuh mung jirü aban akhümkhitbah.”

¹⁴Tüshe arünü mükinkhi ki mihtsürübonü küde ajiba? Tüsho arünü küyimkishe musobuh ki küde akinba? Tüsho thsangyuthsangrarü mülade arünü küde asoba?

¹⁵Tüsho arü thiyia mülasho mihtsürübonü küde thsah thsangyuthsangraba? Ha thrüta lah, “Thiyusheak atsü thsangyuthsangrarü jing küdükhüh she akhamla!”

¹⁶Tüshe arü alalanü a thiyusheak-atsü müleangkhi; tümüde Isaianü tha, “Atungpuh, isa kheaknü asokhi shepünü akinkhea?”

¹⁷Junangde akin ju asokhi chingnü arüchoh, tüsho Khrista dünkheak thsangyuthsangrakhi chingnü asokhi arüchoh.

¹⁸Tüshe inü keokhi: Arünü muso de? Jua am, “Arü düsheak alomi alala ching, tüsho arü yubo alomiküp akheambo ching yüdo.”

¹⁹Kheaküshe inü keokhi: Israelnü manikhit de? Akhuhde Mosanü thachoh, “Trükshih müthsükhi khülangnü inü nüsa mükthsüde akamshihbah; makha trükshih khülangnü inü nüsa bukakhiukshihbah.”

²⁰Tüsho Isaianü mulong tode thachoh, “I müyimrünü I ngü; I dünkheak mükeokhirü ki inü I huh.”

²¹Tüshe Israel dünkheak apinü thachoh, “Mihyumanirü tüsho azhih mihtsürü kilim inü nimung amuyung I khah chungkih.”