Read Yimchungru Naga Rom 11 Bible Online

Rom 11 - Yimchungru Naga bible

Rom 11

¹Dale tüsho inü keokhichoh: Thrünpuhnü api mihtsürü bahyukdü de? Jude yung! I she Israelrü, Abraham tsühsoniuso, Benjamin trük kheyukrü ah.

²Apinü mükheahjunga lakhi api mihtsürü Thrünpuhnü mübahyuk, Elijanü Israel azhihde Thrünpuh ki mushukhi dünkheak amüsühyunü athakhi nüsanü mümükheah de?

³“Atungpuh, arünü nü yo wukihrübo laksahdo, arünü nü kingaün sadambo thsümünimdo, I lang aninga lah, tüsho arünü I rhangdung yimchoh.”

⁴Tüshe Thrünpuhnü api ki alokhi tümü a? “Inü I thsungkheak Baal ki mukhukningrü mihtsürü 7000 zodo.”

⁵Jumonü kheakü kim ching she amüthsüm hode mokhitkhi aningkhi lah.

⁶Tüshe ju amüthsüm hode a sho, kheaküa rhimo hode müla; jude yungsho amüthsüm ju atsütsü amüthsüm yungde alabah.

⁷Dale tüsho tümü a? Israelnü ayimkhi müngüdebahdo. Amokhitrünü ju ngü, tüshe aningkhi a mulong müküpabah,

⁸ha thrüta lah, “Thrünpuhnü arü lümkhi tüsho mulong zhazhaabahshih; khihni khiungde arünü müngükhuk yungsho muso.”

⁹Tüsho Davidnü thachoh, “Arü dükhüm ju qimürip tüsho azheang, arü angakpung tüsho thsümüchipü kamshang;

¹⁰Arünü müngükhukpü thsüde arü mükbo tukshang, tüsho lünnü arü düthsün hünshang.”

¹¹Jumonü inü keokhichoh, arü angakpü jingmükhedü de? Jude yung! Tüshe Israel mükthsüshihpü thsüde arünü alakmihkhi hode khiungkerü kilim akhümkhit arü.

¹²Kheakü arünü alakmihkhi alomi thsungkheak lakhitbo kamsho tüsho arü mukukzamkhi khiungkerü lakhitbo kamsho, arü alala kheyuksho küdükhüh alü laba!

¹³Kheakü inü nüsa khiungkerü ki thachoh. I khiungkerü kilim amüsüh-thsangyurü thsü khiungdüa inü I tankihkhi müretahshihbah.

¹⁴Junangde inü I mihtsürü Jihudarü mükthsüde akamshihbah, tüsho arü khürü khümkhitbah.

¹⁵Arü bahyukkhi ju alomi tsüarihkhi a sho, arü leangkhikhi ju a ashe chingnü rhangdung laba shi?

¹⁶Akhuhbe yikhap khülang Thrünpuh kilim jihsho, anungkhi abümnü api yo ah; tüsho sangdung yingbo Thrünpuh kilim jihsho, akhahbo she api yo ah.

¹⁷Akhimkhi oliv-dung khürü akhah yihshak, tüsho ju ching mütüm oliv-dung khah müchin. Nüsa khiungkerü ju mütüm oliv-dung kiphahlah, tüsho kheakü nüsanü Jihudarü rhangdung me düküngkhi ching shihcham luchoh.

¹⁸Jumonü sangkhahbo nangde ayihshakrü nüsanü mükhemükim düthsü. Nüsanü lülüshishisho, nüsanü aying muduhlo tüshe ayingnü nüsa duhlolah de lümkhitang.

¹⁹Nüsanü athabah, “Ju ching I müchinkihpü thsüde sangkhahbo zhak.”

²⁰Ju thiyuro. Arünü mükinmonü arübo yihshak, tüshe nüsanü akin hode düküngde zhip. Jumonü dükükheang, tüshe trede zhipang.

²¹Thrünpuhnü sangkhah tsütsü maningshihkhülaa, apinü nüsa aningshihbah de nüsanü lümcho de?

²²Jumonü Thrünpuh mihmuzho tüsho amüküpkhi mütsanang: angaka larü kilim müküplah tüsho nüsanü api amuzho ching mutuklode lasho nüsa kilim mihmuzho lah; jude yungsho nüsa she lipkhia bahbah.

²³Tüsho Jihudarünü arü mükinkhi bahyuksho amüchinkihlobah, tümüde Thrünpuhnü ju rhimopü kuklah.

²⁴Nüsa ju mütüm oliv-dung kheaknü lipkhibah ashih mayeye she akhimkhi olivdung kheak müchinsho, ju sangkhahbo oliv-dung kheak müchinpü küdükhüh athülihbe laba!

²⁵I keoniorübo, nüsa küdahnü shia mulushihpü thsüde rama lakhi thiyuro nüsanü mükheahshihnelah. Israel mihtsürü mulong müküpkhi lün thsungkheak yung, tüshe khiungkerü khekhi alala Thrünpuh ki arükhi khiungdü lang ah.

²⁶Junangde Israel alala khümkhitbah. Amüsühyunü thachoh, “Zion chingnü abekhitrü arübah, apinü Jakob chingnü amükinrü alala yankhitbah”;

²⁷“tüsho küyimki inü arü neakbo lude atsobanü ha inü arü ki tangzüngkhi labah.”

²⁸Tümütüsho arünü thiyusheak atsü bahyukkhinü nüsa khiungkerü dünlimnü Jihudarü ju Thrünpuh riribo. Tüshe Thrünpuhnü amokhitkhi, arü jipürübo dünlimnü api müyamrübo ah.

²⁹Tümüde Thrünpuh thsambahbo tüsho ajikhibo mululokhukbe ah.

³⁰Khülangki nüsanü Thrünpuh ki mihyumanide lado tüshe kheakü arünü mihyumanikhi hode nüsanü mihmüthsüm leangkhido,

³¹arünü mihyumanide la, junangde nüsa ki mihmüthsüm huhkhi hode arü she mihmüthsüm leangkhipü lakheah.

³²Tümüde Thrünpuhnü mihyumanipü mihtsürü alala ram, junangde api mihmüthsüm alala kheak labah.

³³Thrünpuh lakhitbo küdükhüh ato a! Api lümlung tüsho mükheahmudu küdükhüh sükla? Shepünü api limrobo anikhitkhukba?

³⁴Amüsühyunü thachoh, “Shepünü Atungpuh lümkhi mükheahkhea, yungsho shepü api athsunganahrü lakhea?”

³⁵“Yungsho anihbuh ngülopü thsüde shepünü api kilim thsambah jihkhea?”

³⁶Tümüde lüpdükhi api kilimnü, api hode tüsho api kilim lah. Lünnü api müretahshang. Amen.