Read Yimchungru Naga Rom 12 Bible Online

Rom 12 - Yimchungru Naga bible

Rom 12

¹Jumonü keoniorübo, Thrünpuh mihmüthsüm hode inü nüsa ki tuthsukchoh: Api tankihkhi ching tsangkhitde tüsho api asühshihde Thrünpuh kilim nüsa rhangdung kingaün jihang. Ha nüsanü ajihpü lakhi thiyuro kingaün ah.

²Ha lomi yakli yande düla tüshe nüsa lümkhi aso kamde thsüphuloang, junangde nüsanü Thrünpuh lümkhi tümü atsü a, aleangkhikhukbe a tüsho khiukdahkhi lanü amütsanbah.

³Tümütüsho I kilim jih-a lakhi amüthsüm hode inü nüsa aban ki thachoh: Nü thülünkhi kheaknü nü küdahnü khide changde dülüm, tüshe Thrünpuhnü nü kilim jihkhi akin ayannü athülün atsüngalimnü lümang.

⁴Pang khülang ching isa achamnak hihde lah, tüsho achamnak alala rhimo rukhüh yung,

⁵junangde isa ahihdo thsüa lalashe Khrista ching khülang ah, tüsho khülangnü khülang kheak chingkihlah.

⁶Amüthsüm yande isa kilim jihkhi thsambah büthsüthsü ju isanü rhimoanü: müchitpü a sho akin ayannü;

⁷tankihpü a sho, isanü tankihpü ching; shepünü thsangyuchonü api thsangyupü ching;

⁸shepünü tuthsukchonü, apinü atuthsukkhi ching; shepünü rungzürungdochonü, salakhi ching; shepünü limbechonü, jinjihde; shepünü mihmüthsüm huhchonü, asühsahdo rhimoang.

⁹Amuzho ju thiyuro lashang; tümü amütsüanü thraneanang, tümü atsüanü düngde ramrihang;

¹⁰keoniorü amuzhonü khülangnü khülang muzhoachihang; khülangnü khülang wüntre jihang.

¹¹Küyimkishe mükünmuthsung düthsü, Me ching düküngde Atungpuh tankihang.

¹²Nüsa mulonglam ching asühachihang, thsümütsü ching arümang, mutukzhakde tamkhüntamnüang.

¹³Amüsührü yihnüpü lakhi arung jihang, hanrü akamang.

¹⁴Nü thsümüchirü müngühjang; müngühjang tüsho arü dümuthrumünean.

¹⁵Asühachihrü lung asühachihang, atriprü lung tripang.

¹⁶Khülangnü khülang ki arihakokhi ching laang; dükükheang, tüshe abobe kuhi mihtsürü lung arihpü mulongang. Nü küdahnü lümlung larü ah de dülüm.

¹⁷She ki she amütsü dün amütsü düjihlo, tüshe alala miki tümü atsüanü lümang.

¹⁸Kuksho, nünü alala ki mungtsü laang.

¹⁹I müyamrübo, küyimkishe nüsanü rodüyim, tüshe Thrünpuh bukakhiukkhi aleangang; tümüde ha thrüta lah, “Royimpü ju I yo, inü ajihlobah, Atungpuhnü thachoh.”

²⁰Ju müthri, “Nü riri khümsho, api yimkipang; api kethürisho, ke duhang; tümüde jude athsükhinü nünü api ku kheak mokhih lamlam thsukkihjihbah.”

²¹Amütsünü dükukshih, tüshe atsünü amütsü kukshang.